ନବରରଙ୍ଗପୁର: ସହରରେ ଥିବା ନୂଆବନ୍ଧ ସାହିଠାରୁ କଲେଜ ରାସ୍ତା ପର୍ଯ୍ୟନ୍ତ ଚାରିଆଡ କେବଳ ଅନ୍ଧାର ହିଁ ଅନ୍ଧାର । ଏହି ଅନ୍ଧାର ରାସ୍ତାରେ ପ୍ରତିଦିନ ଯିବା ଆସିବା କରନ୍ତି ହଜାର ହଜାର ଲୋକ । ତେବେ ଏହି ଅନ୍ଧାର ରାସ୍ତାରେ ରହିଛି ମହାବିଦ୍ୟାଳୟ , ଏଗ୍ରିକଲ୍ଚର ଅଫିସ, ଆରଡ଼ି ଅଫିସ, ହର୍ଟିକଲଚର୍ ଅଫିସ, ଜିଲ୍ଲା କୋର୍ଟ, ସରସ୍ବତୀ ଶିଶୁ ବିଦ୍ୟାମନ୍ଦିର ଭଳି ଅନେକ ଗୁରୁତ୍ବପୂର୍ଣ୍ଣ କାର୍ଯ୍ୟାଳୟ, ସ୍କୁଲ ଓ କଲେଜ।
ତେବେ ଏହି ରାସ୍ତାରେ ବିଦ୍ୟୁତ ସୁବିଧା ନଥିବାରୁ ରାତି ଅଧରେ ଏହି ରାସ୍ତା ଦେଇ ରୋଗୀମାନଙ୍କୁ ଜିଲ୍ଲା ମେଡିକାଲକୁ ନେବା ଆଣିବାରେ ଅସୁବିଧା ଭୋଗୁଛନ୍ତି ଲୋକେ । ଅନ୍ଧାରରେ ରାସ୍ତା ଉପରେ ହିଂସ୍ର ଯନ୍ତୁ ଯଥା ଭାଲୁ ଆଦି ଯିବା ଆସିବା କରୁଥିବା ମଧ୍ୟ ଦେଖିବାକୁ ମିଳୁଛି । ତେବେ ବିଡମ୍ବନାର କଥା କି ଏହି ରାସ୍ତାରେ ଲାଇଟ ପୋଲ ଅଛି କିନ୍ତୁ ଜଳୁନାହିଁ ଗୋଟିଏ ବି ଲାଇଟ ।
ସେହିପରି ସହର ଓ ଗ୍ରାମବାସୀମାନେ ଏହି ରାସ୍ତାରେ ଲାଇଟ ଲଗାଇବାକୁ ଦାବି କରିଛନ୍ତି । ରାସ୍ତା ଅନ୍ଧାର ଥିବା ଯୋଗୁଁ କିଛି ଦିନ ତଳେ ଜଣେ ଯୁବକ ଖୋଳାଯାଇଥିବା ଏକ ଗାତରେ ପଡ଼ି ତାଙ୍କର ମୃତ୍ୟୁ ହୋଇଥିଲା । ଯଦି ଏହି ରାସ୍ତାର ଲାଇଟ ଖୁଣ୍ଟ ମରାମତି କାର୍ଯ୍ୟ ଶୀଘ୍ର କରାନଯାଏ ତେବେ ଜନଅସନ୍ତୋଷ ଉଗ୍ର ରୂପ ନେବ । ତେଣୁ ଅଧିକ କିଛି ଅଘଟଣ ଘଟିବା ଆଗରୁ ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟି ଦେବା ପାଇଁ ବୁଦ୍ଧିଜୀବୀମାନେ ଦାବି କରିଛନ୍ତି ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
