ନବରଙ୍ଗପୁର: ମହାମାରୀ କୋରୋନା ମୁକାବିଲା କରିବା ପାଇଁ ସରକାର ସ୍ବାସ୍ଥ୍ୟ ବ୍ୟବସ୍ଥାକୁ ଜରୁରୀ ପରିସ୍ଥିତିରେ ସଜାଡିବାରେ ଲାଗିଛନ୍ତି । ଏଥିପାଇଁ ରାଜ୍ୟ ସରକାର ପ୍ରତ୍ୟେକ ପଞ୍ଚାୟତରେ 5 ଲକ୍ଷ ବ୍ୟୟରେ ଅସ୍ଥାୟୀ ସ୍ବାସ୍ଥ୍ୟ କେନ୍ଦ୍ରର ବ୍ୟବସ୍ଥା କରୁଛନ୍ତି ।
ସଦର ବ୍ଲକ ତାରାଗାଁ ସରକାରୀ ନୋଡାଲ ସ୍କୁଲ ଠାରେ ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର ଖୋଲାଯାଇଛି । ଏହି ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ରରେ 50ଟି ଶଯ୍ୟାର ବ୍ୟବସ୍ଥା କରାଯାଇ ଥିବାବେଳେ ସାମାଜିକ ଦୂରତାକୁ ଗୁରୁତ୍ବ ଦେଇ ଶଯ୍ୟା ଗୁଡିକୁ ସଜାଯାଇଥିବା ଦେଖିବାକୁ ମିଳିଛି ।
ଲାଇଟ, ଫ୍ୟାନ, ପିଇବା ପାଣି, ହାତ ଧୋଇବା ପାଇଁ ସାବୁନ, ସାନିଟାଇଜର୍ ଆଦି ଅସ୍ଥାୟୀ ସ୍ବାସ୍ଥ୍ୟ କେନ୍ଦ୍ରରେ ରହିଛି । ସରକାରଙ୍କ ନିର୍ଦ୍ଦେଶ ଅନୁଯାୟୀ ଏହି ଅସ୍ଥାୟୀ ସ୍ବାସ୍ଥ୍ୟ କେନ୍ଦ୍ରରେ ଗ୍ରାମପଞ୍ଚାୟତର ଜିଆରଏସ ବିମଳ ନାୟକଙ୍କୁ ନୋଡାଲ ଅଫିସର ଭାବେ ଦାୟିତ୍ବ ଦିଆଯାଇଥିବା ବେଳେ ସ୍ଥାନୀୟ ମହିଳା ସ୍ବାସ୍ଥ୍ୟ କର୍ମୀ, ଆଶା କର୍ମୀ, ଅଙ୍ଗନବାଡି କର୍ମୀମାନଙ୍କୁ ନିୟୋଜିତ କରାଯାଇଛି l
ଏଥିରେ ରାଜ୍ୟ ବାହାରୁ ଫେରୁଥିବା ଶ୍ରମିକ କିମ୍ବା ବ୍ୟକ୍ତି ବିଶେଷଙ୍କୁ ସଙ୍ଗରୋଧ କରିବା ପାଇଁ ବିଶେଷ ସୁବିଧା କରାଯାଇଛି l
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
