ନବରଙ୍ଗପୁର: ସେପ୍ଟେମ୍ବର ୧ ତାରିଖରୁ ଦେଶରେ ନୂତନ ଭାବେ ଲାଗୁ ହୋଇଥିବା ମୋଟରଯାନ ଆଇନକୁ ବିରୋଧ କରିଛି କଂଗ୍ରେସ। ଏନେଇ ନବରଙ୍ଗପୁର ଜିଲ୍ଲା କଂଗ୍ରେସ ଭବନ ଠାରେ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଛି।
ଖବର ଅନୁଯାୟୀ, ନବରଙ୍ଗପୁର ଜିଲ୍ଲାରେ ପୋଲିସର ମାତ୍ରାଧିକ କାର୍ଯ୍ୟାନୁଷ୍ଠାନ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ପ୍ରଶାସନ ଓ ରାଜ୍ୟ ମୁଖିଆଙ୍କ ଠାରୁ ଅଭୟ ପ୍ରତିଶ୍ରୁତି ପାଇ ପୋଲିସ ସାଧାରଣ ଜନତାଙ୍କ ମୌଳିକ ଅଧିକାରକୁ ମଧ୍ୟ ଛଡେଇ ନେଉଛନ୍ତି।
ଗୋଟିଏ ପଟେ ନୂତନ ଭାବେ ଲାଗୁ କରାଯାଇଥିବା ମୋଟରଯାନ ନିୟମକୁ କଂଗ୍ରେସ ଶାସିତ ଅନେକ ରାଜ୍ୟ ଲାଗୁ ନକରିଥିବା ବେଳେ ଓଡ଼ିଶା ସରକାର ଏହାକୁ କଡ଼ାକଡ଼ି ଲାଗୁକରି ଅର୍ଥ ଆଦାୟ ପାଇଁ ଏକ ବାଟ ସୃଷ୍ଟି କରିଛି।
ଅନ୍ୟାୟ ଭାବେ ଏହି ନିୟମ ଲାଗୁ କରି ସରକାରଙ୍କ ରାଜକୋଷରେ ଟଙ୍କା ଜମା କରିବାର ଏହା ଏକ ଅଭିନବ ଉପାୟ ବୋଲି ରାଜ୍ୟ କାର୍ଯ୍ୟକାରିଣୀ ସଭାପତି ପ୍ରଦୀପ ମାଝୀ ଅଭିଯୋଗ କରିଛନ୍ତି।
ତେବେ ଆଦିବାସୀ ଅଧ୍ୟୁଷିତ ନବରଙ୍ଗପୁର ଜିଲ୍ଲାରେ ଗରିବ ଶ୍ରେଣୀର ଲୋକମାନେ ଏତେ ଟଙ୍କା ଫାଇନ କିପରି ବାନ୍ଧିବେ ତାହା ଚିନ୍ତାର ବିଷୟ। ତେଣୁ ଜିଲ୍ଲାବାସୀଙ୍କୁ ପ୍ରଥମେ ମୋଟରଯାନ ସମ୍ପର୍କରେ ସଚେତନ କରାଯାଉ ବୋଲି କଂଗ୍ରେସ ଜିଲ୍ଲା ସଭାପତି ମନୋରଞ୍ଜନ ତ୍ରିପାଠୀ କହିଛନ୍ତି।
ଖୋଦ ମୋଟରଯାନ କାର୍ଯ୍ୟାଳୟ ଓ ପୋଲିସ ବିଭାଗର ସମସ୍ତ ଯାନର ତନଖି ପ୍ରଥମେ କରାଯାଉ ବୋଲି ଜିଲ୍ଲା କଂଗ୍ରେସ ଦାବି କରିଛି। ନଚେତ୍ ଆଗାମୀ ଦିନରେ କଂଗ୍ରେସ ରାଜରାସ୍ତାକୁ ଓହ୍ଲାଇବ
ବୋଲି ଚେତାବନୀ ଦେଇଛନ୍ତି।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
