ରାଇରଙ୍ଗପୁର: କରଞ୍ଜିଆ ବନଖଣ୍ଡରେ ହାତୀ ଆକ୍ରମଣରେ ଯୁବକ ମୃତ । ଦୁଧିଆଣି ରେଞ୍ଚ ଅଧୀନରେ ଥିବା ବଳା ଗ୍ରାମର ନୀଳକଣ୍ଠ ସଂଖିଆଳ(୧୮) ହାତୀ ଆକ୍ରମଣରେ ପ୍ରାଣ ହରାଇଥିବା ସୂଚନା ମିଳିଛି । ଏକ ସପ୍ତାହ ହେବ କରଞ୍ଜିଆ ବନଖଣ୍ଡ ଅଞ୍ଚଳରେ ହାତୀ ଉପଦ୍ରବ ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇ ରହିଛି ।
ମୟୂରଭଞ୍ଜ ଜିଲ୍ଲା କରଞ୍ଜିଆ ବନଖଣ୍ଡର ୫୦ରୁ ଉର୍ଦ୍ଧ୍ବ ଗ୍ରାମରେ ହାତୀ ଆତଙ୍କ ଲାଗିରହିଛି । ମଙ୍ଗଳବାର ଦୁଧିଆଣି ରେଞ୍ଜ ଅଞ୍ଚଳରେ ୨୩ଟିକିଆ ହାତୀପଲ ଦେଉଳି ଗ୍ରାମର ଗୋଟିଏ ଏବଂ ଦରି ଗ୍ରାମରେ ଗୋଟିଏ ଘର ଭାଙ୍ଗିବା ସହିତ ବ୍ୟାପକ କ୍ଷୟକ୍ଷତି କରିଛନ୍ତି । ବନବିଭାଗ ହାତୀ ଘଉଡାଇବା ପାଇଁ ପ୍ରୟାସ ଜାରି ରଖିଥିଲେ ମଧ୍ୟ ଏ ଦିଗରେ ସଫଳ ହୋଇ ପାରିନାହିଁ । ଏମାନେ ଦିନବେଳେ ଜଙ୍ଗଲରେ ରହୁଥିଲେ ମଧ୍ୟ ସନ୍ଧ୍ୟା ସମୟରେ ଗାଁ ଅଭିମୁଖେ ଆସି ବ୍ୟାପକ କ୍ଷୟକ୍ଷତି କରୁଛନ୍ତି । ବର୍ତ୍ତମାନ ଦୁଧିଆଣି ରେଞ୍ଚ ଅଧୀନରେ ଥିବା ଦରି ଅଞ୍ଚଳରେ ୧୮ଟି ହାତୀ ଥିବା ବେଳେ ବଳା କାଜୁ ଜଙ୍ଗଲରେ ୫ଟି ହାତୀ ଥିବା ବନ ବିଭାଗ ପକ୍ଷରୁ ସୂଚନା ମିଳିଛି ।
ଇଟିଭି ଭାରତ, ରାଇରଙ୍ଗପୁର
