ରାଇରଙ୍ଗପୁର: ନବବର୍ଷରେ ଅଘଟଣ । ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ଅନ୍ତର୍ଗତ ହାଟବାଦଡା ଅଞ୍ଚଳରୁ ମହିଳାଙ୍କ ଝୁଲନ୍ତା ମୃତଦେହ ଉଦ୍ଧାର । ଉକ୍ତ ମହିଳା ଜଣଙ୍କ ହେଲେ ଗୋବିନ୍ଦ କାରୁଆଙ୍କ ସ୍ତ୍ରୀ ଶିବାନୀ କାରୁଆ ।
ସୂଚନାନୁଯାୟୀ, ହାଟବାଦଡା ଅଞ୍ଚଳର କାର୍ଗିଲ ଛକରେ ଥିବା ନିଜ ଘରୁ ଶାଢ଼ୀରେ ଝୁଲନ୍ତା ଅବସ୍ଥାରେ ଶିବାନୀଙ୍କ ମୃତଦେହ ଉଦ୍ଧାର କରାଯାଇଛି । ମୃତ ମହିଳା ଜଣକ ହେଲେ ଗୋବିନ୍ଦ କାରୁଆଙ୍କ ସ୍ତ୍ରୀ ଶିବାନୀ କାରୁଆ । ତେବେ ବର୍ଷେ ତଳେ ତାଙ୍କ ବିବାହ ହୋଇଥିବା ବେଳେ ଶିବାନୀଙ୍କର ଏକ ଦୁଇ ମାସର ଶିଶୁ ଥିବା ଜଣାପଡ଼ିଛି ।
ଘଟଣାରେ ପରିବାର ଲୋକେ ରାଇରଙ୍ଗପୁର ଗ୍ରାମାଞ୍ଚଳ ଥାନା ଅଧୀନ ହାଟବାଦଡା ଫାଣ୍ଡିରେ ସୂଚନା ଦେଇଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ମାଜିଷ୍ଟ୍ରେଟଙ୍କ ଉପସ୍ଥିତିରେ ଶିବାନୀଙ୍କ ମୃତ ଶରୀରକୁ ଉଦ୍ଧାର କରିଛି । ଏହାପରେ ମୃତ ମହିଳାଙ୍କ ବାପା ଓ ମାଆଙ୍କ ବୟାନ ରେକର୍ଡ କରିଛି ପୋଲିସ ।
ମୃତ୍ୟୁର କାରଣ ସ୍ପଷ୍ଟ ହୋଇନଥିବାବେଳେ ଶିବାନୀଙ୍କୁ ହତ୍ୟା କରାଯାଇଥିବା ଅଭିଯୋଗ କରିଛନ୍ତି ତାଙ୍କ ବାପା ଓ ମାଆ । ତେବେ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇ ତଦନ୍ତ ଜାରି ରଖିଛି ପୋଲିସ ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
