ରାଇରଙ୍ଗପୁର: କଥାରେ ଅଛି ମାଆ ହେଉଛି ସାହା । ମାଆ ନିଜ ଛୁଆକୁ ସବୁ ବିପଦରୁ ଟାଣି ଆଣିଥାଏ । ହେଲେ ଏଠାରେ ମାଆ ସାଜିଛି ପର । ଛୁଆକୁ ବିକ୍ରି କରି ନିଜଠୁ କରିଛି ପର । 8 ମାସର କୋମଳମତୀ ଶିଶୁକୁ ଶେଷରେ 800 ଟଙ୍କାରେ ବିକ୍ରି କରିଛି । ମୟୂରଭଞ୍ଜ ଜିଲ୍ଲା ଖୁଣ୍ଟା ଥାନା ଅନ୍ତର୍ଗତ ମହୁଲିଆ ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି । ମହୁଲିଆ ଗ୍ରାମର ଜନୈକ ମାଆ ନିଜ 8 ମାସର ଶିଶୁକନ୍ୟାକୁ ବିକ୍ରି କରିଦେବା ଘଟଣା ଏବେ ସମଗ୍ର ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି ।
ସୂଚନା ଅନୁଯାୟୀ, ମୁସୁ ମୁର୍ମୁ ଓ ତାଙ୍କ ସ୍ତ୍ରୀ କାର୍ମି ମୁର୍ମୁ ମହୁଲିଆ ଗ୍ରାମର ବାସିନ୍ଦା । ତେବେ ଗରିବ ଖଟିଖିଆ ଶ୍ରେଣୀର ହୋଇଥିବା ଯୋଗୁଁ ମୁସୁ ମୁର୍ମୁ ଘରେ ନିଜ ସ୍ତ୍ରୀ ଓ ଦୁଇ କନ୍ୟା ସନ୍ତାନକୁ ଛାଡି ଦେଇ କାମ ଉଦ୍ଦେଶ୍ୟରେ ତାମିଲନାଡୁ ଯାଇଥିଲେ। ତେବେ ପାଖାପାଖି ଗୋଟିଏ ସପ୍ତାହ ପୂର୍ବରୁ ମୁସୁ ତାମିଲନାଡୁରୁ ନିଜ ଘର ମହୁଲିଆ ଗ୍ରାମକୁ ଆସିଥିଲେ। ହେଲେ ସେଠାରେ ସ୍ତ୍ରୀ ଓ ଦୁଇ କନ୍ୟା ସନ୍ତାନକୁ ପାଇନଥିଲେ । ପରେ ତାଙ୍କ ସ୍ତ୍ରୀ ବାପ ଘରକୁ ଯାଇଥିବା ଜାଣିପାରି ମୁସୁ ମଧ୍ୟ ଶଶୁର ଘର ଅଭିମୁଖେ ବାହାରି ପଡ଼ିଥିଲେ।
ଏହା ବି ପଢନ୍ତୁ- ପେଟର ଭୋକ ଆଗରେ ଫିକା ପଡିଗଲା ମା’ର ମମତା
ଶଶୁର ଘରେ ପହଞ୍ଚି ସ୍ତ୍ରୀ କାର୍ମିଙ୍କ ସହିତ ସୁଖଦୁଃଖ ଆଲୋଚନା ପରେ ନିଜ ସନ୍ତାନମାନଙ୍କୁ ଖୋଜିଥିଲେ ବାପା ମୁସୁ । ହେଲେ ତାଙ୍କ 8 ମାସର କନ୍ୟା ସନ୍ତାନ ଜଣକ ମରିଯାଇଥିବା କହିଥିଲେ ମୁସୁଙ୍କ ସ୍ତ୍ରୀ କାର୍ମି । ପରେ ଗ୍ରାମବାସୀଙ୍କ ନିକଟରୁ କାର୍ମି ନିଜ 8 ମାସର କନ୍ୟା ସନ୍ତାନଟିକୁ ଆଉ କାହାକୁ ବିକ୍ରି କରି ଦେଇଥିବା ଜାଣିବାକୁ ପାଇଥିଲେ ମୁସୁ । ଘଟଣା ସମ୍ପର୍କରେ ଜାଣିବା ପରେ ମୁସୁ ଖୁଣ୍ଟା ଥାନାରେ ଏକ ଲିଖିତ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ଖୁଣ୍ଟା ଥାନା ପୋଲିସ ଘଟଣାର ଛାନଭିନ ଆରମ୍ଭ କରିବା ସହିତ ଘଟଣାର ପର୍ଦ୍ଦାଫାଶ ମଧ୍ୟ କରିଥିଲେ। ପୋଲିସ 8 ମାସର କନ୍ୟା ସନ୍ତାନକୁ ଉଦ୍ଧାର କରିବା ସହ ମା କାର୍ମିଙ୍କ ସହ ଅନ୍ୟ 3 ଜଣଙ୍କୁ ଗିରଫ କରିଛି।
ପୋଲିସର କହିବା ଅନୁସାରେ କାର୍ମିଙ୍କର ପୂର୍ବରୁ ଗୋଟିଏ କନ୍ୟା ସନ୍ତାନ ଥିବା ବେଳେ 8 ମାସ ପୂର୍ବରୁ ଆଉ ଗୋଟିଏ କନ୍ୟା ସନ୍ତାନ ଜନ୍ମ ଗ୍ରହଣ କରିଥିଲା । 2ଟି କନ୍ୟା ସନ୍ତାନକୁ ଦୃଷ୍ଟିରେ ରଖି ଛୋଟ ଶିଶୁକନ୍ୟାଟିକୁ ବିକ୍ରି କରିବା ପାଇଁ ଯୋଜନା କରିଥିଲା କାର୍ମି । ସେହି ଯୋଜନା ଅନୁସାରେ କାର୍ମି ପ୍ରାୟ ମାସେ ତଳେ ନିଜ ସାନ ଝିଅକୁ ବିପ୍ରଚରଣପୁର ଗ୍ରାମର ଫୁଲମଣି ମାରାଣ୍ଡି ଓ ଅଖିଳ ମାରାଣ୍ଡିଙ୍କୁ ବିକି ଦେଇଥିଲା । ହେଲେ ଏହି ବିକ୍ରି ଘଟଣାରେ ମଧ୍ୟସ୍ଥି ସାଜିଥିଲେ ମାହି ମୁର୍ମୁ । ତେବେ ଖୁଣ୍ଟା ଥାନା ପୋଲିସ ଶିଶୁ କନ୍ୟାଟିକୁ ଉଦ୍ଧାର କରି ବାପା ମୁସୁଙ୍କୁ ହସ୍ତାନ୍ତର କରିଥିବା ବେଳେ ଏକ ମାମଲା ରୁଜୁ କରି ଏହି ଘଟଣାରେ ଥିବା ସମସ୍ତ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି।
ଇଟିଭି ଭାରତ, ରାଇରଙ୍ଗପୁର
