ବାରିପଦା: ପାଣି ପାଇଁ ଗ୍ରାମବାସୀଙ୍କ ଧାରଣା । ଖୁଣ୍ଟା ବ୍ଲକ ନାଲୁଆ ଛକରେ ପାଣି ପାଇଁ ଗରା, ବାଲ୍ଟି ଧରି ରାସ୍ତାରେ ଧାରଣା ଦେଲେ ଗ୍ରାମବାସୀ । ଫଳରେ ଦୀର୍ଘ ସମୟ ଧରି ରାସ୍ତା ବନ୍ଦ ଯୋଗୁଁ ବାରିପଦାରୁ ଉଦଳା, ଉଦଳାରୁ ବାରିପଦା ଆସୁଥିବା ଗାଡି ଗୁଡି଼କ ଶହ ଶହ ସଂଖ୍ୟାରେ ଅଟକି ରହିଛି । ତେବେ କରକଚିଆ ପଞ୍ଚାୟତର ୧ ନମ୍ବର ୱାର୍ଡରେ ପାଖାପାଖି ୫ ଶହରୁ ଅଧିକ ଆଦିବାସୀଲୋକେ ବସବାସ କରୁଥିବାବେଳେ ପାନୀୟ ଜଳ ସମସ୍ୟା ଉତ୍କଟ ରୂପ ନେଇଛି ।
ଚୁଆ ଉପରେ ନିର୍ଭର କରି ଗ୍ରାମବାସୀ ଶୋଷ ମେଣ୍ଟାନ୍ତି । ତେବେ ପାଣି ସମସ୍ୟା ନେଇ ବାରମ୍ବାର ବ୍ଲକ ପ୍ରଶାସନ ଠାରୁ ଜିଲ୍ଲା ପ୍ରଶାସନ ପର୍ଯ୍ୟନ୍ତ ଜଣାଥିଲେ ମଧ୍ୟ କେହି ସମସ୍ୟାର ସମାଧାନ ନକରିବାରୁ ଲୋକେ ଗରା ଆଉ ବାଲ୍ଟି ଧରି ଧରି ରାସ୍ତାରେ ଆଜି ଧାରଣା ଦେଇଛନ୍ତି । ପ୍ରଶାସନର ପ୍ରତିଶୃତି ମିଳିବା ପରେ ରାସ୍ତାରୁ ହଟିବା ନେଇ ଚେତାବନୀ ଦେଇଛନ୍ତି ଗ୍ରାମବାସୀ । ଘଟଣା ସ୍ଥଳରେ BDO ଆନ୍ଦୋଳନକାରୀଙ୍କ ସହ ଆଲୋଚନା ଜାରି ରଖିଛନ୍ତି ।
ମୟୁରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
