ରାଇରଙ୍ଗପୁର : ଅଜଣା ଗାଡି ଧକ୍କାରେ ବାଇକ୍ ଆରୋହୀ ମୃତ। ମୟୂରଭଞ୍ଜ ଜିଲ୍ଲା ତିରିଂ ଥାନା ଝରାଡିହି ଫାଣ୍ଡି ଅନ୍ତର୍ଗତ ଝରାଡିହି-ଯଶିପୁର ରାସ୍ତାର ଭାଲେଇଡିହି ଛକ ନିକଟରେ ଘଟିଛି ଦୁର୍ଘଟଣା । ମୃତ ବାଇକ ଆରୋହୀ ଜଣଙ୍କ ହେଲେ ପଡୋଶୀ ଝାଡଖଣ୍ଡର କୁଆଳି ଥାନା ଅନ୍ତର୍ଗତ ବଡହାଣ୍ଡିଆଣି ଗ୍ରାମର ଜିତେନ୍ ମୁଣ୍ଡାଙ୍କ ପୁଅ ଦୁଲାଲ ମୁଣ୍ଡା । ତାଙ୍କ ବୟସ 29 ବର୍ଷ ବୋଲି ଜଣାପଡିଛି ।
ସେ କୁଳିଅଣାରୁ ନିଜ ଗ୍ରାମକୁ ଝରାଡିହି-ଯଶିପୁର ରାସ୍ତା ଦେଇ ଏକ ବାଇକରେ ଫେରୁଥିବାବେଳେ ଦୁର୍ଘଟଣାଗ୍ରସ୍ତ ହୋଇ ଘଟଣାସ୍ଥଳରେ ପ୍ରାଣ ହରାଇଛନ୍ତି। ସ୍ଥାନୀୟ ଲୋକେ ଘଟଣାସ୍ଥଳରୁ ତାଙ୍କୁ ଉଦ୍ଧାର କରି ବହଳଦା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ପଠାଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଝରାଡିହି ଫାଣ୍ଡି ଅଧିକାରୀ ସତ୍ୟବାନ ଗିରି ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରିବା ସହିତ ଦୁର୍ଘଟଣାଗ୍ରସ୍ତ ବାଇକଟିକୁ ଜବତ କରିଥିବାବେଳେ ଦୁର୍ଘଟଣା ଘଟାଇଥିବା ଗାଡିର ପତ୍ତା ମିଳିପାରି ନଥିବା ଜଣାପଡିଛି।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
