ବାରିପଦା: ଲକଡାଉନ ସମୟରେ ଆର୍ଥିକ ସଙ୍କଟ ଦେଇ ଗତି କରୁଛନ୍ତି ମଠ ମନ୍ଦିରର ପୂଜକ । ଏପରି ସ୍ଥିତିରେ ଜିଲ୍ଲାର ବିଭିନ୍ନ ମଠ ଓ ମନ୍ଦିରର 108 ପୂଜକଙ୍କୁ ରାସନ ସାମଗ୍ରୀ ବାଣ୍ଟିଛନ୍ତି ସୋଏମଆଇ ଫାଉଣ୍ଡେସନ ଓ ମୟୂରଭଞ୍ଜ ରାଜ ପରିବାର । କୋରୋନା ମହାମାରୀ ଯୋଗୁଁ ଏବେ ସମସ୍ତେ ଚିନ୍ତିତ ଥିବା ବେଳେ ବାରିପଦା ସହରର ବିଭିନ୍ନ ମନ୍ଦିର ଓ ମଠମାନଙ୍କର ପୂଜକମାନେ ଏବେ ଘୋର ଆର୍ଥିକ ସଙ୍କଟ ଦେଇ ଗତି କରୁଛନ୍ତି ।
ଏନେଇ ପୂଜକମାନଙ୍କୁ ସହାୟତାର ହାତ ବଢ଼ାଇଛନ୍ତି ସୋଏମଆଇ ଫାଉଣ୍ଡେସନ ଓ ମୟୂରଭଞ୍ଜ ରାଜ ପରିବାର । ଏହି ଅବସରରେ ବାରିପଦା ଷ୍ଟାଡିୟମଠାରେ ମୟୂରଭଞ୍ଜ ରାଜ ପରିବାର ଓ ସୋଏମଆଇ ଫାଉଣ୍ଡେସନର ମିଳିତ ଉଦ୍ୟମରେ ଏକ କାର୍ଯ୍ୟକ୍ରମର ଆୟୋଜନ କରାଯାଇଥିଲା । ଏଥିରେ ମୟୂରଭଞ୍ଜ ମହାରାଜା ପ୍ରବୀଣ ଚନ୍ଦ୍ର ଭଞ୍ଜଦେଓ, ମହାରାଣୀ ରଶ୍ମୀ ରାଜଲକ୍ଷ୍ମୀ ଭଞ୍ଜଦେଓ, ରାଜକୁମାରୀ ଅକ୍ଷୀତା ମଞ୍ଜରୀ ଭଞ୍ଜଦେଓ ପ୍ରମୁଖ ଯୋଗ ଦେଇ ବାରିପଦା ସହରର ବିଭିନ୍ନ ମନ୍ଦିର ଓ ମଠର 108 ପୂଜକଙ୍କୁ 15 ଦିନର ରାସନ ସାମଗ୍ରୀ ବଣ୍ଟନ କରିଛନ୍ତି ।
ତେବେ ଏହି କାର୍ଯ୍ୟକ୍ରମ ସୋଏମଆଇ ଫାଉଣ୍ଡେସନ ବାରିପଦା ଚାପ୍ଟର ମୁଖ୍ୟ ବିଭୂଦତ୍ତ ଦାସଙ୍କ ସଂଯୋଜନାରେ ଅନୁଷ୍ଠିତ ହୋଇଥିବା ବେଳେ କାର୍ଯ୍ୟକ୍ରମକୁ ବିଭିନ୍ନ ମହଲରୁ ପ୍ରଶଂସା କରାଯାଇଥିଲା ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
