ବାରିପଦା: ପୁଣି ଅଲୋଡ଼ା ହେଲା ଶିଶୁ କନ୍ୟା । ସ୍ଥାନୀୟ ଝାରପୋଖରିଆ ଥାନା ମହୁଲବରେଇ ଗାଁ ନିକଟସ୍ଥ ଏକ ନାଳରୁ ଉଦ୍ଧାର ହୋଇଛି ନବଜାତ ଶିଶୁ କନ୍ୟା । ଉଦ୍ଧାର ପରେ ଶିଶୁକନ୍ୟାଟିକୁ ମା’ କୋଳକୁ ଫେରାଇ ଦିଆଯାଇଛି । ଘଟଣାଟି ଦେଖିବାକୁ ମିଳିଛି ଜିଲ୍ଲାର ସାରସକଣା ବ୍ଲକ ମହୁଲବରେଇ ଗାଁ ନିକଟରେ। ଶିଶୁଟିକୁ ଗାଁ ନିକଟସ୍ଥ ଏକ ନାଳ କଡ କାଶୀ ବୁଦା ନିକଟକୁ ଫିଙ୍ଗି ଦିଆଯାଇଥିବା ଦେଖିବାକୁ ମିଳିଥିଲା ।
ସୂଚନା ମୁତାବକ ଗ୍ରାମବାସୀ ଶିଶୁକନ୍ୟାର କାନ୍ଦ ଶୁଣି ଘଟଣାସ୍ଥଳରେ ପହଞ୍ଚି ନବଜାତ ଶିଶୁ କନ୍ୟାକୁ ଉଦ୍ଧାର କରିଥିଲେ । ଏହାପରେ ଝାରପୋଖରୀଆ ପୋଲିସକୁ ଖବର ଦେଇଥିଲେ । ଉଦ୍ଧାର ପରେ ନବଜାତ ଶିଶୁକନ୍ୟାଟି ଶଙ୍ଖାଭଙ୍ଗା ଗାଁର ରତନି ସିଂଙ୍କର ବୋଲି ଜଣା ପଡିଥିଲା । ଶିଶୁ କନ୍ୟାକୁ ତାଙ୍କ ମାଙ୍କୁ ହସ୍ତାନ୍ତର କରିବା ସହ ଉଭୟ ମା’ ଓ ଶିଶୁକନ୍ୟାଙ୍କୁ ଶୀର୍ଷା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରାଯାଇଛି । ତେବେ କେଉଁ କାରଣରୁ ଶିଶୁଟିକୁ ନାଳ କଡରେ ଅଭିଭାବକ ଛାଡି ଦେଇଥିଲେ ତାହା ଜଣାପଡିନାହିଁ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
