ରାଇରଙ୍ଗପୁର: ପୁତୁରାର କୁରାଢୀ ଚୋଟରେ ମାଉସୀର ଶୋଚନୀୟ ମୃତ୍ୟୁ । ମୁଣ୍ଡକୁ ବାରମ୍ବାର ପ୍ରହାର କରି ମାଉସୀକୁ ଅତି ନୃଶଂସ ଭାବେ ହତ୍ୟା କରିଛି ପୁତୁରା । ଏପରି ଏକ ଅମାନବୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ବହଳଦା ଥାନା ଡ଼କଡିହା ଗ୍ରାମରେ ।
ସୂଚନା ଅନୁଯାୟୀ, ଗତ ମଙ୍ଗଳବାର ଅଭିଯୁକ୍ତ ପୁତୁରା ନିଜ ମାମୁଁ ଘରକୁ ଆସିଥିଲା। ଗତ ବୁଧବାର ରାତି ଖାଇସାରିବା ପରେ କୌଣସି କାରଣରୁ ତାର ମାଉସୀ ସହ ଝଗଡା ହୋଇଥିଲା । ଏହାପରେ ହଠାତ୍ ସେ ରାଗିଯାଇ ଏକ କୁରାଢୀ ସାହାଯ୍ୟରେ ନିଜ ମାଉସୀକୁ ନୃଶଂସ ଭାବେ ହତ୍ୟା କରିଛି । ମୃତ ମାଉସୀ ଜଣକ ଡକଡିହା ଗ୍ରାମର ଜାଉନି ନାୟକ ବୋଲି ଜଣାପଡିଛି ।
ଏପଟେ ହତ୍ୟା କରିବା ପୂର୍ବରୁ ଅଭିଯୁକ୍ତ ପୁତୁରା ସାହି ପଡିଶା ଘରର କବାଟ ବାହାର ପଟୁ ବନ୍ଦ କରିଦେଇଥିଲା । ଫଳରେ ସ୍ଥାନୀୟ ଲୋକେ ହତ୍ୟା ଘଟଣାକୁ ଅଟକାଇବାରେ ବିଫଳ ହୋଇଥିଲେ ।
ଗୁରୁବାର ସକାଳୁ ଘଟଣାସ୍ଥଳରେ ଗାଁ ଲୋକ ଓ ସମ୍ପର୍କୀୟଙ୍କୁ ଦେଖି ସେମାନଙ୍କୁ ଜୀବନରେ ମାରି ଦେବାକୁ ହାତରେ କୁରାଢୀ ଓ ଟାଙ୍ଗିଆ ଧରି ଅଭିଯୁକ୍ତ ଜଣଙ୍କ ଗୋଡାଇ ଥିଲା । ଏନେଇ ସକାଳୁ ଗାଁରେ ଆତଙ୍କର ବାତାବରଣ ସୃଷ୍ଟି ହୋଇଥିଲା।
ଖବର ପାଇ ବହଳଦା ପୋଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ ପୁତୁରାକୁ ଗିରଫ କରିବା ସହ ହତ୍ୟାକାଣ୍ଡରେ ବ୍ୟବହୃତ କୁରାଢୀ ଓ ଟାଙ୍ଗିଆକୁ ଜବତ କରିଛି । ଅଭିଯୁକ୍ତ ଜଣକ ହେଲେ କାନ୍ଦ୍ରା ନାୟକ । ଏହି ହତ୍ୟାକାଣ୍ଡର କାରଣ ଅସ୍ପଷ୍ଟ ରହିଥିବା ବେଳେ ରାଇରଙ୍ଗପୁର ଏସଡିପିଓ ଓ ବହଳଦା ପୋଲିସ ଘଟଣାର ଛାନଭିନ ଆରମ୍ଭ କରି ମୃତଦେହକୁ ଉଦ୍ଧାର କରିଛନ୍ତି। ଅନ୍ୟପଟେ ଅଧିକ ତଦନ୍ତ ପାଇଁ ବାରିପଦାରୁ ସାଇଣ୍ଟିଫିକ ଟିମ୍ ଆସୁଥିବା ଜଣାପଡିଛି।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
