ବାରିପଦା: କୁକୁଡା ଫାର୍ମରେ କାର୍ଯ୍ୟରତ ମହିଳା ସୁରକ୍ଷାକର୍ମୀଙ୍କୁ ଅସଦାଚରଣ ଅଭିଯୋଗ ହୋଇଛି । ଏଭଳି ଅଭିଯୋଗ ଆସିଛି ମୟୂରଭଞ୍ଜ ଜିଲ୍ଲା ରାସଗୋବିନ୍ଦପୁର ଥାନା ଛାତନ ସ୍ଥିତ ଥିବା ଭେଙ୍କ ରିସର୍ଚ୍ଚ ଏଣ୍ଡ ବ୍ରିଡିଂ ଫାର୍ମ ପ୍ରାଇଭେଟ ଲିମିଟେଡ଼ କମ୍ପାନୀରୁ ।
ଅଭିଯୋଗ ଅନୁଯାୟୀ, ଉକ୍ତ ଫାର୍ମରେ ସୁରକ୍ଷା କର୍ମୀ ଭାବେ କାମ କରୁଥିବା 2 ଜଣ ମହିଳାଙ୍କୁ କମ୍ପାନୀ ଦାୟିତ୍ବରେ ଥିବା ଟି ଏଚ ସିଂ ଏବଂ ଅନୁରାଗ ମହାନ୍ତି କାମ କରୁଥିବା ସମୟରେ ଦୀର୍ଘ ଦିନ ହେବ ଏମାନଙ୍କୁ ଅଶାଳୀନ ବ୍ୟବହାର କରୁଥିଲେ । ଉଭୟ ମହିଳା ଏହାକୁ ବିରୋଧ କରିବାରୁ ତାଙ୍କୁ ଚାକିରୀରୁ ବାହାର କରି ଦିଆଯାଇଥିଲା । ଗତ ଡିସେମ୍ବର 13 ତାରିଖରେ ଦୁଇ ଜଣ ପୀଡିତା ଏନେଇ ରାସଗୋବିନ୍ଦପୁର ଥାନାରେ ଅଭିଯୋଗ କରିଛନ୍ତି । ରାସଗୋବିନ୍ଦପୁର ଥାନାରେ ଦଫା 341, 354, 506, 34ରେ ମାମଲା ନମ୍ବର 146/2019 ଓ 147/2019 ରୁଜୁ କରାଯାଇଛି । ଘଟଣାରେ ରାସଗୋବିନ୍ଦପୁର ଥାନା ପୋଲିସ ତଦନ୍ତ କରୁଥିବା ବେଳେ ଅଭିଯୋଗ ହୋଇଥିବା 2 ଜଣଙ୍କୁ ଏଯାବତ୍ ଗିରଫ କରିନାହିଁ ।
ସେପଟେ ଘଟଣାକୁ ନେଇ ଉଭୟ ପୀଡିତା ନ୍ୟାୟ ଭିକ୍ଷା କରିଥିବା ବେଳେ ଭେଙ୍କ ରିସର୍ଚ୍ଚ ଏଣ୍ଡ ବ୍ରିଡିଂ ଫାର୍ମ ପ୍ରାଇଭେଟ ଲିମିଟେଡ଼ର ଅଧିକାରୀ ମାନେ ଏସମ୍ପର୍କରେ କୌଣସି ପ୍ରତିକ୍ରିୟା ଦେଇନାହାନ୍ତି ।
ମୟୂରଭଞ୍ଜରୁ ମୃତ୍ୟୁ଼ଞ୍ଜୟ ସେନାପତି, ଇଟିଭି ଭାରତ
