ବାରିପଦା: ମୟୂରଭଞ୍ଜ ଜିଲ୍ଲାରେ ଵିଵାହ ଭୋଜି ଖାଇ ୧୫୦ରୁ ଊର୍ଦ୍ଧ୍ବ ଝାଡାବାନ୍ତିରେ ଆକ୍ରାନ୍ତ ହୋଇଛନ୍ତି । ବାରିପଦା ସହର ଷ୍ଟେସନ ବଜାର ମଣ୍ଡପରେ ଗତକାଲି ରାତିରେ ହୋଇଥିଲା ଵିଵାହ ଭୋଜି । ସମସ୍ତଙ୍କୁ ପିଆରଏମ ମେଡିକାଲ କଲେଜରେ ଭର୍ତ୍ତି କରାଯାଇଛି ।
ମୟୂରଭଞ୍ଜ ଜିଲ୍ଲାରେ ଗତକାଲି ବାରିପଦା ଷ୍ଟେସନ ବଜାରର ମଣ୍ଡପରେ ଝିଅ ବାହାଘର ଭୋଜି ଖାଇବା ପରେ ପେଟବ୍ୟଥା ସହ ବାନ୍ତି ହୋଇଥିଲା । ଫଳରେ ବିଳମ୍ବିତ ରାତିରେ ବାରିପଦା ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜରେ ଭର୍ତ୍ତି କରାଯାଇଥିଲା। ବାରିପଦା ସହର ର ତୁଳସୀ ଚଉରା ଅଞ୍ଚଳରୁ ବରଯାତ୍ରୀ ଆସିଥିଲେ । ତେବେ ଭୋଜିଭାତରେ ଉଭୟ ବରଯାତ୍ରୀ ଏବଂ କନ୍ୟା ଯାତ୍ରୀ ମାଂସ ଭାତ ସହ ବିଭିନ୍ନ ପ୍ରକାରର ଖାଦ୍ୟ ଖାଇଥିଲେ କିନ୍ତୁ କିଛି ସମୟ ପରେ ସେମାନଙ୍କ ମଧ୍ୟରୁ ଅନେକଙ୍କୁ ପେଟ ବ୍ୟଥା ଏବଂ ମୁଣ୍ଡ ବୁଲାଇବାରୁ ମଧ୍ୟରାତ୍ରରେ ଡାକ୍ତରଖାନାରେ ଭର୍ତ୍ତି କରାଯାଇଥିଲା ।
ତେବେ ବୟସ୍କ ବ୍ୟକ୍ତିଙ୍କୁ ପ୍ରାଥମିକ ଚିକିତ୍ସା ପରେ ଘରକୁ ଛାଡି ଦିଆଯାଇଥିବାବେଳେ ୫୦ରୁ ଊର୍ଦ୍ଧ୍ବ ଛୋଟ ଛୁଆ ଏବେ ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ଝାଡ଼ାବାନ୍ତିରେ ଆକ୍ରାନ୍ତ ଥିବା ରୋଗୀଙ୍କ ପାଇଁ ସ୍ବତନ୍ତ୍ର ଭାବେ ଚାରିଜଣିଆ ଡ଼ାକ୍ତରୀ ଟିମ ନିୟୋଜିତ ଥିବାବେଳେ ସମସ୍ତ ରୋଗୀ ଏବେ ବିପଦ ମୁକ୍ତ ଅଛନ୍ତି ବୋଲି ଡ୍ୟୁଟିରେ ଥିବା ଡାକ୍ତର କହିଛନ୍ତି । ତେବେ ବିଜେପି ରାଜ୍ୟସଭାପତି ସମୀର ମହାନ୍ତି ଆକ୍ରାନ୍ତ ରୋଗୀଙ୍କୁ ମେଡିକାଲରେ ଭେଟି ସ୍ବାସ୍ଥ୍ୟବସ୍ଥା ପଚାରି ବୁଝିଥିଲେ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି,ଇଟିଭି ଭାରତ
