ବାରିପଦା: କୋରୋନା ସଂକ୍ରମଣକୁ ରୋକିବା ପାଇଁ ସାରା ଦେଶରେ ଲାଗୁ ହୋଇଛି ଲକଡାଉନ । ଦୋକାନ, ବଜାର ଓ ଛୋଟ ବଡ ବ୍ୟବସାୟ ସବୁଥିରେ ଲାଗିଛି ତାଲା । ଏଥିରୁ ବାଦ ପଡିନି ବିବାହ, ବ୍ରତଘର ଓ ପାର୍ବଣ ଋତୁ । ଲକଡାଉନ ଓ ସଂକ୍ରମଣ ଭୟରେ ଫିକା ପଡିଛି ଖୁସିର ମାହୋଲ । ଏମିତିରେ ଶୁଭୁନି ପାରମ୍ପରିକ ବାଦ୍ୟର ସୁମଧୁର ସ୍ବର । ଲକଡାଉନ ପାଇଁ ଗତ ଦୁଇ ମାସ ହେବ ଏହି ପାରମ୍ପରିକ କଳାରେ ଲାଗିଛି ଲଗାମ ।
ଆଦିବାସୀ ଅଧ୍ୟୁଷିତ ମୟୂରଭଞ୍ଜ ଜିଲ୍ଲାରେ ରୁହନ୍ତି ହଜାର ହଜାର ପାରମ୍ପରିକ ବାଦ୍ୟକାର । ବିବାହ, ବ୍ରତଘର ଓ ପୂଜା ପାର୍ବଣରେ ପାରମ୍ପରିକ ବାଜା ବଜାଇ ପେଟ ପୋଷନ୍ତି ଏମାନେ । ପ୍ରସିଦ୍ଧ ଛଉ ମଧ୍ୟ ଏମାନଙ୍କ ଜୀବିକାର ଏକ ଗୁରୁତ୍ବପୂର୍ଣ୍ଣ ଅଙ୍ଗ କହିଲେ ଭୁଲ ହେବ ନାହିଁ । ହେଲେ ଲକଡାଉନ ପାଇଁ ଗତ ଦୁଇ ମାସ ହେବ ଏମାନଙ୍କ କୌଳିକ ବୃତ୍ତିରେ ଝୁଲିଛି ତାଲା । ବିବାହ, ବ୍ରତଘର ବର୍ତ୍ତମାନ ବନ୍ଦ ଥିବା ବେଳେ ଫିକା ପଡିଛି ପୂଜା ପାର୍ବଣ । ଫଳରେ ରୋଜଗାର ହରାଇ ଏବେ ବିପଦରେ ବାଦ୍ୟକାରଙ୍କ ପରିବାର ।
ସରକାରୀ ସାହାଯ୍ୟ ଆକରରେ ମିଳିଥିବା ଅର୍ଥ ଓ ରାସନ ସାମଗ୍ରୀ ମଧ୍ୟ ସରିବା ଉପରେ । ଏମିତିରେ ବିନା ରୋଜଗାର ଓ ଖାଦ୍ୟାଭାବ ଏବେ ଏମାନଙ୍କ ଚିନ୍ତାର କାରଣ ପାଲଟିଛି । ବିକଳ୍ପ ସ୍ବରୂପ କିଛି ହାତ ତିଆରି ଜିନିଷ ପେଟ ପୋଷିବାକୁ ଚାହୁଁଥିଲେ ବି ବଜାରରେ ଏହି ଜିନିଷର ଚାହିଦା ନଥିବାରୁ ହତାଶ ହୋଇପଡିଛନ୍ତି ହଜାର ହଜାର ବାଦ୍ୟକାର । ଅନ୍ୟପଟେ ବିବାହ, ବ୍ରତଘର ଓ ପୂଜା ପର୍ବ ବନ୍ଦ ହେବାରୁ ଅଗ୍ରୀମ ଆକାରରେ ମିଳିଥିବା ଅର୍ଥ ମଧ୍ୟ ଏବେ ଫେରାଇବାକୁ ପଡିଥିବାରୁ ବର୍ତ୍ତମାନ ମୟୂରଭଞ୍ଜ ଜିଲ୍ଲାର କୋଣ ଅନୁକୋଣରେ ଥିବା ଆଦିବାସୀ ଓ ହରିଜନ ବାଦ୍ୟକାରଙ୍କ ଉପରେ ମାଡି ବସିଛି ବିପଦ ।
ପେଟ ଚାଖଣ୍ଡକ ପାଇଁ ପାରମ୍ପରିକ ବାଦ୍ୟ ଉପରେ ନିର୍ଭରଶୀଳ ଏହି ଗରିବ ଆଦିବାସୀ ବାଦ୍ୟକାର ପରିବାର ଏବେ ଲକଡାଉନ ପାଇଁ ହୋଇପଡିଛନ୍ତି ବେରୋଜଗାର । ସରକାରୀ ସାହାଯ୍ୟ ଏମିତିରେ ସମୂଦ୍ରକୁ ଶଙ୍ଖେ ପରି ଲାଗୁଛି । ଅପେକ୍ଷା କେବେ ଖୋଲିବ ଏହି ଲକଡାଉନ ଓ କେବେ ପୁଣି ସ୍ବାଭାବିକ ହେବ ଏହି ପାରମ୍ପରିକ ବାଦ୍ୟକାରଙ୍କ କୌଳିକ ବୃତ୍ତି । ସେପଟେ ଅଧିକ କିଛି ସାହାଯ୍ୟ ଓ ସ୍ବତନ୍ତ୍ର ଧ୍ୟାନ ପାଇଁ ଦାବି କରିଛନ୍ତି ଏହି ବାଦ୍ୟକାର ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
