ବାରିପଦା: ବକେୟା ବିଦ୍ୟୁତ ବିଲ ଆଦାୟ କରିବାକୁ ଯାଇ ହଟହଟା ହୋଇଛନ୍ତି ବିଦ୍ୟୁତ କର୍ମଚାରୀ । ମୟୂରଭଞ୍ଜ ଜିଲ୍ଲା ଖୁଣ୍ଟା ଥାନା ନାଉପଦା ଗ୍ରାମରେ ବକେୟା ଟଙ୍କା ପୈଠ ନ କରିବାରୁ ଶାନ୍ତନୁ କୁମାର ନାଏକଙ୍କ ଘରେ ବିଜୁଳି କାଟ କରିଥିଲେ ସମ୍ପୃକ୍ତ ବିଦ୍ୟୁତ ବିଭାଗ କର୍ମଚାରୀ । ଏହାପରେ ଗାଁ ଦାଣ୍ଡରେ ବିଜୁଳି ବିଭାଗ କର୍ମଚାରୀଙ୍କୁ ଶାନ୍ତନୁ ନାଏକ ଏବଂ ତାଙ୍କ ପରିବାର ଲୋକେ ନିସ୍ତୁକ ମାଡ ମାରିଥିଲେ । ଯାହାକୁ ନେଇ ବିଦ୍ୟୁତ ବିଭାଗ ପକ୍ଷରୁ ଖୁଣ୍ଟା ଥାନାରେ ଲିଖିତ ଅଭିଯୋଗ କରିଛନ୍ତି ଖୁଣ୍ଟା ବିଦ୍ୟୁତ ଡିଭିଜନର ଏସଡିଓ ।
ହେଲେ ଏହି ଘଟଣାରେ ଏବେ ଭିନ୍ନ ମୋଡ ସାମ୍ନାକୁ ଆସିଛି । କେବଳ ବିଦ୍ୟୁତ କାଟ କରାଯିବାରୁ ଶାନ୍ତନୁଙ୍କ ପରିବାର ଲୋକେ କର୍ମଚାରୀଙ୍କୁ ମାଡ ମାରିନାହାନ୍ତି । ଏହା ପଛରେ ରହିଛି ଅନ୍ୟ ଏକ କାରଣ । ବିଦ୍ୟୁତ ଡିଭିଜନର ଏସଡିଓ ପ୍ରଶାନ୍ତ କୁମାର ମାନ୍ନା, ଭିଜିଲାନ୍ସ ମ୍ୟାନେଜର ଦୀପକ କୁମାର ଦାସ, ଲାଇନ ମ୍ୟାନ୍ ଦୀପ୍ତିକାନ୍ତ ଭୂୟାଁ ଏବଂ ଦୟାନିଧି ମହାନ୍ତ ଶାନ୍ତନୁଙ୍କ ମା’ ହେମଲତାଙ୍କୁ 3 ହଜାର 31 ଟଙ୍କା ବିଦ୍ୟୁତ ବିଲ ବାକି ଥିବା କହିଥିଲେ । ବାକି ଟଙ୍କା ପୈଠ କରିବାକୁ ମଧ୍ୟ କହିଥିଲେ । ହେଲେ ହେମଲତା ଦେଢ ହଜାର ଟଙ୍କା ଦେବାରୁ କର୍ମଚାରୀମାନେ ସେହି ଟଙ୍କା ନେଇ ନଥିଲେ ଏବଂ ବିଜୁଳି କାଟ କରିଥିଲେ ।
ଏହି ସମୟରେ ଘରେ ଏକୁଟିଆ ଥିବା ହେମଲତା ବିଜୁଳି ସଂଯୋଗ କରିବାକୁ କହିଥିଲେ ଯାହାକୁ ନେଇ ଆରମ୍ଭ ହୋଇଥିଲା ଯୁକ୍ତିତର୍କ । ଏହାପରେ ବିଦ୍ୟୁତ ବିଭାଗ କର୍ମଚାରୀମାନେ ହେମଲତାଙ୍କୁ ଠେଲାପେଲା କରିବା ସହିତ ର୍ଦୁବ୍ୟବହାର କରିଥିବା ଅଭିଯୋଗ କରିଛନ୍ତି ହେମଲତା । ଏନେଇ ହେମଲତା ନିଜ ପୁଅ ଏବଂ ପରିବାର ଲୋକଙ୍କୁ ଖବର ଦେବା ପରେ ସେମାନେ ଆସି ଏହାକୁ ବିରୋଧ କରିଥିଲେ । ଯାହାକୁ ନେଇ ବିଦ୍ୟୁତ ବିଭାଗ କର୍ମଚାରୀ ଏବଂ ଶାନ୍ତନୁଙ୍କ ପରିବାର ମଧ୍ୟରେ ହାତାହାତି ହୋଇଥିଲା ।
ତେବେ ଏହି ଘଟଣାରେ ଉଭୟ ପକ୍ଷ ଥାନାରେ ଲିଖିତ ଅଭିଯୋଗ କରିଛନ୍ତି । ପୋଲିସ ତଦନ୍ତ ଜାରି ରଖିଥିବା ବେଳେ ଘଟଣାର ତଦନ୍ତ ପରେ ପଦକ୍ଷେପ ନିଆଯିବ ବୋଲି ପୋଲିସ ଅଧିକାରୀ ସୂଚନା ଦେଇଛନ୍ତି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
