ରାଇରଙ୍ଗପୁର: ମୟୂରଭଞ୍ଜ ଜିଲ୍ଲା କରଞ୍ଜିଆ ଥାନା ଅନ୍ତର୍ଗତ ୫୩ ନମ୍ବର ରାଜ୍ୟ ରାଜପଥ ନିକଟରେ ସଡକ ଦୁର୍ଘଟଣାର ଶିକାର ହୋଇଥିବା BSF ଯବାନଙ୍କ ମୃତ୍ୟୁ ଘଟିଛି । ଶୁକ୍ରବାର କଟକ ବଡ଼ ମେଡ଼ିକାଲରେ ଚିକିତ୍ସାଧୀନ ଅବସ୍ଥାରେ ସେ ଆଖି ବୁଜିଛନ୍ତି । ଏହି ଯବାନ ହେଉଛନ୍ତି ରାମଚନ୍ଦ୍ର ସୋୟ ଏବଂ ସେ ଜମ୍ମୁରେ କାର୍ଯ୍ୟରତ ଥିଲେ । ମେଡିକାଲରୁ ତାଙ୍କର ମରଶରୀର ପୈତୃକ ଗ୍ରାମ ଦୁମ୍ବୀସାହି ନିଆଯାଇ ଗାଁ ଶ୍ମଶାନରେ ରାଷ୍ଟ୍ରୀୟ ସମ୍ମାନ ସହ ଶେଷକୃତ ସମ୍ପନ୍ନ ହୋଇଛି ।
ସୂଚନା ମୁତାବକ, ମୃତ BSF ଯବାନ ରାମଚନ୍ଦ୍ର ଦୁର୍ଗା ପୂଜା ଛୁଟିରେ ଗାଁକୁ ବୁଲିବାକୁ ଆସିଥିଲେ । ଗତ ୫ ତାରିଖ ଦିନ କରଞ୍ଜିଆ ଥାନା ଅନ୍ତର୍ଗତ ୫୩ ନମ୍ବର ରାଜ୍ୟ ରାଜପଥର ହାତୀଦାଣ୍ଡି ଗ୍ରାମଜଙ୍ଗଲ ନିକଟରେ ତାଙ୍କର ବାଇକ ଦୁର୍ଘଟଣା ଘଟିଥିଲା । ଗୁରୁତର ଆହତ ହୋଇ ସେ କଟକ ବଡ଼ ମେଡ଼ିକାଲରେ ଚିକିତ୍ସିତ ହେଉଥିଲେ । ହେଲେ ଗତକାଲି ତାଙ୍କର ମୃତ୍ୟୁ ହୋଇଥିଲା(Jawan Dies In Accident) ।
ଏହାପରେ ଗତକାଲି ବିଳମ୍ବିତ ରାତିରେ ରାମଚନ୍ଦ୍ର ସୋୟଙ୍କ ମରଶରୀର କେରକେରା ଗ୍ରାମ ପଞ୍ଚାୟତ ଦୁମ୍ବିସାହିରେ ପହଞ୍ଚିବା ପରେ କରଞ୍ଜିଆ ପୋଲିସ ପକ୍ଷରୁ ତାଙ୍କୁ ରାଷ୍ଟ୍ରୀୟ ସମ୍ମାନ ଦିଆଯାଇଥିଲା । କରଞ୍ଜିଆ ଥାନା ଅଧିକାରୀ ରଞ୍ଜନ କୁମାର ସେଠୀ ଶେଷ ଦର୍ଶନ କରି ତାଙ୍କୁ ରାଷ୍ଟ୍ରୀୟ ସମ୍ମାନ ଜଣାଇଥିଲେ ।
ଏହାମଧ୍ୟ ପଢନ୍ତୁ: ଆଳିରେ ବେଆଇନ ବାଲି ଚାଲାଣ, କାର୍ଯ୍ୟାନୁଷ୍ଠାନ ଦାବିରେ ଜିଲ୍ଲାପାଳଙ୍କୁ ଭେଟିଲା ବିଜେପି
ସ୍ଥାନୀୟ ସମିତି ସଭ୍ୟ ଜୁଆଲ ମୁଣ୍ଡାଙ୍କ ସହିତ ବହୁ ମାନ୍ୟଗଣ୍ୟ ବ୍ୟକ୍ତି ମଧ୍ୟ ଯବାନଙ୍କ ଶେଷ ଦର୍ଶନ କରିଥିଲେ । ଶେଷରେ ଗାଁ ମଶାଣିରେ ଏକ ଶୋକାକୁଳ ପରିବେଶ ମଧ୍ୟରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି । ମୃତ ଯବାନ ଜମ୍ମୁରେ କାର୍ଯ୍ୟରତ ଥିଲେ । ତାଙ୍କର ସ୍ତ୍ରୀ ଏବଂ ତିନୋଟି ସନ୍ତାନ ଥିବାବେଳେ ସେମାନଙ୍କୁ ସମସ୍ତ ସରକାରୀ ସହାୟତା ପ୍ରଦାନ କରିବା ପାଇଁ ଦାବି କରିଛନ୍ତି ପରିବାର ଲୋକେ ।
ଇଟିଭି ଭାରତ, ରାଇରଙ୍ଗପୁର
