ରାଇରଙ୍ଗପୁର: ଫେକ ଆଇଡି ଖୋଲି ସଂରକ୍ଷଣ ରେଳ ଟିକଟ ବିକ୍ରି ଅଭିଯୋଗରେ ଗତକାଲି ଝାଡଖଣ୍ଡ ଜାମସେଦପୁର ରେଳବାଇ ପୋଲିସ (ଆରପିଏଫ) ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ସହରରେ ଜଣେ ଅଭିଯୁକ୍ତକୁ ଗିରଫ କରିଛି । ଗିରଫ ହୋଇଥିବା ଅଭିଯୁକ୍ତ ଜଣକ ହେଲେ ରାଇରଙ୍ଗପୁର ଟାଉନ ଥାନା ଅଧୀନ ରାଇରଙ୍ଗପୁର ସହରର ମୁଖ୍ୟ ରାସ୍ତାରେ ଥିବା ସ୍ବାମୀ ଜେରକ୍ସର ମାଲିକ ରାହୁଲ ସ୍ବାମୀ ।
ସୂଚନା ଅନୁଯାୟୀ ରାହୁଲ ନିଜ ଘରେ ଖୋଲିଥିବା ଏକ ଦୋକାନ ଗୃହରେ ଅନଲାଇନ ରେଳ ଟିକଟ ବୁକିଂ କରି ବିକ୍ରି କରୁଥିଲେ । ତେବେ ସେ ଫେକ ଆଇଡି ଖୋଲି ରେଳ ଟିକଟକୁ ଚଢା ଦରରେ ବିକ୍ରି କରୁଥିଲେ । ବ୍ୟକ୍ତିଗତ ଭାବେ ସ୍ବତନ୍ତ୍ର ରେଳ ସଂରକ୍ଷଣ ଟିକଟ ବୁକିଂ ପାଇଁ ରେଳ ବିଭାଗ ପକ୍ଷରୁ ଅନୁମତି ନ ଥିବାବେଳେ କୌଣସି ବ୍ୟକ୍ତିଙ୍କ ଆଇଡିକୁ ନେଇ ଟିକଟ ବୁକିଂ କରୁଥିବାର ଏଜେନ୍ସି ନେଇଥିବା ଜଣେ ବ୍ୟକ୍ତି ରେଳ ବିଭାଗରେ ଅଭିଯୋଗ କରିଥିଲେ ।
ଏନେଇ ଗତକାଲି ରାତିରେ ଆରପିଏଫ ଏଏସଆଇ ଜିସି ମଲ୍ଲିକଙ୍କ ନେତୃତ୍ବରେ ଏକ ଦଳ ରାଇରଙ୍ଗପୁର ପହଞ୍ଚି ରାଇରଙ୍ଗପୁର ଟାଉନ ଥାନାର ସହାୟତାରେ ଅଭିଯୁକ୍ତ ରାହୁଲ ସ୍ବାମୀକୁ ଗିରଫ କରି ଟାଟାନଗର ରେଲୱେ ଥାନା ନେଇ ଯାଇଥିବାର ସୂଚନା ମିଳିଛି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
