ରାଇରଙ୍ଗପୁର: ରାଷ୍ଟ୍ରୀୟ ଯୁବ ଦିବସ ଅବସରରେ ପାଞ୍ଚ ଜଣ ରକ୍ତଦାତାଙ୍କୁ ସମ୍ମାନିତ । ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଉପଖଣ୍ଡ ଚିକିତ୍ସାଳୟ ପରିସରରେ ଥିବା ରକ୍ତ ଭଣ୍ଡାରରେ ରକ୍ତଦାତାମାନଙ୍କୁ ନେଇ ଏକ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏଥିରେ ମୁଖ୍ୟ ଅତିଥି ଭାବେ ରାଇରଙ୍ଗପୁର ଉପଜିଲ୍ଲାପାଳ ଧର୍ମାନନ୍ଦ ବେହେରା ଯୋଗଦାନ ଦେଇଥିଲେ । କୋରୋନା ମହାମାରୀ ଯୋଗୁଁ ଲକଡାଉନ ସମୟରେ ପାଞ୍ଚ ଜଣ ରକ୍ତଦାତା ବିଭିନ୍ନ ସମୟରେ ରକ୍ତଦାନ କରିବା ସହିତ ବିଭିନ୍ନ ରକ୍ତଦାନ ଶିବିର ଆୟୋଜନରେ ମୁଖ୍ୟ ଭୂମିକା ଗ୍ରହଣ କରିଥିଲେ ।
ସେମାନଙ୍କ ପ୍ରେରଣାରେ ଅନୁପ୍ରାଣିତ ହୋଇ ଅଞ୍ଚଳର ଯୁବ ଗୋଷ୍ଠୀ ରକ୍ତଦାନ କରି ରାଇରଙ୍ଗପୁର ଡାକ୍ତରଖାନାରେ ରକ୍ତର ଘୋର୍ ଅଭାବକୁ ଦୂର କରିଥିଲେ । ତେବେ ପ୍ରତ୍ୟୁଷ ପରିଡ଼ା, ଗତିକୃଷ୍ଣ ମହାନ୍ତ, ବିଜୟ ରାମ, ଗୋପାଲ ଗୋପ ଓ ବିକାଶ ମହାନ୍ତ ୪୦ ରୁ ୫୦ ଥର ରକ୍ତଦାନ କରିଥିବା ବେଳେ ଉକ୍ତ ପାଞ୍ଚ ଜଣଙ୍କୁ ରାଇରଙ୍ଗପୁର ଉପଜିଲ୍ଲାପାଳ ମାନପତ୍ର ଦେଇ ସମ୍ମାନିତ କରିଥିଲେ ।
