ବାରିପଦା: ବଜ୍ରକାପ୍ତା ଚାଲାଣ ରାକେଟ ମାମଲାରେ ପୁଣି ଆରମ୍ଭ ହୋଇଛି ଛାନଭିନ୍ । ଗତ ଜୁଲାଇ ମାସ 24 ତାରିଖରେ ମୟୂରଭଞ୍ଜ ଜିଲ୍ଲା ମହୁଲଡିହା ଥାନା ଭଦୁଗୁଡା ଛକରେ ବାଇକ ଚୋରି ରାକେଟ ସନ୍ଦେହରେ 4 ଜଣଙ୍କୁ ଗିରଫ କରିଥିଲା ପୋଲିସ । ଏହି ଘଟଣାରେ ସମ୍ପୃକ୍ତ ଥିବା 2 ଅଭିଯୁକ୍ତ ଫେରାର ହୋଇଯାଇଥିଲେ । ଗିରଫ 4 ଜଣ ଅଭିଯୁକ୍ତଙ୍କ ମଧ୍ୟରୁ 2 ଜଣ ମୟୂରଭଞ୍ଜ ଜିଲ୍ଲା କପ୍ତିପଦା ଥାନା ଅଞ୍ଚଳର ହୋଇଥିବା ବେଳେ ଆଉ 2 ଜଣ ଉଦଳା ଓ ବାଲେଶ୍ବର ଜିଲ୍ଲାର ହୋଇଥିବା ଜଣାପଡିଛି ।
ଗିରଫ ପରେ ଏମାନଙ୍କ ନିକଟରୁ 2ଟି ଚୋରା ବାଇକ ସହ ବ୍ୟବହାର କରୁଥିବା ଗୋଟେ କାର ଏବଂ 4ଟି ମୋବାଇଲ ଜବତ କରି ପୋଲିସ ତଦନ୍ତ ଆରମ୍ଭ କରିଥିଲା । ଜବତ ଫୋନରେ ବଜ୍ରକାପ୍ତା ଚୋରା ଚାଲାଣ ସମ୍ପର୍କରେ କିଛି ଗୁପ୍ତ ତଥ୍ୟ ଥିବା ଖବର ପାଇଥିଲା ପୋଲିସ । ଏହାପରେ ଏସ୍ଟିଏଫ୍ ଟିମ୍ କ୍ରାଇମବ୍ରାଞ୍ଚକୁ ଅଧିକ ତଦନ୍ତ ନେଇ ଜଣାଇଥିଲା । ପରେ ମହୁଲଡିହା ପୋଲିସ ମାମଲାରେ ଅଧିକ ତଦନ୍ତ କରିବାକୁ ଗିରଫ 4 ଅଭିଯୁକ୍ତଙ୍କୁ 5 ଦିନିଆ ରିମାଣ୍ଡରେ ଆଣିଥିଲା । 3 ଜଣିଆ ଏସଟିଏଫ୍ ଟିମ ମହୁଲଡିହା ଥାନାରେ ସେମାନଙ୍କୁ ଜେରା କରିଥିଲେ ।
ତେବେ ଆସନ୍ତାକାଲି ସେମାନଙ୍କ ରିମାଣ୍ଡ ଅବଧି ଶେଷ ହେଉଥିବା ବେଳେ ଆଜି ଏସ୍ଟିଏଫ୍ ସେମାନଙ୍କ ବିରୋଧରେ ଆଉ ଏକ ମାମଲା ରୁଜୁ କରି ଅଧିକ ତଦନ୍ତ ପାଇଁ ଭୁବନେଶ୍ବର ଆଣିଛି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
