ରାଇରଙ୍ଗପୁର: ‘ଗଛ କାଟିବାକୁ ଦେବାନି ଜମା, ଗଛ ପରା ଆମ ଜୀବନ ବୀମା’ । ଗଛ କାଟିବା ବନ୍ଦ କରିବା ପାଇଁ ଏପରି ସ୍ଲୋଗାନ ସହ ରାଇରଙ୍ଗପୁର ବ୍ଲକ ଭାଲୁବସା ବିଜୁ ଯୁବ ବାହିନୀ ପକ୍ଷରୁ ଆରମ୍ଭ ହୋଇଛି ସଚେତନାତ୍ମକ କାର୍ଯ୍ୟକ୍ରମ । ବିଭିନ୍ନ ସମୟରେ ସ୍ବେଚ୍ଛାସେବୀ ଭାବେ ସାମାଜିକ ଓ ସଚେତନାତ୍ମକ ଭାବେ କାର୍ଯ୍ୟକ୍ରମ କରି ଚର୍ଚ୍ଚାରେ ରହିଥିବା ବିଜୁ ଯୁବ ବାହିନୀ ଏବେ ବିଭିନ୍ନ ସ୍କୁଲରେ ବୃକ୍ଷରୋପଣ କାର୍ଯ୍ୟକ୍ରମ କରି ପୁଣି ସାଉଁଟିଛି ପ୍ରଶଂସା ।
ଭାଲୁବସା ଗ୍ରାମପଞ୍ଚାୟତ ବିଜୁ ଯୁବ ବାହିନୀ ସ୍ଥାନୀୟ ନାଗଭଣ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ବୃକ୍ଷରୋପଣ କରିବା ସହ ବୃକ୍ଷକୁ ବଞ୍ଚାଇବା ପାଇଁ ପ୍ରୟାସ ଆରମ୍ଭ କରିଛନ୍ତି । ବୃକ୍ଷକୁ ବାଉଁଶ ଓ ଜାଲ ବାଡରେ ଘେରିବା ସହ ବୃକ୍ଷଗୁଡିକୁ ସ୍କୁଲର ଛାତ୍ରଛାତ୍ରୀ ଓ ଯୁବ ବାହିନୀର ସଦସ୍ୟଙ୍କ ନାମ ଦିଆଯାଇଛି । ଯେଉଁ ଛାତ୍ରଛାତ୍ରୀଙ୍କର ନାମ ଯେଉଁ ବୃକ୍ଷକୁ ଦିଆଯାଇଛି ସେହି ବୃକ୍ଷର ରକ୍ଷଣାବେକ୍ଷଣା ଦାୟିତ୍ବ ତାଙ୍କର।
ସ୍କୁଲର ପ୍ରଧାନ ଶିକ୍ଷୟିତ୍ରୀ ମାୟାବତୀ ହେମ୍ବ୍ରମ, ଶିକ୍ଷୟିତ୍ରୀ ସମଲେଶ୍ବରୀ ମହାନ୍ତ, ଦିପ୍ତିମୟୀ ମହାନ୍ତ ଓ ଶିକ୍ଷକ ସୁଧାଂଶୁ ବଳ ନିଜ ନାମରେ ଗଛ ଲଗାଇ ରକ୍ଷଣାବେକ୍ଷଣା ଦାୟିତ୍ବ ନେଇଛନ୍ତି । ଏହି ଅବସରରେ ନାଗଭଣ ଗ୍ରାମର କେତେକ ପୂର୍ବତନ ଶିକ୍ଷକ ଯୋଗ ଦେଇ ବୃକ୍ଷ ରୋପଣ କରିଥିଲେ । ଏଥିସହ ବିଜୁ ଯୁବ ବାହିନୀର ସଭାପତି ସେଖ୍ ସାଦ୍ଦାମ ‘ସବୁଜ ବନାନୀ ସବୁଜ ରାଜ୍ୟ’ ପାଇଁ ଉପସ୍ଥିତ ସଭିଙ୍କୁ ଆହ୍ବାନ ଦେଇଥିଲେ । ତେବେ ଏହି କାର୍ଯ୍ୟକ୍ରମକୁ ସମାପନ କରିଥିଲେ ବିଜୁ ଯୁବ ବାହିନୀ ବ୍ଲକ ସଂଯୋଜକ ସୁରେଶ କୁମାର ବିନ୍ଧାଣି।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
