ରାଇରଙ୍ଗପୁର: ମୟୂରଭଞ୍ଜ ଜିଲ୍ଲା ବାଦାମପାହାଡ଼ ଥାନା ଅନ୍ତର୍ଗତ ଗୋବିନ୍ଦପୁର ଗ୍ରାମ ରାସ୍ତାରେ ଘଟିଥିଲା ଏକ ନୃଶଂସ ହତ୍ୟାକାଣ୍ଡ । ପଶ୍ଚିମବଙ୍ଗ ବାଙ୍କୁଡା ଥାନା ଅଞ୍ଚଳର ରାହୁଲ ବାଉରୀ ନାମକ ଜଣେ ଯୁବକ ଯଶୀପୁର ଧୋବାଡିହା ଠାରେ ରହୁଥିବାବେଳେ ଗାଁଗାଁ ବୁଲି ପାଉଁରୁଟି ବିକ୍ରି କରିଥାନ୍ତି । ତେବେ ଗତ ବୁଧବାର ଦିନ ଗୋବିନ୍ଦପୁର ଗ୍ରାମ ରାସ୍ତାରେ ରକ୍ତ ଜୁଡୁବୁଡୁ ଅବସ୍ଥାରେ ରାହୁଲର ମୃତଦେହ ପଡିଥିବା ଦେଖି ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ । ତଦନ୍ତ ପ୍ରକ୍ରିୟା ଜାରି ରହିଥିବା ବେଳେ ପୋଲିସ ମୃତ ଯୁବକଙ୍କ ପରିଚୟ ପାଇଥିଲେ । ତେବେ ଏହା ବ୍ୟବସାୟୀକ ଶତ୍ରୁତା କାରଣରୁ ହତ୍ୟାକାଣ୍ଡ ହୋଇଥିବା ସନ୍ଦେହ କରି ପୋଲିସ ତଦନ୍ତ ଚଳାଇଥିବାବେଳେ ହତ୍ୟାକାରୀ ମଧ୍ୟ ତାଙ୍କ ଅଞ୍ଚଳର ଜଣେ ବେପାରୀ ବନ୍ଧୁ ବୋଲି ସ୍ପଷ୍ଟ ହୋଇଥିଲା ।
ସାତପଉଟିଆ ଗ୍ରାମରେ ରହୁଥିବା ପଶ୍ଚିମବଙ୍ଗ ବାଙ୍କୁଡା ଥାନା ଅଞ୍ଚଳର ତୈମୁରୁଦ୍ଦିନ ଖାଁ ନାମକ ଜଣେ ଯୁବକ ମଧ୍ୟ ଗାଁ ଗାଁ ବୁଲି ବେପାର କରୁଥିବାବେଳେ ବ୍ୟବସାୟିକ ଶତ୍ରୁତା ଯୋଗୁଁ ସେ ହତ୍ୟାକାଣ୍ଡ ଭିଆଇଥିବା ଜାଣି ପୋଲିସ ତାଙ୍କୁ ଗିରଫ କରିଛି । ରାହୁଲ ବାଉରୀ ପାଉଁରୁଟି ବିକ୍ରି କରିବାରୁ ତୈମୁରୁଦ୍ଦିନ ଖାଁଙ୍କ ବେପାର ମାନ୍ଦା ହୋଇଥିଲା । ଏହାକୁ ନେଇ ଦୁଇ ଜଣଙ୍କ ମଧ୍ୟରେ ଶତ୍ରୁତା ଲାଗି ରହିଥିଲା । ଏଥିରେ ପ୍ରତିଶୋଧ ପରାୟଣ ହୋଇ ତୈମୁରୁଦ୍ଦିନ ଖାଁ ରାହୁଲକୁ ସବୁଦିନ ପାଇଁ ରାସ୍ତାରୁ ହଟେଇବା ନେଇ ଯୋଜନା କରିଥିଲା । ରାହୁଲ ଏକ ବାଇକ ଯୋଗେ ସକାଳୁ ପାଉଁରୁଟି ବିକ୍ରି କରି ଫେରୁଥିବାବେଳେ ଠେଙ୍ଗାରେ ପିଟି ଦେଇଥିଲା ଓ ପଡିଯିବା ପରେ ଏକ ଧାରୁଆ ଅସ୍ତ୍ରରେ ବେକ କାଟି ନୃଶଂସ ଭାବେ ହତ୍ୟା କରିଥିଲା । ପୋଲିସ ଅଭିଯୁକ୍ତ ତୈମୁରୁଦ୍ଦିନ ଖାଁକୁ ଗିରଫ କରିବା ସହ ନାଳରେ ଲୁଚାଇ ରଖିଥିବା ଧାରୁଆ ଅସ୍ତ୍ର ଓ ଠେଙ୍ଗାକୁ ଜବତ କରିଛି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
