ରାଇରଙ୍ଗପୁର: ୧୧ କେ.ଭି ବିଦ୍ୟୁତ ତାର ସଂସ୍ପର୍ଶରେ ଆସି ଜଣେ ଗାଇ ଚରାଳୀ ନାବାଳକର ମୃତ୍ୟୁ ହୋଇଛି । ଏନେଇ ବିଦ୍ୟୁତ ବିଭାଗର ଜେଇ ଓ ଲାଇନ ମ୍ୟାନଙ୍କ ନାମରେ ଥାନାରେ ମାମଲା ରୁଜୁ ହୋଇଛି।
ଗତ ଶନିବାର ମୟୁରଭଞ୍ଜ ଜିଲ୍ଲା ଠାକୁରମୁଣ୍ଡା ବିଦ୍ୟୁତ ବିଭାଗ କାର୍ଯ୍ୟାଳୟ ପାଖ ଖୁଣ୍ଟାପୋଷି ଗ୍ରାମରେ ଥିବା ଏକ ପୋଖରୀ ଆଡି ଉପରେ ୧୧କେଭି ବିଦ୍ୟୁତ୍ ତାର ଖୁଣ୍ଟରୁ ତଳକୁ ଝୁଲି ରହିଥିଲା । ସେହି ବିଦ୍ୟୁତ ତାର ସଂସ୍ପର୍ଶରେ ଆସି ଜଣେ ଗାଇ ଚରାଉଥିବା ନାବାଳକର ମୃତ୍ୟୁ ଘଟିଥିଲା। ଏ ନେଇ କ୍ଷତିପୂରଣ ଦାବିରେ ସ୍ଥାନୀୟ ଲୋକେ ଠାକୁରମୁଣ୍ଡା-ଆନନ୍ଦପୁର ରାସ୍ତା ଅବରୋଧ କରିଥିଲେ। କ୍ଷତିପୂରଣ ମିଳିବା ପରେ ରାସ୍ତା ଅବରୋଧରୁ ହଟିଥିଲେ ସ୍ଥାନୀୟ ଲୋକେ।
ଏହି ଘଟଣାରେ ବାଘମୁଣ୍ଡା ଗ୍ରାମର ମୃତ ନାବାଳକ ସଦା ହୋର ବାପା ଘନଶ୍ୟାମ ହୋ ବିଦ୍ୟୁତ ବିଭାଗର ଅବହେଳା ଯୋଗୁଁ ପୁଅର ମୃତ୍ୟୁ ହୋଇଥିବା ନେଇ କହିଛନ୍ତି । ତେଣୁ ବିଦ୍ୟୁତ ବିଭାଗକୁ ଦାୟୀ କରି ଠାକୁରମୁଣ୍ଡା ଥାନାରେ ବିଦ୍ୟୁତ ବିଭାଗର କନିଷ୍ଠ ଯନ୍ତ୍ରୀ ଓ ଲାଇନ ମ୍ୟାନଙ୍କ ନାମରେ ମାମଲା ରୁଜୁ କରିଛନ୍ତି। ମାମଲା ରୁଜୁ କରିବା ପରେ ଠାକୁରମୁଣ୍ଡା ପୋଲିସ କେସ ନଂ 32/19 ଅନୁଯାୟୀ ଏକ ମାମଲା ରୁଜୁ କରିଛି।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
