ରାଇରଙ୍ଗପୁର: ଦୁଇ ନାବାଳିକାଙ୍କୁ ଅପହରଣ ମାମଲାରେ ରାଇରଙ୍ଗପୁର ଗ୍ରାମାଞ୍ଚଳ ପୋଲିସକୁ ମିଳିଛି ସଫଳତା । ଅପହୃତ ଦୁଇ ଜଣ ନାବାଳିକାଙ୍କୁ ଚେନ୍ନାଇରୁ ଉଦ୍ଧାର କରିବା ସହ ଏଥିରେ ସମୃକ୍ତ ଚାରି ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ ।
ସୂଚନା ଅନୁଯାୟୀ, ମୟୂରଭଞ୍ଜ ରାଇରଙ୍ଗପୁର ଗ୍ରାମାଞ୍ଚଳ ଥାନା ହାଟବାଦଡା ଫାଣ୍ଡି ଅଧିନ ହାଟବାଦଡା ଅଞ୍ଚଳରୁ ଗତ 25 ତାରିଖ ଦିନ ଦୁଇ ଜଣ ସ୍କୁଲ ଫେରନ୍ତା ନାବାଳିକାଙ୍କୁ ଅପହରଣ କରି ନେଇଥିଲେ । ଏହି ଘଟଣାରେ ରାଇରଙ୍ଗପୁର ଗ୍ରାମାଞ୍ଚଳ ପୋଲିସ ଘଟଣାର ଛାନଭିନ ଆରମ୍ଭ କରି ଦୁଇ ଜଣ ନାବାଳିକାଙ୍କୁ ଚେନ୍ନାଇରୁ ଉଦ୍ଧାର କରିଛି । ତାହା ସହ ଘଟଣାରେ ଜଡିତ ଥିବା ସମସ୍ତ ଚାରି ଜଣ ଅଭିଯୁକ୍ତଙ୍କୁ ଗିରଫ ମଧ୍ୟ କରିଛି ।
ତେବେ ଅଭିଯୁକ୍ତଙ୍କ ମଧ୍ୟରେ ଜଣେ ନାବାଳକ ଏବଂ ଅନ୍ୟ ଜଣେ ନାବାଳିକା ଥିବାରୁ ପୋଲିସ ସେ ଦୁହିଁଙ୍କୁ ବାରିପଦା ଜୁଭେନାଇଲ୍ ଜଷ୍ଟିସ ବୋର୍ଡକୁ ପଠାଇଛି । ସେପଟେ ଅନ୍ୟ ଦୁଇ ଜଣ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
