କମ୍ୟୁନିଟି ସେଣ୍ଟରରେ ଭବିଷ୍ୟତ ଗଢ଼ା, 70ରୁ ଉର୍ଦ୍ଧ୍ବ ଛାତ୍ରଛାତ୍ରୀଙ୍କୁ ଶିକ୍ଷାଦାନ କରୁଛନ୍ତି ଆଦିବାସୀ ଯୁବକ

ଛାତ୍ରଙ୍କ ଶିକ୍ଷକ ପାଲଟିଛନ୍ତି ଛାତ୍ର । ଶିକ୍ଷାର ପ୍ରକୃତ ମାନକୁ ବୁଝିଛନ୍ତି ଓ ଏହାକୁ ଆଗେଇ ନେବା ପାଇଁ 70 ରୁ 80 ଛାତ୍ରଛାତ୍ରୀଙ୍କୁ ମାଗଣାରେ ଦେଉଛନ୍ତି ଶିକ୍ଷାଦାନ । ମାଲକାନଗିରି ଜିଲ୍ଲାର ଡଙ୍ଗସଖାଲର ଅଞ୍ଚଳରେ ଏହି ନିଆରା ପଦକ୍ଷେପ ନେଇଛନ୍ତି ତିନି ଆଦିବାସୀ ଯୁବକ ।

ମାଲକାନଗିରି: ଶୃଙ୍ଖଳିତ ଭାବରେ ଚାଲିଛି ପାଠ ପଢା । ପିଲାଏ ବି ମନ ଧ୍ୟାନ ଦେଇ ପାଠ ପଢୁଛନ୍ତି । ଏମିତି ଲାଗୁଛି ଯେମିତି ଏହା କୌଣସି ସ୍କୁଲ କିମ୍ବା ଟ୍ୟୁସନ ସେଣ୍ଟର । ହେଲେ ଆପଣ ଜାଣି ଖୁସି ହେବେ, ଏହି କୁନି ଛାତ୍ରଛାତ୍ରୀଙ୍କ ଶିକ୍ଷକମାନେ ବି ଛାତ୍ର। ମାଲକାନଗିରି ଜିଲ୍ଲାର ଡଙ୍ଗସଖାଲର ଅଞ୍ଚଳରେ ତିନି ଆଦିବାସୀ ଯୁବକ ନେଇଛନ୍ତି ଏହି ନିଆରା ପଦକ୍ଷେପ । କୋରୋନା ଯୋଗୁଁ ସ୍କୁଲ ବନ୍ଦ ଥିବାରୁ ସ୍ବଇଚ୍ଛାରେ ଛାତ୍ରଛାତ୍ରୀଙ୍କୁ ପାଠ ପଢାଇବା ଭାର ମୁଣ୍ଡାଇଛନ୍ତି । ତାହା ବି ସମ୍ପୂର୍ଣ୍ଣ ମାଗଣା । ଉଦ୍ଦେଶ୍ୟ କେବଳ ପିଲାଙ୍କୁ ଶିକ୍ଷିତ କରିବା । ଯୁକ୍ତ ତିନି ବିଜ୍ଞାନ ଶେଷ ବର୍ଷ ଛାତ୍ର ଦୁଲା ବାଞ୍ଜାମି, ଯୁକ୍ତ ଦୁଇର ଦୁଇ ଜଣ ଛାତ୍ର ସୁରେଶ ମାଡକାମୀ ଓ କିଶୋର ମାଡକାମୀ। ନିଜ ପାଠ ପଢା ସାରି ଦୈନିକ 4 ରୁ 5 ଘଣ୍ଟା ପ୍ରଥମରୁ ଅଷ୍ଟମ ଶ୍ରେଣୀ ଛାତ୍ରଛାତ୍ରୀଙ୍କୁ ପାଠ ଶିକ୍ଷାଦାନ କରୁଛନ୍ତି । ଗାଁରେ ଥିବା କମ୍ୟୁନିଟି ସେଣ୍ଟରକୁ ବିଦ୍ୟାଳୟର ରୂପ ଦେଇ ପାଠ ପଢ଼ାଉଥିବା ଦେଖିବାକୁ ମିଳିଛି।

ଯୁବ ସଙ୍ଘଠନ ଟିମ ଉଇ କ୍ୟାନ ପକ୍ଷରୁ ଏହି ଛାତ୍ର ଛାତ୍ରୀଙ୍କୁ ବହି ଓ ଶିକ୍ଷା ଉପକରଣ ଯୋଗାଇବା ସହ ଖେଳିବା ପାଇଁ ମଧ୍ୟ ବିଭିନ୍ନ କ୍ରୀଡା ଉପକରଣ ଯୋଗାଇ ଦିଆଯାଇଛି। ଏଠି ପାଠ ପଢୁଛନ୍ତି ପ୍ରାୟ 70ରୁ 80 ପିଲା। ସଚେତନତା ଅଭାବ ଓ ଅନଲାଇନ ଶିକ୍ଷା ନିମନ୍ତେ ଆର୍ଥିକ ସ୍ଥିତି ଠିକ ନଥିବାରୁ ଅନେକ ଆଦିବାସୀ ପିଲା ଅନଲାଇନ କ୍ଲାସରୁ ବଞ୍ଚିତ ହୋଇଥିଲେ । ଯାହା ଦେଖିବା ପରେ ପିଲାଙ୍କୁ ମାଗଣା ପାଠ ପଢାଇବାକୁ ମନସ୍ଥ କରିଥିଲେ ଏହି 3 ଛାତ୍ର। ମାଲକାନଗିରି ଭଳି ଉପାନ୍ତ ଆଦିବାସୀ ଅଧ୍ୟୁଷିତ ଅଞ୍ଚଳରେ ଏହି ଆଦିବାସୀ ଯୁବକ ଓ ଟିମ ଉଇ କ୍ୟାନ ଙ୍କ ନିଆରା ପଦକ୍ଷେପକୁ ଅଭିଭାବକମାନେ ବେଶ ପ୍ରଶଂସା କରିଛନ୍ତି ।

ମାଲକାନଗିରି ଭଳି ଉପାନ୍ତ ଅଞ୍ଚଳରେ ଏଭଳି ପଦକ୍ଷେପ ସ୍ବାଗତ ଯୋଗ୍ୟ ନିଶ୍ଚୟ । ଯେମତି ଲାଗୁଛି ଶିକ୍ଷାର ପ୍ରକୃତ ମାନ ଏହି ଛାତ୍ରମାନେ ବୁଝି ସଭିଏଁ ପଢନ୍ତୁ, ସଭିଏଁ ବଢନ୍ତୁ ଅଭିଯାନକୁ ପଥ ଖୋଲିଛନ୍ତି ।

ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ