ମାଲକାନଗିରି: ମାଓ ଅଧ୍ୟୁଷିତ ଜିଲ୍ଲା ଭାବେ ପରିଚିତ ଥିବା ମାଲକାନଗିରିରେ ମାଓ ଉପଦ୍ରବ କିମିଛି । ଜିଲ୍ଲାର ଯେଉଁ କିଛି ଗାଁରେ ଲାଲତାଣ୍ଡବର ପ୍ରଭାବ ଥିଲା ତାହା ଆଜି ନାହିଁ କିନ୍ତୁ ବିକାଶ ମଧ୍ୟ ସେଠାରେ ପହଞ୍ଚିନାହିଁ । ଯଥା ପୂର୍ବଂ ତଥା ପର ପରି ମାଓବାଦୀ ଥିବା ସମୟରେ ଏହି ଅଞ୍ଚଳ ଗୁଡିକ ଯେପରି ଥିଲା ଏବେ ମଧ୍ୟ ସେପରି ରହିଛି । ଆମେ କହୁଛୁ ସେହି ମାଓଗଡ କାଲିମେଳା ବ୍ଲକ ବଡିଗେଟା ପଞ୍ଚାୟତର ମାରିଗେଟା ଗାଁ କଥା । ଏହି ଗାଁର ଦୁର୍ଦ୍ଦଶା ଆଖିରେ ନ ଦେଖିଲେ ବିଶ୍ବାସ କରି ହେବନାହିଁ । ସରକାରୀ ବାବୁଙ୍କ ପାଦ ପଡୁନଥିବା ଏହି ଗାଁର ପ୍ରକୃତ ଦୃଶ୍ୟ ଲୋକଲୋଚନକୁ ଆଣିବା ପାଇଁ ଗାଁରେ ପହଞ୍ଚିଥିଲା ଇଟିଭି ଭାରତ ।
ଏଠାରେ ପହଞ୍ଚି ଆମେ ଦେଖିଥିଲୁ ଦୁଃଖ ଓ ଦୁର୍ଦ୍ଦଶାର ଚିତ୍ର। ସ୍ୱାଧୀନତାର ୭୦ ବର୍ଷ ପରେ ମଧ୍ୟ ଏ ଅଞ୍ଚଳକୁ ଯିବା ଲାଗି ଭଲ ରାସ୍ତାଟିଏ ନିର୍ମାଣ ହୋଇ ନାହିଁ। ଜଙ୍ଗଲ ଭିତରେ ଖାଲ ଢିପ ରାସ୍ତା ଦେଇ ଯିବାକୁ ପଡୁଛି ଏହି ଅଞ୍ଚଳକୁ। ଗାଁରେ କୋଠା ଘର ନଥିବାବେଳେ ଛଣଛପର ମାଟି ଘରେ ଜୀବନ ବିତୁଛି । ଭଲ ପିଇବା ପାଣି ବୁନ୍ଦାଏ ମଧ୍ୟ ମିଳୁନାହିଁ । ଶିକ୍ଷା ଓ ସ୍ବାସ୍ଥ୍ୟ କଥା ନକହିବା ଭଲ । ବଡିଗେଟା ପଞ୍ଚାୟତର 15ଟି ଗାଁ ମଧ୍ୟରୁ ଜଣେ ମାତ୍ର ମାଟ୍ରିକ ପାସ କରିଥିବା ତାହା ସ୍ପଷ୍ଟ କରୁଛି । ଗୋଟିଏ ଉଚ୍ଚବିଦ୍ୟାଳୟ ଥିବାବେଳେ ସେଠାରେ ଶିକ୍ଷକ ନଥିବାରୁ ପିଲାମାନେ ସଠିକ୍ ଶିକ୍ଷା ପାଉନାହାନ୍ତି ।
ସେପଟେ ଲୋକଙ୍କୁ ରୋଗ ବ୍ୟାଧି ହେଲେ ସେମାନେ ଡାକ୍ତରଖାନା ଯିବା ପରିବର୍ତ୍ତେ ଦିଶାରି ପାଖକୁ ଯାଉଛନ୍ତି । ଶିକ୍ଷାର ଅଭାବ ଯୋଗୁଁ ଏମାନେ ହାଟ ବଜାରକୁ ଯାଇ ପାରୁନଥିବା ବେଳେ ଗାଁରେ ଫେରିୱାଲା ପହଞ୍ଚିଲେ ସେଠାରେ ଭିଡ ଜମାଉଛନ୍ତି । ଆଉ ଚଢା ଦରରେ ଗାଁର ଝିଅ ବୋହୁ ଚୁଡି ବିନ୍ଦି ଭଳି ନିଜ ନିଜ ଦରକାରୀ ଜିନିଷ ସବୁ ପାଇ ଖୁସି ହେଉଛନ୍ତି ।
ତେବେ ଏଭଳି ନାନା ସମସ୍ୟା ଥିବା ଲୋକଙ୍କ ପାଖରେ ଯଦି ସରକାର ସବୁ ସୁବିଧା ସୁଯୋଗ ଯୋଗାଇଦେବେ ତାହେଲେ ଲୋକମାନେ ଏଠାରେ ଭୋଟ ଦେବେ ବୋଲି କହିଛନ୍ତି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
