ମାଲକାନଗିରି : ମାଲକାନଗିରି ଜିଲ୍ଲା ସ୍ବାଭିମାନ ଅଞ୍ଚଳର ପଣସପୁଟ ପଞ୍ଚାୟତ ଡଙ୍ଗରପଦର ଘାଟିରେ ଅଘଟଣ । ଏହି ଘାଟି ଦେଇ ଏକ ପିକଅପ୍ ଭ୍ୟାନ ଯାଉଥିବାବେଳେ ଭାରସାମ୍ୟ ହରାଇ ଓଲଟି ପଡ଼ିଛି । ଫଳରେ ଭ୍ୟାନରେ ବସିଥିବା ୩୦ ଜଣ ଆହତ ହୋଇଛନ୍ତି । ଏମାନଙ୍କ ମଧ୍ୟରୁ ୩ଜଣ ଗୁରୁତର ଭାବେ ଆହତ ହୋଇଛନ୍ତି ।
ସୂଚନାନୁସାରେ ଉକ୍ତ ପିକଅପ୍ ଭ୍ୟାନଟି କୋରକୁଣ୍ଡା ବ୍ଲକ ତାରଲାକୋଟା ପଞ୍ଚାୟତ ରଙ୍ଗମାଟିଗୁଡାରୁ ଲୋକଙ୍କୁ ନେଇ ଯାଉଥିଲା । ସମସ୍ତ ଯାତ୍ରୀ ସ୍ବାଭିମାନ ଅଞ୍ଚଳ ପଣସପୁଟ ପଞ୍ଚାୟତ ସିଙ୍ଗୋଇ ଗ୍ରାମକୁ ବାହାଘର ପାଇଁ ଝିଅ ଡାକରା ପାଇଁ ଯାଉଥିବା ସମୟରେ ଡଙ୍ଗରପଦର ଘାଟିରେ ଗାଡିଟି ଭାରସାମ୍ଯ ହରାଇ ଓଲଟି ପଡ଼ିଥିଲା ।
ଗାଡ଼ିରେ ୩୦ଜଣ ଯାତ୍ରୀ ଥିଲେ । ସମସ୍ତ ଆହତଙ୍କୁ ଛିତ୍ରକୁଣ୍ଡା ହସପିଟାଲରେ ଭର୍ତ୍ତି କରାଯାଇଥିବା ବେଳେ ଗୁରୁତର ୩ଜଣଙ୍କୁ ମାଲକାନଗିରି ଜିଲ୍ଲା ହସପିଟାଲକୁ ପଠାଯାଇଛି ।
ମାଲକାନଗିରିରୁ ପଞ୍ଚାନନ ଦାଶ, ଇଟିଭି ଭାରତ
