ମାଲକାନଗିରି: ସାରା ଦେଶରେ ଏବେ ଟିକ୍ ଟକ୍ ଓ ଫେସବୁକ୍ ପରି ଅନେକ ସୋସିଆଲ ମିଡିଆ ଯୁବପିଢୀଙ୍କ ଉପରେ ନିଶା ଘାରିଥିବା ବେଳେ ଏହାର କୁପ୍ରଭାବ ଦେଖିବାକୁ ମିଳିଛି ଉପାନ୍ତ ମାଲକାନଗିରି ଜିଲ୍ଲାରେ । ଜିଲ୍ଲା ସଦର ଚିକିତ୍ସାଳୟର ଏସଏନସିୟୁ ପରି ଏକ ଗୁରୁତ୍ବପୂର୍ଣ୍ଣ ବିଭାଗରେ ନର୍ସ ମାନେ ଗୁରୁତର ଶିଶୁଙ୍କ ଚିକିତ୍ସା ଛାଡି ଟିକ୍ ଟକ୍ ଭିଡିଓ କରୁଥିବା ଏକ ଦୃଶ୍ୟ ଏବେ ସାମନାକୁ ଆସିଛି । ସୋସିଆଲ ମିଡିଆରେ ଏହା ଭାଇରାଲ ହେବା ପରେ ଏବେ ନିଜର ନବଜାତ ଶିଶୁଙ୍କୁ ଧରି ମାଲକାନଗିରି ମେଡିକାଲକୁ ଯିବା ଲାଗି ଭୟ କରୁଛନ୍ତି ଅନେକ ଅଭିଭାବକ ।
ଟିକିଏ ଭଲ କରି ଦେଖନ୍ତୁ ଏହି ଭିଡିଓ କ୍ଲିପ ଗୁଡିକୁ । ସୋସିଆଲ ମିଡିଆ ଟିକ୍ ଟକ୍ ରେ ଅପଲୋଡ ହୋଇଥିବା ଏହି ଭିଡିଓ ଗୁଡିକ କୌଣସି ମଡେଲଙ୍କର ନୁହେଁ କି ଏହା କେଉ ଫିଲ୍ମର ସିନ ନୁହେଁ । ଏହା ହେଉଛି ଉପାନ୍ତ ମାଲକାନଗିରି ଜିଲ୍ଲା ସଦର ଚିକିତ୍ସାଳୟର ଦୃଶ୍ୟ । ଚିକିତ୍ସାଳୟର SNCU ପରି ଏକ ଗୁରୁତ୍ବପୁର୍ଣ୍ଣ ବିଭାଗରେ ନର୍ସ ମାନେ ଗୁରୁତର ଶିଶୁଙ୍କ ଚିକିତ୍ସା ଛାଡି ଟିକ୍ ଟକ୍ ଭିଡିଓ ଉତ୍ତୋଳନ କରୁଥିବା ସାମ୍ନାକୁ ଆସିଛି । ଏହି ରୁମ ଭିତରେ ୩ ଜଣ ନର୍ସ ଭିଡିଓ କରି ଟିକ୍ ଟକରେ ସେୟାର କରିବା ପରେ ପୁରା ଭାଇରାଲ ହୋଇଛି । ଯାହାକୁ ନେଇ ସାଧାରଣ ଲୋକ ତୀବ୍ର ଅସନ୍ତୋଷ ଜାହିର କରିଛନ୍ତି ।
ଟିକ୍ ଟକ୍ ଭିଡିଓରେ ମଡେଲିଂ କରୁଥିବା ଏହି ୩ ଜଣ ନର୍ସ ହେଉଛନ୍ତି ଜିଲ୍ଲା ସଦର ଚିକିତ୍ସାଳୟର ନନ୍ଦିନୀ ରାୟ, ରୁବି ରାୟ ଓ ତାପସି ବିଶ୍ବାସ । ତେବେ ଯେଉଁ କୋଠରି ଭିତରେ ନବଜାତ ଶିଶୁ ମାନେ ଜୀବନ ମରଣ ସହ ସଂଗ୍ରାମ କରୁଛନ୍ତି, ତା ଭିତରେ ସିରିଅସ୍ ଶିଶୁଙ୍କୁ ବି ଛାଡିନାହାଁନ୍ତି । ଏ ଦୃଶ୍ୟକୁ ବି ଟିକିଏ ଭଲ କରି ଦେଖନ୍ତୁ, ଜଣେ ନର୍ସ ଗୋଟିଏ ଶିଶୁକୁ ହାତରେ ଧରି ମାତିଛନ୍ତି ଟିକ୍ ଟକ ଭିଡିଓରେ । ଅନ୍ୟପଟେ ଏ ଘଟଣାରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି କହିଛନ୍ତି ସିଡିଏମଓ ।
ଡାକ୍ତରଖାନାକୁ ଭଗବାନଙ୍କ ଆଉ ଏକ ମନ୍ଦିର ବୋଲି ଲୋକେ ଭାବନ୍ତି । ହେଲେ ଯେଉଁଠି ଲୋକେ ଜୀବନ ବଞ୍ଚାଇବା ପାଇଁ ଯାଉଛନ୍ତି ସେଠାକାର ସ୍ବାସ୍ଥ୍ୟ କର୍ମଚାରୀଙ୍କ ଆଚରଣ ଯଦି ଏପରି ହେବ, ଲୋକେ କାହା ଉପରେ ଭରସା କରିବେ ତାକୁ ନେଇ ସୃଷ୍ଟି ହୋଇଛି ବଡ ପ୍ରଶ୍ନ...
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
