ମାଲକାନଗିରି: ଗୁରୁବାର ପୋଲିସ ଓ ମାଓବାଦୀ ମଧ୍ୟରେ ହୋଇଥିବା ଗୁଳିବିନିମୟର ହୋଇଛି ଖୁଲାସା । ମାଲକାନଗିରି ଜିଲ୍ଲା ମୁଦୁଲିପଡା ଥାନା ଅନ୍ତର୍ଗତ ଗୟିଗୁଡା ଜଙ୍ଗଲରେ ପୋଲିସ ଓ ନକ୍ସଲ ପନ୍ଥୀଙ୍କ ମଧ୍ୟରେ ଗୁଳି ବିନିମୟର ହୋଇଥିଲା । ଯାହାର ଖୁଲାସା କରିଛନ୍ତି କରିଛନ୍ତି ଦକ୍ଷିଣ ପଶ୍ଚିମାଞ୍ଚଳ ଡି.ଆଇ.ଜି ସଫିନ ଅହମ୍ମଦ କେ ।
ଗତ ଏକ ସପ୍ତାହ ଧରି ନକ୍ସଲ ସଂଗଠନର ୨୨ ଜଣ ସଦସ୍ୟ ବଣ୍ଡା ଘାଟିରେ ମାଓ କ୍ୟାମ୍ପ କରି ସରକାରଙ୍କ ଉନ୍ନୟନ ମୂଳକ କାର୍ଯ୍ୟରେ ବାଧା ସୃଷ୍ଟି କରୁଥିଲେ । ପୋଲିସର ଗୁଇନ୍ଦା ବିଭାଗକୁ ଏହି ସୂଚନା ମିଳିବା ପରେ ମାଲକାନଗିରି ଏସ.ପି. ରିଷିକେଶ ଖିଲାରୀ ଓ ଏସ.ଡି.ପି.ଓ ପ୍ରହଲ୍ଲାଦ ମିନାଙ୍କ ନେତୃତରେ ଡିବିଏଫ, ଏସଓଜି ଓ ବି.ଏସ.ଏଫ ବାହିନୀର ମିଳିତ ଅପରେସନ ଆରମ୍ଭ କରାଯାଇଥିଲା । ସୁରକ୍ଷା କର୍ମୀଙ୍କୁ ଦେଖି ମାଓବାଦୀମାନେ ପ୍ରଥମେ ଗୁଳି ଚାଳନା କରିଥିଲେ ପରେ ଜବାବରେ ଯବାନ ମାନେ ପାଲଟା ଆକ୍ରମଣ କରିଥିଲେ ।
ଯବାନଙ୍କ ଆଖିବୁଜା ଗୁଳି ଚାଳନା ଯୋଗୁଁ ମାଓବାଦୀମାନେ ଘଟଣାସ୍ଥଳ ଛାଡି ପଳାୟନ କରିଥିଲେ । ହେଲେ ଘଟଣାସ୍ଥଳରେ ପୋଲିସ ତଲାସୀ ଆରମ୍ଭ କରିବାରୁ ନକ୍ସଲ ପନ୍ଥୀଙ୍କ ୨୨ ଟି କିଟ୍ ବ୍ୟାଗ ସହ ବହୁ ପରିମାଣର ବିସ୍ଫୋରକ ସାମଗ୍ରୀ ଜବତ କରିଛି । ଯାହା ମଧ୍ୟରେ ଏ.କେ-୪୭ ବନ୍ଧୁକର ଗୁଳି, ଡିଟୋନିଟର, ଗନ ପାଉଡର, ଗ୍ରେନେଡ, ଲ୍ୟାଣ୍ଡମାଇନ, ମୋବାଇଲ ଫୋନ ଓ ନକ୍ସଲ ପ୍ରଚାର ପତ୍ର ରହିଛି । ନକ୍ସଲ ପନ୍ଥୀଙ୍କୁ ଧରିବା ଲାଗି ବଣ୍ଡା ଘାଟିରେ ବର୍ତ୍ତମାନ ସୁଦ୍ଧା କୁମ୍ବିଂ ଅପରେସନ ଚାଲିଥିବା ଡି.ଆଇ.ଜି ସଫିନ ଅହମ୍ମଦ କେ କହିଛନ୍ତି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
