ମାଲକାନଗିରି: ଜଣେ କି ଦୁଇ ଜଣ ନୁହେଁ ଗାଁର ଅଧିକାଂଶ ଘରେ କିଡନୀ ରୋଗୀ । ହେଲେ ଅର୍ଥ ଅଭାବରୁ ହୋଇପାରୁନି ଆବଶ୍ୟକୀୟ ଚିକିତ୍ସା । ଗାଁର ପିଲା ଠାରୁ ବୁଢା ପର୍ଯ୍ୟନ୍ତ ଅନେକ ଲୋକ କିଡନୀ ରୋଗରେ ପ୍ରାଣ ହରାଇବା ପରେ ଶେଷରେ ନିରୁପାୟ ହୋଇ ଗୁଣି ଗାରିଡିକୁ ଶେଷ ରାସ୍ତା ଭାବରେ ବାଛି ନେଇଛନ୍ତି ।
ଦେଖନ୍ତୁ ଏହି ଦୃଶ୍ୟ... କିଭଳି ଜଣେ ଆଦିବାସୀ ମହିଳାଙ୍କୁ ରୋଗ ମୁକ୍ତ କରିବା ପାଇଁ ଗୁଣିଆ ଝଡାଫୁଙ୍କା କରୁଛନ୍ତି । ରୋଗୀଙ୍କ ସାମ୍ନାରେ ମୁଠାଏ ଅରୁଆ ଚାଉଳ ପକାଇ ଦେବୀଙ୍କ ଆରାଧନା କରୁଛନ୍ତି । ଏ ହେଲେ ମାଲକାନଗିରି ଜିଲ୍ଲା ଜାମୁଗୁଡା ଗ୍ରାମର ରାମେ କବାସି । ଦିର୍ଘ ବର୍ଷ ଧରି କିଡିନୀ ରୋଗରେ ପିଡିତ ଅଛନ୍ତି ସେ । ହେଲେ ଚିକିତ୍ସା ଲାଗି ଅର୍ଥ ନଥିବାରୁ ଏଭଳି ରାସ୍ତା ବାଛିଛନ୍ତି ସେ ।
ତେବେ କେବଳ ରାମେ ନୁହନ୍ତି ବରଂ ତାଙ୍କ ପରି ଗାଁର ଅନେକ ଲୋକ କିଡନୀ ରୋଗରେ ପିଡିତ ଅଛନ୍ତି । ହେଲେ ସରକାରୀ ଡାକ୍ତରଖାନାରେ ସେମାନଙ୍କର ଚିକିତ୍ସା ହୋଇପାରୁନାହିଁ । ବାହାରେ ଯାଇ ଚିକିତ୍ସା କରିବା ପାଇଁ ମଧ୍ୟ ସେମାନଙ୍କ ପାଖରେ ଆବଶ୍ୟକୀୟ ଅର୍ଥ ନାହିଁ । ତେଣୁ ଗାଁର ଦିଶାରୀ ଉପରେ ଭରସା କରି ଗୁଣି ଗାରିଡିର ଆଶ୍ରୟ ନେଉଛନ୍ତି ସେମାନେ ।
ତେବେ ଏହି ରୋଗ ପଛରେ ମଧ୍ୟ ମୁଖ୍ୟ ଏକ କାରଣ ସାଜିଛି ପିଇବା ପାଣି । ଗାଁରେ ପିଇବା ପାଣି ଲାଗି ସ୍କୁଲ ପରିସରରେ ରହିଛି ଏକ ମାତ୍ର ନଳକୂପ । ହେଲେ ସେଥିରୁ ଖାଲି ନାଲି ରଙ୍ଗର ପାଣି ବାହାରୁଛି । ଲୋକମାନେ ମଧ୍ୟ ଏହାକୁ ବିଷୋଧନ ନକରି ପିଉଛନ୍ତି । ଏହି ପାଣି ପିଇଲେ କାହାର ହାତ ଗୋଡ ଫୁଲି ଯାଉଛି ତ ଆଉ କିଏ ଜ୍ବରରେ ଆକ୍ରାନ୍ତ ହୋଇ ଶଯ୍ୟାରେ ପଡୁଛନ୍ତି । ଗ୍ରାମରେ ବର୍ଷେ ମଧ୍ୟରେ ୩୦ରୁ ଊର୍ଦ୍ଧ୍ବ ଲୋକେ କିଡନୀ ରୋଗରେ ପ୍ରାଣ ହରାଇଛନ୍ତି । ତଥାପି ଏଥି ପ୍ରତି କାହାରି ଦୃଷ୍ଟି ପଡୁନି । ସେପଟେ ଗାଁକୁ ଯିବା ଲାଗି ଭଲ ରାସ୍ତା ନଥିବା ହେତୁ ସ୍ବାସ୍ଥ୍ୟ କର୍ମୀ ମଧ୍ୟ କେବେ କେମିତି ଆସିନ୍ତି । ତେବେ ଏଥି ପ୍ରତି ସରକାର ଦୃଷ୍ଟି ନଦେଲେ ଆଦିବାସି ମହାସଂଘ ଆନ୍ଦୋଳନ କରିବ ବୋଲି ସଭାପତି ଘନଶ୍ୟାମ ମାଡକାମି କହିଛନ୍ତି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
