ମାଲକାନଗିରି: ଜିଲ୍ଲାର ଚିତ୍ରକୋଣ୍ଡା ସ୍ଵାଭିମାନ ଅଞ୍ଚଳରେ ଆଦିବାସୀ ଓ ମାଓବାଦୀଙ୍କ ମଧ୍ୟରେ ସଂଘର୍ଷ ହେବା ପରେ ସେଠାରେ ପରିସ୍ଥିତି ଉତ୍ତେଜନା ପୂର୍ଣ୍ଣ ରହିଛି । ନକ୍ସଲ ମାନେ ନିଆଁ ଲଗାଇ ଆଦିବାସୀଙ୍କ ଘର ଦ୍ବାର ଓ ମୋଟର ସାଇକେଲ ଜାଳି ଦେବା ପରେ ଲୋକଙ୍କୁ ଏବେ ସୁରକ୍ଷା ଦେଉଛି ପୋଲିସ । ଜିଲ୍ଲାପାଳ ଓ ଏସପି ଘଟଣା ସ୍ଥଳରେ ପହଞ୍ଚି ଘର ନଷ୍ଟ ହୋଇଥିବା ଲୋକଙ୍କୁ ୩୦ ହଜାର ଟଙ୍କାର ଆର୍ଥିକ ସହାୟତା ପ୍ରଦାନ କରିବା ସହ ଯୁଦ୍ଧ କାଳିନ ଭିତ୍ତିରେ ସମସ୍ତ ସରକାରୀ ସୁବିଧା ଯୋଗାଇ ଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି । ଆଉ ଏହି ସମୟରେ ଗ୍ରାଉଣ୍ଡରେ ପହଞ୍ଚିଥିଲା ଆମ ଟିମ ।
ମାଲକାନଗିରି ଇତିହାସରେ ପ୍ରଥମ । ମାଓବାଦୀଙ୍କୁ ସ୍ବାଭିମାନ ଅଞ୍ଚଳବାସୀଙ୍କ କଡା ଜବାବ। ଘର ଭିତରେ ଲୁଚି ନବସି, ମାଓବାଦୀଙ୍କ ନାଲିଆଖିକୁ ବେଖାତିର କରି, ରବିବାର ଲାଲବାହିନୀଙ୍କୁ ପାନେ ଦେଇଥିଲେ ଆଦିବାସୀ । ଯାହା ଫଳରେ ଜଣେ ହାର୍ଡକୋର ନକ୍ସଲ ପ୍ରାଣ ହରାଇଥିବାବେଳେ ଅନ୍ୟ ଜଣକୁ କାବୁ କରି ପୋଲିସରେ ଜିମା ଦେଇଥିଲେ ଗାଁ ଲୋକେ । ଘଟଣା ପରେ ଗତକାଲି ଯୋଡାମ୍ବ ଗାଁରେ ମାଓବାଦୀ ମାନେ ବ୍ୟାପକ ପୋଡାଜଳା କରିଥିଲେ । ସେପଟେ କ୍ଷତିଗ୍ରସ୍ତଙ୍କୁ ୩୦ ହଜାର ଟଙ୍କାର ଆର୍ଥିକ ସହାୟତା ପ୍ରଦାନ କରାଯାଇଛି। ରିଲିଫ କ୍ୟାମ୍ପରେ ଲୋକଙ୍କୁ ଜିଲ୍ଲା ପ୍ରଶାସନ ତରଫରୁ ରନ୍ଧା ଖାଦ୍ୟ ଦିଆଯାଉଛି । ଯେବେ ଯାଏଁ ପରିସ୍ଥିତି ନିୟନ୍ତ୍ରଣ ନ ହୋଇଛି ସେତେ ଦିନ କ୍ଷତିଗ୍ରସ୍ତ ରିଲିଫ କ୍ୟାମ୍ପରେ ରହିବେ ବୋଲି ଜିଲ୍ଲାପାଳ କହିଛନ୍ତି ।
ପୋଲିସ ଛାଉଣିରେ ସମଗ୍ର ସ୍ବାଭିମାନ ଅଞ୍ଚଳ । ମାଓବାଦୀଙ୍କ ମୂଳୋତ୍ପାଟନ ପାଇଁ ବିଏସଏଫ , ଏସଓଜି ଓ ଡିଭିଏଫ ମିଳିତ କୁମ୍ବିଂ ଅପରେସନ ଆରମ୍ଭ କରିଛନ୍ତି । ସରକାରଙ୍କ ଉନ୍ନୟନ ମୂଳକ କାର୍ଯ୍ୟକୁ ବିରୋଧ କରୁଥିବା ଲାଲବାହିନୀକୁ କଡା ଜବାବ୍ ଦେବା ପାଇଁ ସ୍ବାଭିମାନ ଅଞ୍ଚଳରେ ଅଣ୍ଟା ଭିଡିଛନ୍ତି ଯବାନ । ଦୀର୍ଘ ୬ ଦଶନ୍ଧି ପରେ ଏଭଳି କିଛି ଅଲଗା ଚିତ୍ର ଦେଖିବାକୁ ମିଳିଛି ଚିତ୍ରକୋଣ୍ଡା ସ୍ବାଭିମାନ ଅଞ୍ଚଳରେ ।
ଡରକୁ ଦେଖି ଅନ୍ଧାର ମୂଲକରେ ଜିଉଁଥିବା ବିଚ୍ଛିନ୍ନାଞ୍ଚଳର ନିରୀହ ଆଦିବାସୀ, ଅଞ୍ଚଳର ବିକାଶ ପାଇଁ ମାଓବାଦୀଙ୍କୁ ଘୋର ବିରୋଧ ସମୟରେ ମାଓ ଆକ୍ରୋଶର ଶିକାର ହୋଇଛନ୍ତି ସତ ହେଲେ ଭାଙ୍ଗିନି ଦମ୍ଭ । ଆଉ ଏଭଳି ପରିସ୍ଥିତିରେ ଆଦିବାସିଙ୍କୁ ସହାୟତା କରିବା ପାଇଁ ଆଗେଇ ଆସିଛି ଜିଲ୍ଲା ପ୍ରଶାସନ ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
