ମାଲକାନଗିରି: ଦାରିଦ୍ରତା କାରଣରୁ ମା'ଛୁଆ ଆତ୍ମହତ୍ୟା ଘଟଣା । ଆତ୍ମହତ୍ୟା କରିଥିବା ସୀତା ମାଡକାମଙ୍କ ପରିବାରଙ୍କୁ ବୁଧବାର ସାକ୍ଷାତ କରିଛନ୍ତି ଜିଲ୍ଲାପାଳ ମନୀଷ ଅଗ୍ରୱାଲ। ଏହା ପୂର୍ବରୁ ମାଲକାନଗିରି ବିଡିଓ ଗୋରେଇଗୁଡ଼ା ଗାଁକୁ ଯାଇ ଘଟଣାର ତଦନ୍ତ କରିଥିଲେ ।
ଜିଲ୍ଲା ସଦର ଚିକିତ୍ସାଳୟକୁ ଯାଇ ଦୁଇ ଗୁରୁତର ପିଲାଙ୍କ ସ୍ବାସ୍ଥ୍ୟାବସ୍ଥା ପଚାରି ବୁଝିଛନ୍ତି ଜିଲ୍ଲାପାଳ । ସରକାରଙ୍କ ନିୟମ ଅନୁଯାୟୀ ମୃତକଙ୍କ ପରିବାରକୁ ରେଡ କ୍ରସ ତରଫରୁ ୧୦ ହଜାର ଟଙ୍କା ଦିଆଯାଇଛି । ଏଥିସହ ଅନାଥ ପିଲାଙ୍କ ଲାଗି ମାସିକ ୨ ହଜାର ଟଙ୍କା ଆର୍ଥିକ ସହାୟତା, ବୁଢା ଜେଜ ବାପାଙ୍କ ଲାଗି ଭତ୍ତା ଓ ଜାତୀୟ ପରିବାର କଲ୍ୟାଣ ଯୋଜନାରେ ଏମାନଙ୍କୁ ସାମିଲ କରାଯାଇ ସମସ୍ତ ପ୍ରକାର ସହାୟତା କରାଯିବ ବୋଲି ଜିଲ୍ଲାପାଳ କହିଛନ୍ତି।
ତେବେ ଗତ ଜୁନ 30ରେ, ମାଲକାନଗିରି ସଦର ବ୍ଲକ ଅନ୍ତର୍ଗତ ଗୌଡଗୁଡା ପଞ୍ଚାୟତର ଗୋରେଇଗୁଡା ଗାଁର ସୀତା ମାଡକାମି ନିଜର ଦୁଇ ସନ୍ତାନଙ୍କୁ ବିଷ ଦେବା ସହ ନିଜେ ବିଷ ପିଇ ଆତ୍ମହତ୍ୟା ଉଦ୍ୟମ କରିଥିଲେ । ସ୍ବାମୀଙ୍କ ମୃତ୍ୟୁ ପରେ ଅଭାବ ଅନଟନ ସହି ନ ପାରି ନିଜେ ଓ ନିଜ ଦୁଇ ପିଲାଙ୍କୁ ବିଷ ପିଆଇଥିଲେ । ଯେଉଁଥିରେ ସୀତା ମାଡକାମିଙ୍କ ମୃତ୍ୟୁ ହୋଇଥିବା ବେଳେ 2 ଦୁଇ ଶିଶୁ ଗୁରୁତର ଅବସ୍ଥାରେ ଚିକିତ୍ସା ହେଉଛନ୍ତି । ଯାହା ସାରା ରାଜ୍ୟରେ ଆଲୋଡନର ବିଷୟ ପାଲଟିଥିଲା ।
ଏହି ପ୍ରସଙ୍ଗ ନେଇ ବିଧାନସଭାରେ ବିରୋଧି ଦଳ ସରକାରଙ୍କୁ ଘେରିଥିବାବେଳେ ଏହାର ତଦନ୍ତ ନିର୍ଦ୍ଦେଶ ଦେଇଛନ୍ତି ବାଚସ୍ପତି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
