ମାଲକାନଗିରି: ଏପର୍ଯ୍ୟନ୍ତ ସୁସ୍ଥ ହୋଇପାରୁନାହାନ୍ତି ଦୁଇ ଶିଶୁ । ଗତ ରବିବାର ଗୌଡଗୁଡାର ସୀତା ମାଡକାମୀଙ୍କ ଆତ୍ମହତ୍ୟା ଓ ଦୁଇ ଶିଶୁଙ୍କୁ ହତ୍ୟା ଉଦ୍ୟମ ଘଟଣାରେ ମାଆ ସୀତା ମାଡକାମୀଙ୍କ ମୃତ୍ୟୁ ଘଟିଥିବା ବେଳେ ଏପର୍ଯ୍ୟନ୍ତ ସମ୍ପୂର୍ଣ୍ଣ ରୂପେ ସୁସ୍ଥ ହୋଇ ପାରୁନାହାନ୍ତି ଦୁଇ ଶିଶୁ । ତେଣୁ ଆହୁରି 48 ଘଣ୍ଟା ସେମାନଙ୍କ ସ୍ବାସ୍ଥ୍ୟବସ୍ଥା ସଙ୍ଗିନ୍ ରହିବ ବୋଲି ସୋମବାର ମାଲକାନଗିରି ମେଡିକାଲ ସୁପରିଟେଣ୍ଡେଣ୍ଟ, ଡ.ଅନିଲ କୁମାର ମିଶ୍ର କହିଛନ୍ତି ।
ଏହାଛଡା ଦୁଇ ଶିଶୁଙ୍କ ସମସ୍ତ ମେଡିକାଲ ଖର୍ଚ୍ଚ ଜିଲ୍ଲା ହେଡକ୍ବାର୍ଟର ହସ୍ପିଟାଲ ବହନ କରିବ ବୋଲି ସେ କହିଛନ୍ତି । ଯଦି ଶିଶୁମାନଙ୍କ ସ୍ବାସ୍ଥ୍ୟବସ୍ଥାରେ ପରିବର୍ତ୍ତନ ନ ଆସେ ତେବେ ଦରକାର ପଡିଲେ ସେମାନଙ୍କୁ ବାହାର ମେଡିକାଲକୁ ନିଆଯିବ ବୋଲି ମଧ୍ୟ ସେ କହିଛନ୍ତି ।
ପ୍ରକାଶ ଥାଉକି ଗତ ରବିବାର ମାଲକାନଗିରି ଜିଲ୍ଲା ଗୌଡଗୁଡାର ସୀତା ମାଡକାମୀ ନିଜ ଅଭାବ ଅନଟନ ଆଗରେ ହାର ମାନି ଯାଇ ସେ ଏବଂ ତାଙ୍କର ଦୁଇ ଶିଶୁଙ୍କୁ ବିଷ ପିଆଇ ହତ୍ୟା ଉଦ୍ୟମ କରିଥିଲେ । ତେବେ ଏହି ଘଟଣାରେ ସୀତା ମାଡକାମୀଙ୍କର ମୃତ୍ୟୁ ଘଟିଥିବା ବେଳେ ଭାଗ୍ୟ ବଳରେ ବଞ୍ଚିଯାଇଥିଲେ ଦୁଇ ଶିଶୁ । ତେବେ ଘଟଣାକୁ ଗୋଟିଏ ଦିନ ବିତି ଯାଇଥିଲେ ମଧ୍ୟ ଦୁଇ ଶିଶୁ ଗୁରୁତର ଅବସ୍ଥାରେ ଏବେ ଡାକ୍ତରଖାନାରେ ଚିକିତ୍ସିତ ହେଉଛନ୍ତି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
