ମାଲକାନଗିରି: ଜିଲ୍ଲା ଅନ୍ତର୍ଗତ କୋରୁକୋଣ୍ଡା ମଣ୍ଡିରେ ପଡିଛି ଶହ ଶହ କ୍ୱିଣ୍ଟାଲ ଧାନ । ଏହାର ସୁଯୋଗ ନେଇ ରାଜନେତାମାନେ ମଣ୍ଡିରେ ପହଞ୍ଚି କୃଷକମାନଙ୍କ ପାଇଁ କୁମ୍ଭୀର କାନ୍ଦଣା କାନ୍ଦୁଛନ୍ତି । ଗତକାଲି (ରବିବାର) କାଲିମେଳା ମଣ୍ଡିରେ ପିସିସି କାର୍ଯ୍ୟକାରୀ ସଭାପତି ମଣ୍ଡିରେ ହେଉଥିବା ଅବ୍ୟବସ୍ଥା ଓ ମଣ୍ଡିକୁ ପୁନଃ ଚାଲୁ କରିବା ନେଇ ବିକ୍ଷୋଭ ପ୍ରଦର୍ଶନ କରିଥିଲେ । ପୁଣି ବିଜେପିର ଏକ ପ୍ରତିନିଧି ଦଳ ଜିଲାପାଳଙ୍କୁ ଭେଟି ମଣ୍ଡି ଖୋଲିବା ଏବଂ ଟୋକେନ୍ ଥିବା ଚାଷୀଙ୍କ ଧାନ ଖରିଦ କରିବା ନେଇ ଦାବି କରିଥିଲେ ।
ଏହି ପରିପ୍ରେକ୍ଷୀରେ ଆଜି ପୂର୍ବତନ ସାଂସଦ ବଳଭଦ୍ର ମାଝୀଙ୍କ ନେତୃତ୍ୱରେ ଏକ ଟିମ୍ କରୁକୋଣ୍ଡା ମଣ୍ଡିରେ ପହଞ୍ଚି ମଣ୍ଡିରେ ପଢିଥିବା ଶହ ଶହ ବସ୍ତା ଧାନକୁ ତୁରନ୍ତ ସରକାର ଖରିଦ କରିବାକୁ ଦାବି କରିଥିଲେ । ପ୍ରକାଶ ଥାଉକି, ମାଲକାନଗିରି ଜିଲ୍ଲାରେ ପ୍ରଥମ ପର୍ଯ୍ୟାୟରେ 7ଲକ୍ଷ 55ହଜାର କ୍ୱିଣ୍ଟାଲ ଧାନ ଦିତୀୟ ପର୍ଯ୍ୟାୟରେ 2 ଲକ୍ଷ 43 ହଜାର କ୍ୱିଣ୍ଟାଲ ଧାନ ଏବଂ ତୃତୀୟ ପର୍ଯ୍ୟାୟରେ 74 ହଜାର କ୍ୱିଣ୍ଟାଲ ଧାନ ଖରିଦ ପାଇଁ ଟାର୍ଗେଟ ଆସିଥିଲା । ବର୍ତ୍ତମାନ ଏହି ଟାର୍ଗେଟ ସମାପ୍ତ ହୋଇଯାଇଥିଲେ ମଧ୍ୟ ଜିଲ୍ଲାରେ 64 ମଣ୍ଡିରେ ଶହ ଶହ କୁଇଣ୍ଟାଲ ଧାନ ପଡିରହିଛି ।
କିଛି ଚାଷୀ ଟୋକେନ୍ ପାଇ ମଧ୍ୟ ଧାନ ବିକ୍ରି କରିପାରୁ ନଥିବା ବେଳେ ଅନେକ ଚାଷୀ ଟୋକେନ୍ ନପାଇ ହନ୍ତସନ୍ତ ହେଉଛନ୍ତି । ଶୀତ କାକରରେ ଚାଷୀ ମଣ୍ଡିରେ ଧାନକୁ ଜଗି ବସିଛନ୍ତି । କେନ୍ଦ୍ର ସରକାର ଧାନ କିଣିବା ପାଇଁ ପର୍ଯ୍ୟାପ୍ତ ପଇସା ରାଜ୍ୟ ସରକାରଙ୍କୁ ଦେଇଛନ୍ତି । ମାଲକାନଗିରି ଜିଲ୍ଲାରେ 17 ହଜାର କ୍ୱିଣ୍ଟାଲ ପର୍ଯ୍ୟନ୍ତ ଧାନ ଖରିଦ କରାଯାଇପାରିବ । ବର୍ତ୍ତମାନ ସୁଦ୍ଧା 10 ଲକ୍ଷ 53 ହଜାର କ୍ୱିଣ୍ଟାଲ ଧାନ ଖରିଦ କରାଯାଇଥିବା ବେଳେ ମଣ୍ଡିରେ ଆହୁରି 7 ଲକ୍ଷ ଧାନ ପଡି ରହିଛି । ମଣ୍ଡି ଗୁଡ଼ିକରେ ଚାଷୀଙ୍କୁ ଅଣଦେଖା କରାଯାଉଛି । ମେସିନ ନାହିଁ, ମଣ୍ଡିରେ ଚାଷୀଙ୍କ 4 ରୁ 5 କ୍ୱିଣ୍ଟାଲ ଧାନ କଟାଯାଉଛି । ଏଠି ଧାନ ରଖିବା ପାଇଁ ଗୋଦାମ ଥାଇ ମଧ୍ୟ ନଥିଲା ଭଳି । ଚାଷୀଙ୍କ ଧାନ ଜିଲ୍ଲା ପ୍ରଶାସନ ତୁରନ୍ତ ଉଠାଉ ନଚେତ ଆଗାମୀ ଦିନରେ ରାଜରାସ୍ତାକୁ ଓହ୍ଲାଇବାକୁ ବାଧ୍ୟ ହେବେ ଚାଷୀ ।
ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ
