ମାଲକାନଗିରି: ରାଜ୍ୟ ବାହାରକୁ ଦାଦନ ଚାଲାଣ ଦିନକୁ ଦିନ ବଢିବାର ଲାଗିଛି । ମାଲକାନଗିରିରୁ ଆନ୍ଧ୍ରପ୍ରଦେଶକୁ ଦାଦନ ଖଟିବାକୁ ଯାଉଥିବା କିଛି ନାବାଳିକାଙ୍କୁ ଉଦ୍ଧାର କରିଛି ଚାଇଲ୍ଡ ଲାଇନ । ଘଟଣାସ୍ଥଳରୁ ଚମ୍ପଟ ମାରିଛି ଦଲାଲ ।
ସୂଚନା ଅନୁସାର, ଆନ୍ଧ୍ରକୁ ଶୁକ୍ରବାର ୭ଜଣ ନାବାଳିକା ଚାଲାଣ ନେଇ ବିଶେଷ ସୂତ୍ରରୁ ଖବର ପାଇଥିଲା ମାଲକାନଗିରି ଚାଇଲ୍ଡ ଲାଇନ । ପରେ ଘଟଣାସ୍ଥଳରେ ପହଞ୍ଚିଥିଲା ଚାଇଲ୍ଡ ଲାଇନର ଏକ ଟିମ୍ । ନାବାଳିକାଙ୍କୁ ଉଦ୍ଧାର କରାଯାଇ ଜିଲ୍ଲା ଶିଶୁ ସୁରକ୍ଷା ସମିତି ଅଧ୍ୟକ୍ଷଙ୍କ ପାଖରେ ହାଜର କରାଯାଇଥିଲା । ଘଟଣାର ତଦନ୍ତ ପାଇଁ ନାବାଳିକା ମାନେ ଗୋଟିଏ ଦିନ ସ୍ବଧାର ଗୃହରେ ରହିଥିଲେ ।
ଆଜି(ଶନିବାର) ସେମାନଙ୍କ ପରିବାର ଲୋକଙ୍କୁ ହସ୍ତାନ୍ତର କରିଛି ଜିଲ୍ଲା ଶିଶୁ ସୁରକ୍ଷା ସମିତି । ସମସ୍ତ ନାବାଳିକା କୋରକୁଣ୍ଡା ବ୍ଲକ କାମବେଡା ଅଞ୍ଚଳର’ ବୋଲି କହିଛନ୍ତି ଶିଶୁ ମଙ୍ଗଳ କମିଟି ଅଧ୍ୟକ୍ଷ । ସେମାନଙ୍କୁ ସରକାରଙ୍କ ସମସ୍ତ ପ୍ରକାର ସୁବିଧା ଯୋଗାଇ ଦିଆଯିବ କହିଛନ୍ତି ଶିଶୁ ମଙ୍ଗଳ କମିଟି ଅଧ୍ୟକ୍ଷ । ‘‘କୋରୋନା ପରେ ସେମାନଙ୍କ ଆର୍ଥିକ ସ୍ଥିତି ବିଗିଡି ଯାଇଛି । ଯାହାର ଫାଇଦା ଉଠାଉଛନ୍ତି ଦଲାଲ । ସେମାନଙ୍କୁ ବିଭିନ୍ନ ପ୍ରକାର ଲୋଭ ଦେଖାଇ ଚାଲାଣ କରୁଥିବା’’ କହିଛନ୍ତି ଅଧ୍ୟକ୍ଷ ।
ଇଟିଭି ଭାରତ, ମାଲକାନଗିରି
