ମାଲକାନଗିରି: ଛତିଶଗଡ଼ ଓ ଓଡିଶା ସୀମାନ୍ତ ଚାଲାଣଗୁଡା ଠାରେ ଲକଡାଉନ ଯୋଗୁଁ ଜନସାଧାରଣଙ୍କ ଉପରେ ଯିବାଆସିବା ରୋକ ଲଗାଯାଇଥିବା ବେଳେ ଏଠାରୁ କେବଳ ବ୍ୟବସାୟିକ ଯାନବାହନ ପରିବହନ ପାଇଁ ଅନୁମତି ରହିଛି । ସର୍ବସାଧାରଣଙ୍କ ଯାତାୟତ ବେଳେ ଆରଟିପିସିଆର ଟେଷ୍ଟ ରିପୋର୍ଟ କିମ୍ବା ନେଗେଟିଭି ରିପୋର୍ଟରେ ମାଲକାନଗିରି ଜିଲ୍ଲାକୁ ପ୍ରବେଶ ପାଇଁ ଅନୁମତି ମିଳିଥାଏ ।
ଗତ କାଲି(ମଙ୍ଗଳବାର) ରାତିରେ ଏକ ଅଭାବନୀୟ ଘଟଣାକ୍ରମେ ଜଗଦଲପୁର ସହରରୁ ମାଲକାନଗିରି ଆସୁଥିବା ଏକ ମିନିଟ୍ରକ ସିଜି୧୭ କେଟି୫୩୯୯ ନମ୍ବର ଗାଡିଟି ଦ୍ରୁତ ଗତିରେ ଆସିବା ବେଳେ ଟିଟିବେରୀ ଗାଁ ପ୍ରବେଶ ପଥରେ ତନଖି ବ୍ୟାରିକେଟକୁ ଧକ୍କା ଦେବା ସହ ମାଲକାନଗିରି ଅଭିମୁଖେ ଛୁଟିଥିଲା । ପରେ ଚଲାନଗୁଡା ବ୍ୟାରିକେଟରେ ଅଟକାଇବା ସମୟରେ ଗାଡି ଚାଳକଙ୍କ ଖାମଖିଆଲି ଯୋଗୁଁ ଦୁର୍ଘଟଣା ଘଟାଇ ବ୍ୟାରିକେଟକୁ ଭାଙ୍ଗି ଚୁରମାର କରିଦେଇଥିଲା ।
ସୌଭାଗ୍ୟ ବଶତଃ ସେଠାରେ କାର୍ଯ୍ୟରତ ପୋଲିସକର୍ମୀ ସହ ଡିଉଟିରେ ଥିବା ଶିକ୍ଷକ ଅଳ୍ପକେ ବର୍ତ୍ତି ଯାଇଥିଲେ । ଡ୍ରାଇଭର ନାମ ରାଜୁ ବୟସ ପ୍ରାୟ ୨୭ ବର୍ଷ ହେବ । ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ ଡ୍ରାଇଭର ଗାଡି ଚାଳନା ସମୟରେ ମୋବାଇଲରେ କଥା ହେଉଥିଲେ ଯାହାଦ୍ୱାରା ଏହି ଦୁର୍ଘଟଣା ଘଟିଥିଲା । ଗାଡିକୁ ଅଟକ ରଖାଯାଇ ଅଧିକ ତଦନ୍ତ କରାଯାଉଛି ।
ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ
