ମାଲକାନଗିରି: ବିଜେଡି-ବିଜେପି ସମ୍ପର୍କକୁ ନେଇ ଦିଲ୍ଲୀରୁ ପଲ୍ଲୀ ସବୁଠି ଚର୍ଚ୍ଚା ଚାଲିଥିବାବେଳେ ମାଲକାନଗିରିରେ ଏହାର ଆଉ ଏକ ଉଦାହରଣ ଦେଖିବାକୁ ମିଳିଛି । ମୋଟୁ ଅଞ୍ଚଳରେ ଖଣିଖନନ ଓ ଏଠାକାର ବିକାଶକୁ ନେଇ କଂଗ୍ରେସ ରାଜ୍ୟ ସରକାରଙ୍କୁ କିଛି ଦିନ ତଳେ ଟାର୍ଗେଟ କରିଥିବାବେଳେ ଏହାର ଜବାବ ଦେଇଛନ୍ତି ବିଜେପି ବିଧାୟକ । ଯାହା ବିଜେଡି-ବିଜେପି ସମ୍ପର୍କକୁ ପଦାରେ ପକାଇଛି ବୋଲି ଚର୍ଚ୍ଚା ଚାଲିଛି ।
ଘଟଣା ଅନୁଯାୟୀ, ମୋଟୁ ତହସିଲ ପେଟା ଗ୍ରାମ ନିକଟରେ ଥିବା ପାହାଡରୁ ଆନ୍ଧ୍ର ପ୍ରଦେଶର ଜିଭି ଗ୍ରେନାଇଟ ନାମକ ଏକ ଘରୋଇ କମ୍ପାନି ପଥର ଖନନ କରୁଛି । ପଥର ଖୋଳି କୋଟି କୋଟି ଟଙ୍କା ଲାଭ କରୁଥିବାବେଳେ ଏ ଅଞ୍ଚଳର ବିକାଶ ଦିଗରେ କିଛି କରୁନି ବୋଲି ଦର୍ଶାଇ କିଛି ଦିନ ତଳ ରାଜ୍ୟ ସରକାରଙ୍କୁ ଟାର୍ଗେଟ କରିଥିଲେ ପିସିସି କାର୍ଯ୍ୟକାରୀ ସଭାପତି ପ୍ରଦୀପ ମାଝୀ ।
ହେଲେ ଏହାକୁ ବିରୋଧ କରି ମାଲକାନଗିରି ବିଜେପି ବିଧାୟକ ଆଦିତ୍ୟ ମାଢି କହିଛନ୍ତି, ଖଣି ଯୋଗୁଁ ମାଲକାନଗିରି ଜିଲ୍ଲାର ଅନେକ ଆଦିବାସୀ ଲୋକଙ୍କ ବିକାଶ ହୋଇଛି । ପଥର ଖଣିରେ ଶ୍ରମିକମାନେ କାମ ପାଇଥିବାବେଳେ ଏହି କମ୍ପାନୀରେ ଆଗାମୀ ଦିନରେ ଜିଲ୍ଲାର ଆଦିବାସୀ ଯୁବକ ଯୁବତୀ ମାନେ ନିଯୁକ୍ତି ମଧ୍ୟ ପାଇବେ । ହେଲେ କଂଗ୍ରେସ କେବଳ ରାଜନୀତି କରିବା ଲାଗି ପୂର୍ବରୁ ଏପରି ଅଭିଯୋଗ କରିଥିବା କହିଛନ୍ତି ମାଲକାନଗିରି ବିଧାୟକ ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
