ମାଲକାନଗିରି: ସାବେରୀ ନଦୀରେ ଡଙ୍ଗା ବୁଡି ଘଟଣାରେ 3 ଜଣଙ୍କ ମୃତଦେହ ଉଦ୍ଧାର ହୋଇଛି । ପ୍ରଥମେ 2 ଜଣ ଭଉଣୀଙ୍କ ମୃତଦେହ ମିଳିଥିବା ବେଳେ ପରେ ନିଖୋଜ ଯୁବକଙ୍କ ମୃତଦେହ ଉଦ୍ଧାର ହୋଇଛି । ମାଲକାନଗିରି ଜିଲ୍ଲା ପଡିଆ ବ୍ଲକ ନିଲିଗୁଡା ସାବେରୀ ନଦୀରେ ଶନିବାର ଡଙ୍ଗା ବୁଡି ଯିବାରୁ 3 ଜଣ ନିଖୋଜ ଥିଲେ । ମାଲକାନଗିରିର ମାଟେରୁ ପଞ୍ଚାୟତ ଅଧିନସ୍ଥ କୁମ୍ଭାରଗୁଡା ଗାଁର ରାଜକାବାସୀଙ୍କ 2 ଝିଅଙ୍କ ମୃତଦେହ ମିଳିଥିବା ବେଳେ ନିଖୋଜ ଥିବା ଯୁବକଙ୍କ ମୃତ ଦେହ ରବିବାର ଉଦ୍ଧାର ହୋଇଛି ।
ଶନିବାର ମାଟେରୁ ପଞ୍ଚାୟତ ଅନ୍ତର୍ଗତ କୁମ୍ଭାରଗୁଡା ଗାଁର ରାଜା କାବାସୀଙ୍କ 2 ଝିଅଙ୍କ ସହ ଜଣେ ସଂପର୍କୀୟ ଯୁବକ ପୋଡଶୀ ଛତିଶଗଡ଼କୁ ଏକ ଦେଶୀ ଡଙ୍ଗାରେ ଯାଉଥିବା ବେଳେ ଡ଼ଙ୍ଗାଟି ଭାର ସାମ୍ୟ ହରାଇ ନଦୀରେ ବୁଡି ଯାଇଥିଲା । ପରେ ସ୍ଥାନୀୟ ଲୋକଙ୍କ ସହ ଅଗ୍ନିଶମ ବିଭାଗର ଅଧିକାରୀ ମାନେ ଘଟଣା ସ୍ଥଳରେ ପହଞ୍ଚି ତଲାସୀ ଅଭିଯାନ ଆରମ୍ଭ କରିଥିଲେ ।
ତେବେ ଛତିଶଗଡ ଯିବା ପାଇଁ ନଦୀ ପାର ହେବାକୁ ଚେଷ୍ଟା କରୁଥିବା ସମୟରେ ଦୁର୍ଭାଗ୍ୟବଶତଃ ଡଙ୍ଗାଟି ବୁଡି ଯାଇଥିଲା । ଦୁଇ ଦିନ ପରେ ନିଖୋଜ 3 ଜଣଙ୍କ ମୃତଦେହ ଉଦ୍ଧାର ହୋଇଛି । ସାବେରୀ ନଦୀର ପଡିଆ ଘାଟରୁ ଏମାନଙ୍କ ମୃତ ଦେହ ଉଦ୍ଧାର କରିଛନ୍ତି ଅଗ୍ନିଶମ ବିଭାଗ । ପଡିଆ ଥାନା ପୋଲିସ ଘଟଣା ସ୍ଥଳରେ ପହଞ୍ଚି ଶବ ବ୍ୟବଚ୍ଛେଦ କରିବା ସହ ତଦନ୍ତ କରୁଛି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
