ମାଲକାନଗିରି: ମାଲକାନଗିରି ଜିଲ୍ଲା ସୀମାନ୍ତବର୍ତ୍ତୀ ଛତିଶଗଡ ମୁଲେର ଜଙ୍ଗଲରେ ପୋଲିସ-ମାଓବାଦୀ ମଧ୍ୟରେ ଗୁଳିବିନିମୟ ହୋଇଛି । ଏଥିରେ ଜଣେ ମାଓବାଦୀର ମୃତ୍ୟୁ ହୋଇଛି । ଘଟଣାସ୍ଥଳରୁ ବିପୁଳ ପରିମାଣର ମାଓ ସାମଗ୍ରୀ ଜବତ କରାଯାଇଛି ।
ଛତିଶଗଡର ସୁକୁମା ଜିଲ୍ଲାର ଫୁଲବଗୋଡି ଥାନା ଅଧୀନସ୍ଥ ମୁଲେର ଜଙ୍ଗଲରେ ମାଓବାଦୀ ଠୁଳ ହୋଇଥିବା ଗୁଇନ୍ଦା ସୂଚନା ମିଳିଥିଲା । ସୂଚନା ମିଳିବା ପରେ ଡିଆରଜି ଯବାନମାନେ କୁମ୍ବିଂ ଅପରେସନ ଆରମ୍ଭ କରିଥିଲେ । ଯବାନଙ୍କୁ ଦେଖି ପ୍ରଥମେ ଗୁଳି ଚାଳନା କରିଥିଲେ ମାଓବାଦୀ ।
ପାଲଟା ଜବାବ ଦେବାକୁ ଯାଇ ଗୁଳିମାଡ କରିଥିଲେ ଯବାନ । ପ୍ରାୟ 1ଘଣ୍ଟା ଧରି ଉଭୟ ପକ୍ଷ ମଧ୍ୟରେ ଗୁଳି ବିନିମୟ ହୋଇଥିଲା । ଏହାପରେ ମାଓବାଦୀ ଘଞ୍ଚ ଜଙ୍ଗଲର ଫାଇଦା ଉଠାଇ ସେଠାରୁ ଚମ୍ପଟ ମାରିଥିଲେ । ପରେ ଯବାନଙ୍କ ପକ୍ଷରୁ ଘଟଣାସ୍ଥଳରେ କରାଯାଇଥିବା ତଲାସୀ ଅଭିଯାନରେ ଜଣେ ପୋଷାକ ପିନ୍ଧା ମାଓବାଦୀର ମୃତଦେହ ମିଳିବା ସହ ମାଓ ସାମଗ୍ରୀ ଜବତ କରାଯାଇଥିଲା । ବର୍ତ୍ତମାନ ମଧ୍ୟ ସେଠାରେ ତଲାସୀ ଅଭିଯାନ ଜାରି ରହିଥିବା ସୁକୁମା ଏସପି ସୌଲଭ ସିହ୍ନା ସୂଚନା ଦେଇଛନ୍ତି।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
