କୋରାପୁଟ: ଗାଁରେ ଜମୁଛି ନିର୍ବାଚନୀ ପ୍ରଚାର । ପ୍ରତି ଘରେ ପହଞ୍ଚି ପ୍ରଚାର କରୁଛନ୍ତି ପଞ୍ଚାୟତ ପ୍ରାର୍ଥୀ । କିଏ ମାଛ ଧରି ଭୋଟ୍ ମାଗୁଛି ତ କିଏ ସାଇକେଲରେ ପ୍ରଚାର କରୁଛି । କୋରାପୁଟ ବ୍ଲକ ମାଥାଲପୁଟ ଅଞ୍ଚଳରେ ସେଭଳି ଜଣେ ପ୍ରାର୍ଥୀଙ୍କ ନିଆରା ନିର୍ବାଚନୀ ପ୍ରଚାରକୁ ନେଇ ଏବେ ଜୋର ଧରିଛି ଚର୍ଚ୍ଚା । ଏଠାରେ ହାତରେ ଟିଭି ଧରି ଘର ଘର ବୁଲି ସମର୍ଥନ ମାଗୁଛନ୍ତି ଜିଲ୍ଲା ପରିଷଦ ପ୍ରାର୍ଥୀ ସସ୍ମିତା ଖରା ।
ଏକ ନିର୍ଦ୍ଧିଷ୍ଟ ଦଳ ପାଇଁ ବର୍ଷବର୍ଷ ଧରି କାର୍ଯ୍ୟ କରିବା ପରେ ସେ ଏକ ମହିଳା ହୋଇଥିବା ଯୋଗୁଁ ଦଳ ତାଙ୍କୁ ପୁରୁଷ ଠାରୁ ଦୁର୍ବଳ ଆଖ୍ୟା ଦେଇ ଟିକଟ ଦେବାକୁ ପ୍ରତ୍ୟାଖ୍ୟାନ କରିଥିବା ସସ୍ମିତା ଅଭିଯୋଗ କରିଛନ୍ତି । ଏତେଦିନ ଧରି ଦଳ ସହିତ କାର୍ଯ୍ୟ କରି ଏହି ଅଞ୍ଚଳର ସମସ୍ୟା ଓ ସମ୍ଭାବନା ସହ ଅବଗତ ଅଛନ୍ତି । ଏହ କାରଣରୁ ଜିଲ୍ଲା ପରିଷଦ ସଦସ୍ୟ ଭାବେ ଅଞ୍ଚଳର ବିକାଶ ପାଇଁ ସେ ଦେଖିଥିବା ସ୍ବପ୍ନ ଦଳର ପ୍ରତ୍ୟାଖ୍ୟାନ ସହ ଶେଷ ହୋଇପାରିନାହିଁ । ଏତେ ଦିନର ଜନସମ୍ପର୍କ ଓ ନିଜ ମାଟି ପାଇଁ କିଛି କରିବାର ପ୍ରବଳ ଆଗ୍ରହ ତାଙ୍କୁ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ କରିଥିବା ସେ ପ୍ରକାଶ କରିଛନ୍ତି ।
ଉଚ୍ଚଶିକ୍ଷା ସମ୍ପୂର୍ଣ୍ଣ କରିଥିବା ଏହି ମହିଳାଙ୍କୁ ପ୍ରାର୍ଥୀ ଭାବେ ଦେଖି ଭୋଟରମାନେ ମଧ୍ୟ ଖୁବ୍ ଖୁସି ହେଉଛନ୍ତି । ଏପରିକି ଯୁବପୀଢ଼ି ଉତ୍ସାହର ସହ ତାଙ୍କ ସହ ନିଃସର୍ତ୍ତ ଭାବେ ନିର୍ବାଚନ ପ୍ରଚାର ଅଭିଯାନରେ ସହଯୋଗ କରୁଥିବା ସେ ଜଣାଇଛନ୍ତି । ଘରେ ଘରେ ଟେଲିଭିଜନ ପହଁଚିଲା ଭଳି ସେ ମଧ୍ୟ ପ୍ରତ୍ୟେକ ପରିବାରର ସଦସ୍ୟ ଭାବେ ସେମାନଙ୍କ ସୁଖ ଦୁଃଖର ସାଥି ହେବେ ବୋଲି ପ୍ରତିଶ୍ରୁତି ଦେଇଛନ୍ତି । ତେବେ ଦଳ ଛାଡି ସ୍ୱାଧୀନ ଭାବେ ଲଢୁଥିବା ଏହି ମହିଳା ପ୍ରାର୍ଥୀଙ୍କ ଅଭିନବ ଉପାୟ କେତେଦୂର ରାଜନୈତିକ ଦଳଗୁଡ଼ିକର ଶକ୍ତ ପ୍ରଚାରକୁ ସାମ୍ନା କରିପାରିବ ତାହା କେବଳ ସମୟ ହିଁ କହିବ ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
