କୋରାପୁଟ: କର୍କଟ ରୋଗରେ ପୀଡିତ ଦାମନଯୋଡିର ଯୁବତୀ ସିମେଲି ଖୋସଲା ବର୍ତ୍ତମାନ କୋରାପୁଟସ୍ଥିତ ସହିଦ ଲକ୍ଷ୍ମଣ ନାୟକ ମେଡିକାଲ କଲେଜର ଚିକିତ୍ସାଳୟରେ ଅସହାୟ ଅବସ୍ଥାରେ ଛାତକୁ ଅନାଇ ରହିଛି ।
କର୍କଟ ରୋଗ ସହ ସଂଗ୍ରାମ କରୁଥିବା ସିମେଲିର ପରିବାର ସ୍ଥାନୀୟ ଲୋକଙ୍କ ସହଯୋଗ ବଳରେ ଭୁବନେଶ୍ୱରର ଏକ ହସ୍ପିଟାଲରେ ଅସ୍ତ୍ରୋପଚାର କରାଇ ସାରିଛି । ଅସ୍ତ୍ରୋପଚାର ହେବା ପରେ ପରେ ସିମେଲିର ବାପାଙ୍କ ଦେହାନ୍ତ ହୋଇଗଲା । ତା ପରଠାରୁ ଜୀବନ ବଞ୍ଚାଇବାର ସଂଗ୍ରାମ ଆହୁରି କଠିନ ହୋଇଯାଇଥିଲା । ମା, ଜମି ଖୋସଲାଙ୍କ ପାଖରେ ସମଗ୍ର ସଂସାର ଅନ୍ଧକାର ଦେଖାଗଲା ।
ନିଜର ବୋଲି କହୁଥିବା ଟିକି ଘରଟିକୁ ବନ୍ଧା ପକାଇ ଝିଅ ସିମେଲିର ଚିକିତ୍ସା କରାଇବାର ପ୍ରଚେଷ୍ଟା ଜାରି ରଖିଥିବାବେଳେ ସୋମବାର ସିମେଲିର ପେଟରେ ଯନ୍ତ୍ରଣା ଅତ୍ୟଧିକ ହେବା ଯୋଗୁଁ କୋରାପୁଟର ହସ୍ପିଟାଲରେ ଭର୍ତ୍ତି କରିବା ପାଇଁ ବାଧ୍ୟ ହୋଇଥିଲେ । ଏଠାରୁ ସିମେଲିକୁ କଟକ ସ୍ଥାନାନ୍ତର କରିବାର ଆବଶ୍ୟକତା ରହିଥିବା ଡାକ୍ତର ସୂଚନା ଦେବା ପରେ ସମଗ୍ର ପରିବାର ଓ ଶୁଭେଚ୍ଛୁ ବ୍ୟସ୍ତ ହୋଇଉଠିଲେ ।
ତେବେ ସିମେଲିକୁ ରେଫର କରାଯାଉଥିବା ଚିକିତ୍ସାଳୟକୁ ଯିବା ଖର୍ଚ୍ଚ ସହିତ ଅନ୍ୟାନ୍ୟ ଆନୁସଙ୍ଗିକ ଖର୍ଚ୍ଚ ଜିଲ୍ଲା ପ୍ରଶାସନ ବହନ କରିବ ବୋଲି ଅତିରିକ୍ତ ଜିଲ୍ଲାପାଳ ଦେବେନ ପ୍ରଧାନ ଆଶ୍ୱାସନା ଦେବା ପରେ ସିମେଲିର ଚିକିତ୍ସା ହେବାକୁ ନେଇ ନୂତନ ଆଲୋକ ଦେଖାଯାଇଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
