କୋରାପୁଟ: ଆଜି ଦକ୍ଷିଣ-ପଶ୍ଚିମାଞ୍ଚଳ ନୂଆ ଡିଆଇଜି ଭାବେ ଦାୟିତ୍ବ ଗ୍ରହଣ କରିଛନ୍ତି ସଫିନ ଅହମ୍ମଦ । ବିଦାୟୀ ଡିଆଇଜି ହିମାଂଶୁ ଲାଲଙ୍କ ଠାରୁ ଦାୟିତ୍ବ ଗ୍ରହଣ କରିବା ପରେ ପୋଲିସ ଥାନାକୁ ଲୋକାଭିମୁଖୀ କରାଯିବା ନେଇ ସେ କହିଛନ୍ତି । ସାଧାରଣ ପ୍ରଶାସନ ହେଉ ଅବା ପୋଲିସ ପ୍ରଶାସନ ସମସ୍ତଙ୍କ ମୂଳ ଲକ୍ଷ୍ୟ ଜନତାଙ୍କ ସେବା ହେଉ ବୋଲି ସଫିନ କହିଛନ୍ତି ।
ଏନେଇ ଅଞ୍ଚଳର ସମସ୍ତ ଥାନାରେ ସାଧାରଣ ଲୋକେ ଯେମିତି ସହଜରେ ନ୍ୟାୟ ପାଇବେ ଓ କେହି ହଇରାଣ ହରକତର ସାମ୍ନା କରିବେ ନାହିଁ ସେ ଦିଗରେ ଗୁରୁତ୍ବ ଦିଆଯିବ । ଏପରିକି ଆଧୁନିକ ଟେକ୍ନୋଲୋଜିକୁ ବ୍ୟବହାର କରି ପୋଲିସ କାର୍ଯ୍ୟ ଦକ୍ଷତା ବୃଦ୍ଧି କରିବା ସହ ସରକାରଙ୍କ ଦ୍ବାରା ପ୍ରଣୟନ କରାଯାଇଥିବା 5Tର ଧାରାକୁ ବାସ୍ତବ କାର୍ଯ୍ୟରେ ଉପଲବ୍ଧି କରାଯିବ ।
ବର୍ତ୍ତମାନ ସବୁଠାରେ ମହିଳା ଓ ଶିଶୁଙ୍କ ସୁରକ୍ଷା ଚିନ୍ତାଜନକ ସ୍ଥିତିରେ ପହଞ୍ଚିଥିବାବେଳେ କୋରାପୁଟରେ ଏଥିପ୍ରତି ବିଶେଷ ଧ୍ୟାନ ଦିଆଯିବ । ଅପରାଧିଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି । ନକ୍ସଲ ମୁକାବିଲାରେ ଏହି ଅଞ୍ଚଳରେ ଉପଲବ୍ଧ ହୋଇଥିବା କାର୍ଯ୍ୟକୁ ଜାରି ରଖିବା ସହ ତାଙ୍କ ବିରୁଦ୍ଧରେ ଅପରେସନକୁ ଆହୁରି ତ୍ରୀବତର କରାଯିବ ।
କିନ୍ତୁ ମାଓବାଦୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସମୟରେ ଯେପରି କୌଣସି ସାଧାରଣ ଜନତା ଅସୁବିଧାର ସମ୍ମୁଖୀନ ହେବେ ନାହିଁ ସେ ଦିଗରେ ବିଶେଷ ଦୃଷ୍ଟି ଦିଆଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି ।
କୋରାପୁଟରୁ ସି.ଏଚ.ଶାନ୍ତାକାର ଇଟିଭି ଭାରତ
