କୋରାପୁଟ: ଆଖିରୁ ବୋହି ପଡୁଛି ଲୁହ ଧାର୍ ଧାର୍ । ଦିବ୍ୟାଙ୍ଗ ପୁଅର ଫେରିବା ବାଟକୁ ଚାତକ ଭଳି ଚାହିଁ ଚାହିଁ ବାହୁନି ବାହୁନି କାନ୍ଦୁଛି ମା । କେବେ ଫେରିବ ପୁଅ । ତାକୁ ନେଇ ମା ମନରେ ସୃଷ୍ଟି ସନ୍ଦେହ । ଆମେ କହୁଛୁ କୋରାପୁଟ ଜିଲ୍ଲା ମସ୍ତିପୁଟ ପଞ୍ଚାୟତର ଦଳେଇପୁଟ ଗାଁରେ ରହୁଥିବା ଜୟନ୍ତୀ ରଥଙ୍କ କଥା ।
ଗତ ଜୁନ ମାସରୁ ଘରର ଏକମାତ୍ର ପୁଅ ଚୈତନ୍ୟ ରଥ ଧନ୍ଦାମୂଳକ ଶିକ୍ଷାର ତାମିଲ ନେବା ପାଇଁ ଭୁବନେଶ୍ବର ଆସିଥିଲେ । ସେହିଦିନ ଠାରୁ ନା ତାଙ୍କ ସହ କୌଣସି ଯୋଗାଯୋଗ ହୋଇଛି ନା ମିଳୁଛି ତାଙ୍କର କୌଣସି ଖୋଜ ଖବର । ଦିବ୍ୟାଙ୍ଗ ପୁଅ ହେଲେ ବି ତାଙ୍କ ପାଇଁ ଦୁଃଖ କଷ୍ଟେ ଚଳୁଥିଲା ପରିବାର । ହେଲେ ତାଲିମ ନେବାକୁ ଗଲା ଯେ ପୁଅ ଆଉ ଫେରିଲା ନାହିଁ । ଯାହାକୁ ନେଇ ବ୍ୟସ୍ତ ବିବ୍ରତ ହୋଇପଡିଛନ୍ତି ପରିବାର ଲୋକ । ଗତ 5 ମାସ ହେଲା ଯେମିତି ମା ଆଖିରୁ ଲୁହ ଶୁଖୁନି । ପୁଅକୁ ମନେ ପକାଇ ବାହୁନି ବାହୁନି କାନ୍ଦୁଛି ମା ।
ସୂଚନା ଅନୁଯାୟୀ, ଗତ ଜୁନ ମାସରେ କୋରାପୁଟର ସାମାଜିକ ସୁରକ୍ଷା ଅଧିକାରୀଙ୍କ କାର୍ଯ୍ୟାଳୟ ତରଫରୁ 5 ଜଣ ଦିବ୍ୟାଙ୍ଗ ଧନ୍ଦାମୂଳକ ଶିକ୍ଷା ପାଇଁ ଭୁବନେଶ୍ବର ଆସିଥିଲେ । କିନ୍ତୁ ଆସିବା ପରଦିନ ଠାରୁ ଚୈତନର ଖୋଜ ଖବର ନ ମିଳିବା ଯୋଗୁଁ ପରିବାର ବର୍ଗ ଓ ପ୍ରଶାସନିକ ଅଧିକାରୀ ବ୍ୟସ୍ତ ହୋଇ ପଡିଛନ୍ତି ।
ଏନେଇ ଜିଲ୍ଲା ସାମାଜିକ ସୁରକ୍ଷା ଅଧିକାରୀ( ଡିଏସଏସଓ) ସୀମାଞ୍ଚଳ ମହାପାତ୍ରଙ୍କ କହିଛନ୍ତି, ଚୈତନ୍ୟ ସିଲେଇ ଶିଖିବା ପାଇଁ ସେଠାକୁ ଯାଇଥିଲେ । ହେଲେ ଯିବାର ପରଦିନ ସନ୍ଧ୍ୟାରେ ବାହାରକୁ ଯାଇ ଆଉ ଫେରି ନାହାନ୍ତି । ଏନେଇ ଥାନାରେ ଅଭିଯୋଗ ମଧ୍ୟ ହୋଇଥିଲା କିନ୍ତୁ ତାଙ୍କର କୌଣସି ଖୋଜଖବର ମିଳି ନାହିଁ ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
