କୋରାପୁଟ: ପାଣି ଭର୍ତ୍ତି ଗାତରେ ପଡ଼ି ୪ ଶିଶୁଙ୍କ ମୃତ୍ୟୁ । କୋରାପୁଟ ଜିଲ୍ଲା ଦଶମନ୍ତପୁର ବ୍ଲକ ଫୁଲବେଡା ପଞ୍ଚାୟତର ମାଝିଗୁଡ଼ା ଗାଁରେ ଘଟିଯାଇଛି ଏହି ଦୁଃଖଦ ଘଟଣା । ରାସ୍ତା କାମ ଖୋଳା ଯାଇଥିଲା ଗାତ । ବର୍ଷା ହେବାରୁ ପାଣି ଭର୍ତ୍ତି ହୋଇଥିଲା । ଅସାବଧାନତା ବଶତଃ ଗାତରେ ପଡିଯିବାରୁ ୪ ଜଣଙ୍କ ମୃତ୍ୟୁ ହୋଇଛି । ଘଟଣା ସ୍ଥଳକୁ କୋରାପୁଟ ଏସଡିପିଓଙ୍କ ନେତୃତ୍ବରେ ଉଦ୍ଧାରକାରୀ ଦଳ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
ସୂଚନାନୁସାରେ ମାଝିଗୁଡ଼ା ଗ୍ରାମରେ ଭାରତମାଲା ରାସ୍ତା କାମ ପାଇଁ ରାସ୍ତା କଡ଼ରେ ଖୋଳା ଯାଇଥିଲା ଖାଲ । ଏହି ଖାଲରେ ଭର୍ତ୍ତି ହୋଇଥିବା ବର୍ଷା ଜଳରେ ଆଜି ଚାରି ଜଣ ଶିଶୁ ବୁଡ଼ିଯାଇଥିଲେ । ଏଥିରେ ତିନି ଜଣ ଝିଅ ଓ ଜଣେ ପୁଅ ଥିଲେ । ବୁଡ଼ି ଯାଇଥିବା ଶିଶୁମାନେ ହେଲେ ପୁର୍ଣି ହନ୍ତାଳ (୬), ବିମଳା ଶୁକ୍ରୀ (୬) ରାଇଲା ଶୁକ୍ରୀ (୪) ଓ ମଧୁ ହନ୍ତାଳ (୬) । ଏମାନଙ୍କ ମଧ୍ୟରୁ ଦୁଇ ଜଣ ଝିଅ ଓ ଜଣେ ପୁଅ ରାସ୍ତା କଡ଼ରେ ଥିବା ପାଣି ଭର୍ତ୍ତି ନାଳ ମଧ୍ୟକୁ ଖସି ପଡ଼ିଥିଲେ । ଏହାଦେଖି ଆର ଜଣକ ଝିଅ ଦୌଡ଼ିଯାଇ ଗ୍ରାମବାସୀଙ୍କୁ ଜଣାଇବା ପାଇଁ ଯାଉଥିବା ବେଳେ ଆଗରେ ଆଉ ଏକ ନାଳ ମଧ୍ୟକୁ ଖସି ପଡିଥିଲେ ବୋଲି କୋରାପୁଟ ଏସଡିପିଓ ମନୋଜ ପୂଜାରୀ ଜଣାଇଛନ୍ତି ।
ଖବରପାଇ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ସମସ୍ତ ଶିଶୁଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ମୃତ ଚାରି ଜଣ ଶିଶୁଙ୍କ ମଧ୍ୟରୁ ଦୁଇଜଣ ଝିଅ ଗୋଟିଏ ପରିବାରର । ଏନେଇ ଗାଁରେ ଶୋକାକୁଳ ପରିସ୍ଥିତି ସୃଷ୍ଟି ହୋଇଥିବା ବେଳେ ଭାରତମାଳା ରାସ୍ତା ନିର୍ମାଣକାରୀ ସଂସ୍ଥା ଦ୍ୱାରା ରାସ୍ତା କାମ ନିକଟରେ ସୁରକ୍ଷାର ବ୍ୟବସ୍ଥା କରାନଯିବା ଯୋଗୁଁ ଏପରି ଦୁର୍ଘଟଣା ଘଟିଥିବା ଗ୍ରାମବାସୀ ଅଭିଯୋଗ କରିଛନ୍ତି ।
ଇଟିଭି ଭାରତ, କୋରାପୁଟ
