କୋରାପୁଟ: ପ୍ରତ୍ୟେକ ପିଲାର ଜୀବନରେ ଦଶମ ଶ୍ରେଣୀ ବୋର୍ଡ ପରୀକ୍ଷା ଏକ ଗୁରୁତ୍ୱପୂର୍ଣ୍ଣ ସୋପାନ । ମାତ୍ର କୋରୋନା ପାଇଁ ଏବର୍ଷ ମାଟ୍ରିକ ପରୀକ୍ଷା ବାତିଲ ହୋଇଯାଇଛି, ଯାହାକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି ଛାତ୍ରଛାତ୍ରୀ ।
ଦିନରାତି ପ୍ରସ୍ତୁତି ପରେ ପରୀକ୍ଷା ଦେଇନପାରିବାର କ୍ଷୋଭ ଜୀବନବ୍ୟାପୀ ସେମାନଙ୍କ ସହିତ ରହିବାର ସମ୍ଭାବନା ରହିଥିଲେ ମଧ୍ୟ ସରକାରଙ୍କ ନିଷ୍ପତ୍ତିକୁ ଗ୍ରହଣ କରିବା ଛଡା ଅନ୍ୟ ବାଟ ନଥିବା ଅଭିଭାବକ କହିଛନ୍ତି । ସେହିପରି ଏପରି ହେବା ଦ୍ବାରା ମେଧାବୀ ଛାତ୍ରଛାତ୍ରୀଙ୍କ ଭବିଷ୍ୟତ ଉପରେ ସିଧାସଳଖ ପ୍ରଭାବ ପଡିବ ବୋଲି ଅରବିନ୍ଦ ପୂର୍ଣାଙ୍ଗ ଶିକ୍ଷାକେନ୍ଦ୍ରର ଶିକ୍ଷକ ହରି ସାହୁ ମତ ରଖିଛନ୍ତି ।
ତେବେ କୋରାପୁଟ ଜିଲ୍ଲାରେ 271 ଟି ବିଦ୍ୟାଳୟରୁ 20,594 ଜଣ ଛାତ୍ରଛାତ୍ରୀ 77 ଟି ପରୀକ୍ଷା କେନ୍ଦ୍ରରେ ପରୀକ୍ଷା ଦେଇଥାନ୍ତେ । ଅନ୍ୟପଟେ କୋଭିଡର ଭୟାବହତା ଯୋଗୁଁ ସରକାରଙ୍କ ଏପରି ନିଷ୍ପତ୍ତିକୁ ଜିଲ୍ଲା ବିଜ୍ଞାନ ପର୍ଯ୍ୟବେକ୍ଷକ ଶିବ ଶଙ୍କର ପଟ୍ଟନାୟକ ସ୍ୱାଗତ କରିଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
