କୋରାପୁଟ: ଜାତିର ପିତା ମହାତ୍ମା ଗାନ୍ଧୀଙ୍କ ୧୫୨ତମ ଜନ୍ମ ଜୟନ୍ତୀ । ଜାତିର ପିତା ମହାତ୍ମାଗାନ୍ଧୀ ଚରଖାରେ ସୂତା କାଟିବାକୁ ସ୍ବାଧୀନତା ସଂଗ୍ରାମର ଏକ ଅମୋଘ ଅସ୍ତ୍ର ଭାବେ ବ୍ୟବହାର କରିଥିଲାବେଳେ ସ୍ବାଧୀନତାର ଅନେକ ବର୍ଷ ପରେବି ଏହା ପିଲାଙ୍କୁ ସ୍ବାଧୀନତା ଓ ସ୍ବାବଲମ୍ବୀ ହେବାର ବାର୍ତ୍ତାକୁ ନେଇ ପ୍ରଭାବିତ କରୁଛି ।
ମହାତ୍ମାଗାନ୍ଧୀଙ୍କ 'କୁଟି ଖାଅ, କାଟି ପିନ୍ଧ'ର ଡାକରାରେ ଭାରତ ବର୍ଷର ପୁରପଲ୍ଲୀରେ ସ୍ବାବଲମ୍ବୀ ହେବାର ସଂଗ୍ରାମକୁ ବଳ ଯୋଗାଇ ଆସିଥିଲାବେଳେ ଗାଁ ଗାଁରେ ଗାନ୍ଧିଜୀଙ୍କ ଗ୍ରାମ ସ୍ବରାଜ ପ୍ରତିଷ୍ଠାର ଆବଶ୍ୟକତାକୁ ଗ୍ରାମସଭା ମାଧ୍ୟମରେ ଲୋକେ ମନେ ପକାଉଛନ୍ତି । ପ୍ରତିଥର ଚରଖା ପାଖରେ ବସି ତୁଳା ବିଣ୍ଡାରୁ ସୂତା କାଟିଲାବେଳେ ବାପୁଜୀ ସ୍ବାଧୀନତା ସଂଗ୍ରାମ ଓ ଅଗଣିତ ସ୍ବାଧୀନତା ସଂଗ୍ରାମୀ ମନେ ପଡନ୍ତି ବୋଲି ସର୍ବୋଦୟ ସମିତିରେ ଅଧ୍ୟାୟନର ଏକ ଅଭିନ୍ନ ଅଙ୍ଗଭାବେ ସୂତା କାଟିବା ଶିଖୁଥିବା ଛାତ୍ରୀ ମଇନା ସାହୁ କହିଛନ୍ତି । ଗାନ୍ଧିଜୀ ବ୍ୟବହାର କରୁଥିବା ପାରମ୍ପରିକ ଚରଖା ହେଉ ବା ସ୍ବତନ୍ତ୍ର ଗ୍ରାମସଭା ମାଧ୍ୟମରେ ସ୍ବାବଲମ୍ବୀ ହୋଇ ପରସ୍ପର ସହଯୋଗରେ ଯୋଜନା ପ୍ରସ୍ତୁତି କରିବା ହେଉ, ସବୁଥିରେ ଗାନ୍ଧିଜୀ ଓ ଶାସ୍ତ୍ରିଜୀଙ୍କ ଆଦର୍ଶ ଭବିଷ୍ୟତ ପିଢ଼ି ମଧ୍ୟରେ ସ୍ବାବଲମ୍ବୀ ହୋଇଉଠିବାର ଆନନ୍ଦକୁ ପ୍ରବାହିତ କରିବାର ସାମର୍ଥ୍ୟ ରହିଥିବା ମହାଦେଇପୁଟର ସ୍ବେଚ୍ଛାସେବୀ ସୁରେନ୍ଦ୍ର ମସ୍ତି କହିଛନ୍ତି ।
ଆଜିର ପିଲାଙ୍କ ମଧ୍ୟରେ ଚରଖାରେ ସୂତା କାଟିବାର ଅନୁଭୂତି ଓ ପରବର୍ତ୍ତୀ ପର୍ଯ୍ୟାୟରେ ସେମାନଙ୍କ ଯୁବା ବୟସରେ ଏ ସଂକ୍ରାନ୍ତରେ ସ୍ବତନ୍ତ୍ର ତାଲିମ ପାଇବା ସେମାନଙ୍କୁ ସ୍ବାବଲମ୍ବୀ କରାଇବାରେ ସହଯୋଗ କରୁଛି ବୋଲି ସର୍ବୋଦୟ ସମିତିର ସମ୍ପାଦକ ପ୍ରଦୀପ ମହାନ୍ତି କହିଛନ୍ତି । ଆଜି ଗାନ୍ଧିଜୀ ଓ ଶାସ୍ତ୍ରୀଜୀଙ୍କ ଜନ୍ମ ବାର୍ଷିକୀ ଅବସରରେ ଜିଲ୍ଲାପାଳ ଅବଦଲ ଅକ୍ତରଙ୍କ ଅଧ୍ୟକ୍ଷତାରେ ସହରବାସୀ ଉଭୟ ମହାପୁରୁଷଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଥିଲେ । ଗାନ୍ଧୀ ପାର୍କରେ ଏକ ସର୍ବଧର୍ମ ସଭାରେ ଭଗବତ ଗୀତା, ବାଇବେଲ ଓ କୋରାନ ପଠନ କରାଯାଇଥିଲା ।
କୋରାପୁଟର ସିଏଚ ଶାନ୍ତାକାର, ଇଟିଭି ଭାରତ
