କୋରାପୁଟ ପଣସ ପ୍ରେମରେ ସାରା ଓଡିଶା, ଚିପ୍ସର ବଢୁଛି ଚାହିବା

ପଣସ ଚିପ୍ସକୁ ନେଇ ଚର୍ଚ୍ଚାରେ କୋରାପୁଟର ବିଭିନ୍ନ ବ୍ଲକ । ସ୍ଥାନୀୟ ବଜାର ସମେତ ରାଜ୍ୟ ଓ ରାଜ୍ୟ ବାହାରକୁ ଯାଉଛି ଚିପ୍ସ । ଅଧିକ ପଢନ୍ତୁ...

କୋରାପୁଟ: ଗଛରେ ଝୁଲୁଛି ମାଳ ମାଳ ପଣସ । ଦେଖିଲେ ଲୋଭ ଆସିଯାଉଛି । ସାଧାରଣତଃ ପଣସକୁ କଞ୍ଚାବେଳେ କଠା କଷା ଓ ପିଠଉ କରି ଖାଇଥାନ୍ତି । ହେଲେ ଆପଣ କେବେ ପଣସ ଚିପ୍ସ ତିଆରି କରି ଖାଇଛନ୍ତି କି ? ଚିପ୍ସ କହିଲେ ସାଧାରଣତଃ ଆମ ମନରେ ଆଳୁ, ସାରୁ, କଦଳୀ ଓ କଲରା କଥା ଆସିଥାଏ । ହେଲେ କୋରାପୁଟ ବ୍ଲକର ସ୍ବଂୟ ସହାୟକ ଗୋଷ୍ଠୀ ଏବେ ପଣସରୁ ଚିପ୍ସ କରି ଚର୍ଚ୍ଚାରେ ରହିଛନ୍ତି । ପୁଣି ବିନା କେମିକାଲରେ ସ୍ବାଦିଷ୍ଟ ଚିପ୍ସ । ବଜାରରେ ଏହାର ଚାହିଦା ମଧ୍ୟ ବେଶ ଅଧିକ ରହିଥିବା ବେଳେ ମୂଲ୍ୟ ବି କମ ରହିଛି ।

ବଣ ପାହାଡ ଘେରା ଆଦିବାସୀ ଅଞ୍ଚଳରେ ପ୍ରଚୁର ପରିମାଣରେ ପଣସ ଫଳେ । ପୂର୍ବରୁ ଶାଗମାଛ ଦରରେ ନୀରିହ ଆଦିବାସୀଙ୍କୁ ଠକି ଦେଉଥିଲେ ବ୍ୟବସାୟୀ । କମ ଟଙ୍କା ଦେଇ ବୋହି ନେଇଥିଲେ ବସ୍ତାବସ୍ତା ପଣସ । କିନ୍ତୁ ଗତ ଦୁଇବର୍ଷ ହେବ ଓରମାସ ପକ୍ଷରୁ ଆରମ୍ଭ ହୋଇଛି ଏହି ପ୍ରୟାସ । କିଛି ସ୍ବଂୟ ସହାୟକ ଗୋଷ୍ଠୀ ମାନଙ୍କ ଦ୍ବାରା ପ୍ରାୟ ଏକ ଟନ ପଣସ ଚିପ୍ସ ପ୍ରସ୍ତୁତ କରାଯାଉଛି । ଯାହା ସ୍ଥାନୀୟ ବଜାର ସମେତ ରାଜ୍ୟ ଓ ରାଜ୍ୟ ବାହାରକୁ ଯାଉଥିବାରୁ ସ୍ଥାନୀୟ ଲୋକଙ୍କୁ ମିଳିଛି ରୋଜଗାର । କେବଳେ ସେତିକି ନୁହେଁ ପଣସରୁ ଆରମ୍ଭ କରି ମଞ୍ଚିରେ ରହିଛି ବିବିଧ ପୁଷ୍ଟିସାର । ଏଥିରେ ଔଷଧୀୟ ଗୁଣ ଭରି ରହିଛି । ବିଶେଷ କରି ପଣଷ ମଞ୍ଜିରୁ ପ୍ରସ୍ତୁତ ହେଉଥିବା ଅଟା ମଧୁମେହ ରୋଗୀଙ୍କ ପାଇଁ ବେଶ ହିତକର ।

କୋରାପୁଟରେ 1000 ମେଟ୍ରିକ ଟନ ପଣସ ଉତ୍ପାଦନ ହେଉଥିବାବେଳେ ଏହାର ବିକ୍ରୟ ବ୍ୟବସ୍ଥାକୁ ସୁଦୃଢ କରିବା ପାଇଁ ପ୍ରଶାସନ ତରଫରୁ ବିଭିନ୍ନ ପ୍ରକାର ଯୋଜନା ହାତକୁ ନିଆଯାଇଛି । ଯାହା ଆଦିବାସୀ ଜନଜାତିଙ୍କ ଆର୍ଥିକ ଅବସ୍ଥା ସ୍ବଚ୍ଛଳ କରିବାରେ ସହାୟ ହେବ ।

କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ