କୋରାପୁଟ: ପେଶାରେ ସେ ଜଣେ ବଣିଆ, ହେଲେ ନିଶା ତାଙ୍କର ବିଶାଳ ପ୍ରତିମୂର୍ତ୍ତି ନିର୍ମାଣ ଓ ଆକର୍ଷଣୀୟ ଚିତ୍ର ଅଙ୍କନ । ବିଶାଳ ଆକାରର ଗଣପତିଙ୍କ ପ୍ରତିମୂର୍ତ୍ତି ହେଉ ଅବା ଅନ୍ୟ ସୁନ୍ଦର ମୃଣ୍ମୟ ପ୍ରତିମୂର୍ତ୍ତି, ସବୁଥିରେ ଝଲସେ ଜଗା ରାଓଙ୍କ ନିଖୁଣ କାରିଗରୀ । ସେଥିପାଇଁ ଜଣେ ବଣିଆ ଅପେକ୍ଷା କୋରାପୁଟ ସମେତ ପଡୋଶୀ ଆନ୍ଧ୍ରପ୍ରଦେଶର ବିଭିନ୍ନ ସ୍ଥାନରେ ଜଣେ ଉତ୍ତମ କଳାକାର ଭାବେ ସେ ଅଧିକ ପରିଚିତ ।
ପଡୋଶୀ ଆନ୍ଧ୍ରପ୍ରଦେଶର ବିଭିନ୍ନ ସହରରେ ଅନେକ ନିଖୁଣ ପ୍ରତିମୂର୍ତ୍ତି ନିର୍ମାଣ କରିବାରେ ବଣିଆ ଜଗା ରାଓଙ୍କ ଯୋଗଦାନ ପ୍ରଶଂସନୀୟ । ନିଜ ପେଶାର ଚାପ ସାଙ୍ଗକୁ ବିଶାଳ ମୂର୍ତ୍ତି ତିଆରି କରିବାର ଭିଡ ମଧ୍ୟରେ ସେ କାଠ ତଥା ପଥରରେ କ୍ଷୁଦ୍ର ଓ ଅତିକ୍ଷୁଦ୍ର ପ୍ରତିକୃତି ତିଆରି କରିବା ସହ ମନ ମୁତାବକ ଚିତ୍ର ମଧ୍ୟ ଆଙ୍କିଥାନ୍ତି । କୋଭିଡ କଟକଣା ଯୋଗୁଁ ବର୍ତ୍ତମାନ ସୁନା ରୂପା ବେପାର ଗତ ଦୁଇ ମାସ ହେବ ମାନ୍ଦା ପଡିଛି । ପେଶାରୁ ଆସୁଥିବା ଆୟ ହଠାତ୍ ବନ୍ଦ ହୋଇଯିବା ଯୋଗୁଁ ଜଗା ଆର୍ଥିକ ଦୁଃସ୍ଥିତି ଦେଇ ଗତି କରୁଛନ୍ତି । ଏପରି ସ୍ଥିତିରେ ନିଜ ଭିତରର କଳାକାରକୁ କଟକଣା ସମୟରେ ଅଧିକ କର୍ମମୁଖର କରିବାକୁ ସଂକଳ୍ପ ନେଇଥିବା ପ୍ରକାଶ କରିଛନ୍ତି ଜଗା । ଏଣୁ ସେ ଅନେକ ଦିନ ଧରି ଅଟକି ରହିଥିବା ସ୍ବପ୍ନକୁ ସାକାର କରିବାକୁ ଅଣ୍ଟା ଭିଡିଛନ୍ତି । ଜଗା ଅସମ୍ପୂର୍ଣ୍ଣ ହୋଇ ରହିଥିବା ବିଶାଳକାୟ ଚିତ୍ର ତଥା ବିଘ୍ନ ବିନାଶକ ଗଣପତିଙ୍କ ବିଭିନ୍ନ ରୂପ ଓ ଛୋଟ ଛୋଟ ପ୍ରତିମୂର୍ତ୍ତି ତିଆରି ଆରମ୍ଭ କରିଛନ୍ତି ।
ଏହି ଚିତ୍ରକଳା ଓ ମୂର୍ତ୍ତି ନିର୍ମାଣ ତାଙ୍କୁ ଆର୍ଥିକ କ୍ଷେତ୍ରରେ କେତେଦୂର ସହଯୋଗ କରିବ ତାହା ସ୍ପଷ୍ଟ ନଥିବା ବେଳେ କୋଭିଡ କଟକଣା ସମୟରେ ଏହା ନିଶ୍ଚିତ ରୂପେ ତାଙ୍କ ମାନସିକ ସନ୍ତୁଳନ ରକ୍ଷା କରିବାବେ ସହାୟକ ହୋଇଥିବା ସେ କହିଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
