କୋରାପୁଟ : ଲମତାପୁଟ ପୋଲିସକୁ ମିଳିଛି ପୁଣି ଏକ ସଫଳତା । ପାଟ୍ରୋଲିଂ ସମୟରେ ଆନ୍ଧ୍ରପ୍ରଦେଶ ସୀମାନ୍ତ ଜଲାପୁଟ ଅଞ୍ଚଳରୁ ଆସୁଥିବା କାର୍ରୁ ଜବତ କଲା ୧୦୦ କେଜିରୁ ଉର୍ଦ୍ଧ୍ବ ପରିମାଣର ଗଞ୍ଜେଇ । ଘଟଣାରେ 2 ଟି କାର୍ ଜବତ କରିବା ସହ 4 ଜଣଙ୍କୁ ଗିରଫ ମଧ୍ୟ କରିଛି ପୋଲିସ ।
ଗତକାଲି ମଧ୍ୟରାତ୍ରିରେ ପାଟ୍ରୋଲିଂ ସମୟରେ ଲମତାପୁଟ ଠାରୁ ୬ କିଲୋମିଟର ଦୂର ତୁସୁବା ଗାଁ ନିକଟରେ ଆନ୍ଧ୍ରପ୍ରଦେଶ ସୀମାନ୍ତ ଜଲାପୁଟ ଅଞ୍ଚଳରୁ ୨ଟି କାର ଦ୍ରୁତ ଗତିରେ ଆସୁଥିଲା । ଗାଡିକୁ ଅଟକାଇ ଯାଞ୍ଚ କରିବା ବେଳେ ସେଥିରେ ଗଞ୍ଜେଇ ଜବତ ହୋଇଥିଲା । ଘଟଣାରେ ପୋଲିସ ୪ଜଣ ବ୍ୟକ୍ତିଙ୍କୁ ଅଟକ ରଖିବା ସହ ସେମାନେ ବ୍ୟବହାର କରିଥିବା 2ଟି କାରକୁ ଜବତ କରାଯାଇଛି । ଉଭୟ କାରରେ ପ୍ରାୟ ୧୦୦ କେଜିରୁ ଉର୍ଦ୍ଧ୍ବ ଗଞ୍ଜେଇ ରହିଥିବା ପୋଲିସର ପ୍ରାଥମିକ ତଦନ୍ତରୁ ଅନୁମାନ କରାଯାଇଛି । ତେବେ ମାଜିଷ୍ଟ୍ରେଟଙ୍କ ଉପସ୍ଥିତିରେ ସମସ୍ତ ଜବତ ଗଞ୍ଜେଇ ଓଜନ କରାଯିବ ବୋଲି ଲମତାପୁଟ ପୋଲିସ ଅଧିକାରୀ କହିଛନ୍ତି ।
ସୂଚନାଯୋଗ୍ୟ ଯେ, ଗତ ଏକ ସପ୍ତାହ ମଧ୍ୟରେ ଲମତାପୁଟ ଓ ମାଛକୁଣ୍ଡ ପୋଲିସ ଗଞ୍ଜେଇ ଚାଲାଣ କରୁଥିବା ଗୋଟିଏ ୧୦ ଚକିଆ ଟିପର, ୨ଟି କାର ଓ ଗୋଟିଏ ବୋଲେରୋ ଜବତ କରିବାରେ ସଫଳ ହୋଇଛି ।
କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ
