ସମ୍ୱଲପୁର: ବଳକା କପଡାରୁ ଅଳଙ୍କାର । ଏବେ ସେହି ଅଳଙ୍କାର ଦେଇଛି ଉଦ୍ୟୋଗୀର ପରିଚୟ । ବଳକା କପଡାରୁ ସମ୍ବଲପୁରୀ ବସ୍ତ୍ରର ଅଳଙ୍କାର ତିଆରି କରି ଆରମ୍ଭ କରିଥିଲେ ବ୍ୟବସାୟ l ନିଜ ଘରେ ଡ୍ରେସ ସିଲେଇ ପରେ ବଳି ଯାଇଥିବା ସମ୍ବଲପୁରୀ କପଡାର କିଛି ଅଂଶ ତଥା ଟେଲର ଦୋକାନରୁ ବଳି ପଡୁଥିବା ଅଦରକାରୀ ସମ୍ବଲପୁରୀ କପଡାର ଟୁକୁଡା ସଂଗ୍ରହ କରି ସେଥିରୁ ତିଆରି କରିଥିଲେ ସମ୍ବଲପୁରୀ ଫାବ୍ରିକ ଜୁଏଲାରୀ । ଆଉ ତାହା ଏତେ ଆକର୍ଷଣୀୟ ହେଲା ଯେ ଲୋକେ ଅର୍ଡର ଉପରେ ଅର୍ଡର ଦେଇ ଚାଲିଲେ l
କପଡା ଟୁକୁଡାରୁ ଆରମ୍ଭ କରିଥିବା ବ୍ୟବସାୟ ଦେଇଛି ଭିନ୍ନ ଏକ ପରିଚୟ ଓ ସାଜିଛି ରୋଜଗାରର ମାଧ୍ୟମ । ସମ୍ବଲପୁରୀ ଫାବ୍ରିକ ଆଉଟଲେଟ କରି କେବଳ ଯେ ହଜାର ହଜାର ଟଙ୍କା ରୋଜଗାର କରୁଛନ୍ତି ତାହା ନୁହେଁ ନିଜ ଦୋକାନରେ 8 ଜଣ ଯୁବତୀଙ୍କୁ ରୋଜଗାର ମଧ୍ୟ ଦେଇଛନ୍ତି l ସେ ହେଉଛନ୍ତି ସମ୍ବଲପୁର ସହରର ସାକ୍ଷୀପଡ଼ାର ୩୪ ବର୍ଷୀୟା ଜ୍ୟୋତି ମେହେର l ତେବେ ତାଙ୍କୁ ଏହି ସଫଳତା ଏତେ ସହଜରେ ମିଳିନାହିଁ l ଏଥିପାଇଁ ତାଙ୍କୁ ବହୁତ ସଂଘର୍ଷ କରିବାକୁ ପଡିଛି l
ଟୁକୁଡା କପଡା ଦେଲା ଉଦ୍ୟୋଗୀର ପରିଚୟ
ପୂର୍ବରୁ ଜ୍ୟୋତି ନିଜେ ଜଣେ ମେହେନ୍ଦୀ ଓ ମେକଅପ ଆର୍ଟିଷ୍ଟ ଥିଲେ l ତାଙ୍କର ସ୍ୱାମୀଙ୍କ ଫଟୋ ଷ୍ଟୁଡ଼ିଓ ଥିଲା l ଉଭୟଙ୍କ ରୋଜଗାରରେ ପରିବାର ଠିକ ଠାକ ଚାଲୁଥିଲା l ତେବେ କୋରୋନା ମହାମାରୀ ସମୟରେ ହଠାତ ସବୁ ବନ୍ଦ ହୋଇଗଲା ଓ ରୋଜଗାର ବନ୍ଦ ହୋଇଗଲା l ଏଭଳି ସ୍ଥିତିରେ ପରିବାର ପ୍ରତିପୋଷଣ କଷ୍ଟସାଧ୍ୟ ହୋଇଗଲା l ଏହାମଧ୍ୟରେ ଦିନ ସେ ସୋସିଆଲ ମିଡ଼ିଆରେ ଅହମ୍ମଦବାଦର ଜଣେ ଜୁଏଲାରୀ ବିଜନେସ କୋଚ ପଲକ ଶର୍ମାଙ୍କ ଭିଡିଓ ଦେଖି ଏହିଭଳି ଜୁଏଲାରୀ ବିଜନେସ ଆରମ୍ଭ କରିବାକୁ ଚିନ୍ତା କରିଥିଲେ l
ତେବେ ସେ ସମ୍ବଲପୁରୀ ଫାବ୍ରିକରେ ଏହି ଜୁଏଲାରୀ ତିଆରି କରିବାକୁ ନିଷ୍ପତ୍ତି ନେଇଥିଲେ l ତେଣୁ ସେ ପଲକ ଶର୍ମାଙ୍କ ସହ ଫୋନ ଯୋଗେ ଯୋଗାଯୋଗ କରି ସୋସିଆଲ ମିଡ଼ିଆ ସାହାଯ୍ୟରେ ତାଙ୍କର କେତୋଟି ଫ୍ରି ୱେବନେୟାର ଓ ମାଷ୍ଟର କ୍ଲାସରେ ଜଏନ କରି ତାଲିମ ନେଇଥିଲେ l ତେବେ ଏଥିପାଇଁ ସେ 5 ହଜାର ଟଙ୍କାର ଫି ମଧ୍ୟ ଦେଇଥିଲେ l ସେଠାରୁ ସେ ତାଲିମ ପାଇବା ସହ କେତେକ କଞ୍ଚାମାଳ ଯଥା ଏମଡିଏଫ କାଠ, ଆକ୍ସିଡାଇଜ, ଶାମୁକା, ମୋତି, କେତେକ ପ୍ରକାର ସୁତା ମଗେଇ ଥିଲେ ଓ ଛୋଟ ଆକାରରେ ନିଜ ଘରେ କାମ ଆରମ୍ଭ କରିଥିଲେ l
ଏନେଇ ଜ୍ୟୋତି କୁହନ୍ତି,"ମୋତେ ଡିଜାଇନ କରିବା ପାଇଁ ବହୁତ ଭଲ ଲାଗୁଥିଲା l ଡ୍ରେସ, ମେହେନ୍ଦୀ, ମେକଅପରେ ବହୁତ ରୁଚି ଥିଲା l ଥରେ ଘରେ ଏକ ଡ୍ରେସ ସିଲେଇ କରିବା ପରେ କିଛି କପଡା ବଳିଗଲା l ସେଥିରୁ କିପରି ଏକ ଇୟରିଂ ତିଆରି କରିବି ବୋଲି ଭାବିଲି ଓ ସେଥିରୁ ଏକ ଇୟରିଂ ବନେଇଲି l ତାହାକୁ ଦେଖି ଲୋକ ବହୁତ ପ୍ରଶଂସା କଲେ l ତେବେ ସେହି ସମୟରେ କୋରୋନାରେ ସବୁ ବନ୍ଦ ହୋଇଗଲା l ପଇସାର ବହୁତ ସମସ୍ୟା ହେଲା l ମୁଁ ମେହେନ୍ଦୀ, ମେକଅପ ଆର୍ଟିଷ୍ଟ ଥିଲି, ତେବେ ବାହାଘର ବନ୍ଦ ହୋଇଯିବାରୁ କାମ ଆସିବା ବନ୍ଦ ହୋଇଗଲା l ଏହି ସମୟରେ ସୋସିଆଲ ମିଡ଼ିଆରେ ଦିନେ ଜଣେ ଜୁଏଲାରୀ ବିଜନେସ କୋଚ ପଲକ ଶର୍ମାଙ୍କ ଏକ ଭିଡିଓ ଦେଖିଥିଲି l ତାପରେ ତାଙ୍କ ସହ କଥା ହୋଇ କେତୋଟି ୱେବନେୟାର ଓ ମାଷ୍ଟର କ୍ଲାସରେ ଯୋଗ ଦେଇ ଉପାୟ ପାଇଥିଲି l
ସେଠାରୁ କେତେକ କଞ୍ଚାମାଲ ଆଣିଥିଲି ଓ ମାତ୍ର 5000 ଟଙ୍କା ସ୍ୱାମୀଙ୍କ ଠାରୁ ଆଣି ବିଜନେସ ଆରମ୍ଭ କରିଥିଲି l 2021 ମସିହାରେ ଏହି ବ୍ୟବସାୟ ନିଜ ଘରେ ଆରମ୍ଭ କରିଥିଲି l ତେବେ ବ୍ୟବସାୟ ବଢିବା ପରେ 2022 ଅଗଷ୍ଟ 1ରେ ଅନଲାଇନରେ ଅର୍ଡର ନେବା ସହ ବ୍ୟବସାୟକୁ ବଢ଼େଇଥିଲି l ଅନଲାଇନରେ ବ୍ୟବସାୟ ଆରମ୍ଭ ପରେ ବିକ୍ରୟ ବହୁତ ବଢିଗଲା l ପ୍ରଥମ ଥର ପାଇଁ ମୁଁ 18ହଜାର ତାଙ୍କର ଲାଭ ପାଇଲି ଆଉ ମୋର ସାହସ ବଢିଗଲା l ଏହାପରେ ମୁଁ ବ୍ୟବସାୟକୁ ବଢେଇବାକୁ ଇଚ୍ଛା କରିଥିଲି ।"
ସମ୍ବଲପୁରୀ ଫାବ୍ରିକ ଜୁଏଲାରୀ
ସମ୍ବଲପୁର ସହର ଅଶୋକା ଟକିଜ ଛକରୁ ସାକ୍ଷୀପଡ଼ା ରାସ୍ତାରେ ଯିବା ବେଳେ ହନୁମାନ ମନ୍ଦିର ଆଗକୁ ବାମ ପାର୍ଶ୍ଵରେ ଜ୍ୟୋତିଙ୍କର ଆଉଟଲେଟ ଅଛି l ଏଠି ସକାଳୁ ସଞ୍ଜ ସବୁବେଳେ ଗ୍ରାହକଙ୍କ ଭିଡ଼ ହୋଇଥାଏ l ଦୋକାନଟି ଛୋଟ ହେଲେ ମଧ୍ୟ ସବୁବେଳେ ଗହଳି ଦେଖିବାକୁ ମିଳେ l ଏଠି ସମ୍ବଲପୁରୀ ଫାବ୍ରିକର ବିଭିନ୍ନ ଡିଜାଇନର ଜୁଏଲାରୀ ବା ଅର୍ନାମେଣ୍ଟ ମିଳିଥାଏ l ଏହି ଅଳଙ୍କାରରେ ମୁଖ୍ୟତଃ ସମ୍ବଲପୁରୀ କପଡାର ଏକ ଡିଜାଇନ ଥାଏ, ଏହା ସହ ଏଥିରେ ଏମଡିଏଫ କାଠ, ଆକ୍ସିଡାଇଜ, ମୋତି, ଶାମୁକା ଇତ୍ୟାଦି ଖଚିତ ହୋଇଥାଏ l ଏଠାରେ ମୁଖ୍ୟତଃ ମହିଳାମାନଙ୍କର ଇୟରିଂ,ନେକଲେସ, ଚକୋର, ଚିକ ଇତ୍ୟାଦି ଉପଲବ୍ଧ ଅଛି l ଏହି ସବୁ ଅଳଙ୍କାରର ଦାମ 100 ଟଙ୍କାରୁ ଆରମ୍ଭ କରି 600 ଟଙ୍କା ପର୍ଯ୍ୟନ୍ତ ରହିଛି l ଏହି ସବୁ ଜିନିଷ ତିଆରି କରିବାକୁ ଏଠି 8 ଜଣ ଝିଅ ନିୟୋଜିତ ହୋଇଛନ୍ତି l
ଅନ୍ୟପାଇଁ ପାଲଟିଲେ ରୋଜଗାରର ମାଧ୍ୟମ
ବର୍ତ୍ତମାନ ଜ୍ୟୋତିଙ୍କ ସମ୍ବଲପୁରୀ ଜୁଏଲାରୀ ଆଉଟଲେଟରେ 8 ଜଣ ଝିଅ ରୋଜଗାର ପାଇଛନ୍ତି l ସେମାନେ ଏଠାରେ ମାତ୍ର 2 ରୁ 3 ଘଣ୍ଟା କାମ କରି ଭଲ ଦି ପଇସା ରୋଜଗାର କରି ଆର୍ଥିକ ସ୍ତରରେ ସ୍ୱାବଲମ୍ବୀ ହୋଇ ପାରିଛନ୍ତି l ଏଠାରେ ଉଭୟ ହୋଲସେଲ ଓ ରିଟେଲ ରେଟରେ ବିକ୍ରି ହେଉଛି l ହୋଲସେଲରେ ସପ୍ତାହକୁ 15 ହଜାର ଟଙ୍କା ପର୍ଯ୍ୟନ୍ତ ଓ ରିଟେଲରେ ଦୈନିକ 3000 ଟଙ୍କା ପର୍ଯ୍ୟନ୍ତ ସେଲ ହେଉଛି ବୋଲି ଜ୍ୟୋତି କହିଛନ୍ତି l
ତେବେ ଜ୍ୟୋତିଙ୍କ ଏହି ଆଉଟଲେଟରେ ଜଣେ ସିଭିଲ ଡିପ୍ଲୋମା ଇଞ୍ଜିନିୟରିଙ୍ଗ ଛାତ୍ରୀ ମଧ୍ୟ ପାର୍ଟ ଟାଇମ କାମ କରନ୍ତି l ସେ ହେଉଛନ୍ତି ସମ୍ବଲପୁର ଅଇଁଠାପାଲିର ରିମା ବେହେରା ଯିଏ ଭୁବନେଶ୍ୱରର ଏକ ଇଞ୍ଜିନିୟରିଙ୍ଗ କଲେଜରେ ଡିପ୍ଲୋମା କରି ସାରିଛନ୍ତି l ତେବେ ଚଳିତ ବର୍ଷ ସେ ସୋସିଆଲ ମିଡ଼ିଆରୁ ଜ୍ୟୋତିଙ୍କ ଆଡଟଲେଟରେ ନିଯୁକ୍ତି ଆଉ ରୋଜଗାର ର ସୁଯୋଗ ଦେଖି ତାଙ୍କ ସହ ଯୋଡି ହୋଇଥିଲେ ଓ 4 ଦିନର ଟ୍ରେନିଂ କରିଲା ପରେ ଏବେ ଚାକିରି କରି ନିଜ ପାଇଁ ରୋଜଗାର କରି ପାରିଛନ୍ତି l
ଏନେଇ ରିମା କୁହନ୍ତି, " ମୁଁ ହ୍ୱାଟ୍ସଆପରେ ଦିଦିଙ୍କ ସ୍ଟାଟସରୁ ଏ ବିଷୟରେ ଜାଣିଲି ଆଉ ଏଠାକୁ ଆସିଲି l ଘରେ ବେକାର ହୋଇଥିଲି, କଣ କରିବି କଣ କରିବି ବୋଲି ଭାବୁଥିଲି l ଏଠି ଆସି କାମ କରିବା ପରେ ନିଜର ପକେଟ ମନି ରୋଜଗାର କରି ପାରୁଛି l ଆଗକୁ ଚାକିରି କଲେ ମଧ୍ୟ ଏଠି ପାର୍ଟ ଟାଇମ କାମ କରିବି, ମୋତେ ଏହା ଭଲ ଲାଗୁଛି ।"
ସମ୍ବଲପୁର, ଇଟିଭି ଭାରତ
