କୋରାପୁଟ: ଜମିରେ ହଳ ନ କରି ମଧ୍ୟ ଆଳୁ ଚାଷ ସମ୍ଭବ । ଅନ୍ତର୍ଜାତୀୟ ଆଳୁ ଗବେଷଣା ସଂସ୍ଥାର ସହଯୋଗରେ କୋରାପୁଟ ପ୍ରଗତି ସ୍ବେଚ୍ଛାସେବୀ ଅନୁଷ୍ଠାନ ତରଫରୁ ଜୟପୁର, ବୋରିଗୁମ୍ମା ଓ କୋଟପାଡର ସମୁଦାୟ 37 ଜଣ ଚାଷୀଙ୍କ କ୍ଷେତରେ ଏହି ପ୍ରୟୋଗ କରାଯାଇଛି । ଏନେଇ ସଂସ୍ଥାର ସମ୍ପାଦକ ପ୍ରଭାକର ଅଧିକାରୀ ସୂଚନା ଦେଇଛନ୍ତି ।
ଧାନ ଅମଳ ପରେ ଖାଲି ପଡିଥିବା କ୍ଷେତରେ ପ୍ରୟୋଗ କରାଯାଇଥିବା ଏହି ନୂତନ ପ୍ରକ୍ରିୟାରେ ଆଳୁକୁ ମାଟି ଉପରେ ଥୋଇଦେଇ ତା ଉପରେ ଜୈବିକ ଖତ ଘୋଡ଼ାଇ ଦିଆଯିବା ପରେ ତାକୁ ନଡ଼ାର ଘନ ଆସ୍ତର ଦେଇ ଘୋଡ଼ାଇ ଦିଆଯାଉଛି । ଫଳରେ ଆଳୁ ଗଜା ହୋଇ ଚାଷ ହୋଇପାରୁଛି । ପ୍ରଗତି ଅନୁଷ୍ଠାନର କୃଷି ବିଶେଷଜ୍ଞ ପ୍ରଦୀପ ସେଠି ଏହି ପଦ୍ଧତି ବାବଦରେ ଅଧିକ ସୂଚନା ଦେଇଛନ୍ତି ।
ହଳ କରିବାକୁ ପଡୁନଥିବା ସହ ସମଗ୍ର ଚାଷ ସମୟରେ ପାଣି ମଡ଼ାଇବାକୁ ପଡୁନଥିବା ଯୋଗୁଁ ଏହି ପ୍ରକ୍ରିୟାରେ କମ ଖର୍ଚ୍ଚରେ ଅଧିକ ଲାଭ ହେବ ବୋଲି କୋଟପାଡ ନିକଟସ୍ଥ ବାସ୍ତାମ୍ବାର ଅଗ୍ରଣୀ ଚାଷୀ ତୁଫାନ କୁମାର ଦ୍ବିବେଦୀ କହିଛନ୍ତି । ବିଶେଷଜ୍ଞଙ୍କ କହିବା ଅନୁଯାୟୀ ଏହି ଚାଷରେ 7 ରୁ 8 ଗୁଣ ଉତ୍ପାଦ ମିଳିପାରିବ । ସବୁଠି ଜମିକୁ ପାଣି ଯୋଗାଇବା ଏକ ବିରାଟ ସମସ୍ୟା ଭାବେ ଦେଖାଯାଉ ଥିବାବେଳେ ଏହି ନୂତନ ପଦ୍ଧତିରେ କରାଯାଉଥିବା ଚାଷ ପ୍ରଣାଳୀ ଆଳୁ ଚାଷୀଙ୍କ ପାଇଁ ଏକ ନୂତନ ଦିଗ ପ୍ରଦର୍ଶନ କରିବ ବୋଲି ପ୍ରଭାକର ଅଧିକାରୀ କହିଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
